SHaˈu Layttaaninne Hegaappe Guyyiyan Demmana Sarotettaa
SHaˈu Layttaaninne Hegaappe Guyyiyan Demmana Sarotettaa
“Xoossay ubbaassi ubbabaa hanana.”—1 QOR. 15:28, NW.
QONCCISSANA DANDDAYAY?
Kaallidi deˈiya xiqiseti polettiyo wode neeni ay demmanee?
1. ‘Zawi baynna daro asay’ demmana maalaalissiyaabay aybee?
SUURE pirddiyaanne qarettiya kawoy haariyo issi wolqqaama kawotettay, ba haaruwan deˈiyaageetussi shaˈu layttan oottana danddayiyo loˈˈobaa ubbaa qoppana danddayay? Ha iita alamee muleera xayanaadan oottiya ‘daro waayiyaappe’ attiya ‘zawi baynna daro asay’ maalaalissiyaabaa demmana.—Ajj. 7:9, 14.
2. Aadhida 6,000 layttan asaa naatu bolli aybi gakkidee?
2 Aadhida 6,000 layttan asaa naati banttana banttarkka haaridoogee, eta bolli wolqqaama waayeenne tuggay gakkanaadan oottiis. Geeshsha Maxaafay daro wodeppe kase, “Asi bau de7iya haariyo maataa hara asa qohanau go7ettiyoogaa” yootiis. (Era. 8:9) Ha wodiyan haniiddi deˈiyaabay aybee? Olaanne kawotettaa bolli makkaliyoogaa gujjin, hiyyeesatettaa, harggiyaa, heeray moorettiyoogaa, carkkuwaa hanotay laamettiyoogaanne hegaa mala wolqqaama metoy deˈees. Nuuni hanotay baaridan deˈo giyoogaa aggana xayikko, bashshay gakkanaagaa sunttati yootoosona.
3. SHaˈu Layttaa Haaruwaa wode aybi hananee?
3 Mase Kawuwaa Yesuus Kiristtoosinne aara haariya 144,000 asati haariyo wode, Xoossaa Kawotettay asaa naatu bollinne saˈaa bolli gakkida qoho ubbaa giigissana. Xoossaa Yihooway, “Taani ooratta salotanne ooratta sa7aa medhdhais; kasebai ubbai hassayettennanne qofettenna” yaagidi qaalaa gelido ufayssiyaabay, SHaˈu Layttaa Haaruwan polettana. (Isi. 65:17) Sinttappe hanana maalaaliyaabati aybee? Haˈˈi ‘beettennaba’ gidikkokka, sinttappe hanana ha maalaaliyaabata amarida hanotan akeekana mala Geeshsha Maxaafan deˈiya hiraagay nuna maaddees.—2 Qor. 4:18.
‘ASAY KEETTAA KEEXXANANNE WOYNIYAA TOKKANA’
4. Ha wodiyan daro asay ay mala keettan deˈii?
4 Ba soo asaara woppaaninne sarotettan deˈiyo keetti baayyo deˈanaadan koyennay oonee? Gidoppe attin, ha wodiyan giiga keetta demmanaagee gita meto. Asay kataman gurddettidi deˈees. Daroti shufuro heeran humppa keettan deˈoosona. Eti banttau keetti deˈana giidi mule qoppokkona.
5, 6. (a) Isiyaasa 65:21nne Mikiyaasa 4:4y waanidi polettanee? (b) Nuuni he anjjuwaa demmana danddayiyoy ayba ogiyaanee?
5 Isiyaasa baggaara Xoossay, “Asati keettata keexxidi, etan de7ana; woiniyaa turatakka tokkidi, eta aifiyaa maana” yaagidi hananabaa yootido gishshau, ba buzo keetti deˈanaadan asay amottiyo amoy Xoossaa Kawotettay haariyo wode polettana. (Isi. 65:21) Gidoppe attin, demmanabay buzo keetta xalla gidenna. Ha wodiyankka gidin, issoti issoti bantta buzo keettan deˈoosona; amaridaageeti ubba keehi gita keettan deˈoosona. SHin eti miishshay waaga xayiyoogaa gaasuwan, kaysoy wuuqqin woy hegaappekka iitabay gakkin, he keettan deˈana danddayokko giidi ubbatoo hirggoosona. SHin Xoossaa Kawotettay haariyo wode ubbabay giigana! Hananabaa yootiya Mikiyaasi, “Asi ubbi ba woiniyaa turaa kuwaaninne balasiyaa kuwan woppu giidi uttana; ai asinne eta yashissenna” yaagidi xaafiis.—Mik. 4:4.
6 Nuuni Xoossaa Kawotettay haariyo wode deˈanau koyikko, ay oottana koshshii? Nu ubbaassi giiga keettay koshshiyoogee qoncce. Gidoppe attin, he amottiyoobaa ha wodiyan demmanau baaxetiyoogaappe, geella hegaa demmanau wolqqaama acuwan geliyoogaappe, Yihooway gelido qaalaa hassayiyoogee eratetta gidennee? Yesuusi babaa, “Worakanatussi ollai de7ees; kafotussikka keettai de7ees; shin taani Asa Na7ai, zin77ada shemppa ekkiyoosikka tau baawa” yaagidoogaa hassaya. (Luq. 9:58) Yesuusi oogaappenne aadhiya loˈˈo keettay deˈiyoogaa gidana danddayees. I hegaa koyibeennay aybissee? Yesuusi Kawotettaabaa kaseyennaadan xubbiyaabaa aybanne oottana koyibeenna. Nu deˈuwan nuna qofissiya waannabay aquwaabaa gididi, nuna hirggissennaadan a leemisuwaa kaallana danddayiyoo?—Maa. 6:33, 34.
“WANGGIREELLOINNE DORSSAA MARAI ISSIPPE HEEMETTANA”
7. Yihooway asaa naati mehiyaanne doˈaa waatanaadan maataa immidee?
7 Yihooway saˈan deˈiya meretaa medhiyo wode, asaa ubbaappe wurssettan medhiis. Yihooway Waanna Oosancha gidida ba bayra Naˈau ba halchuwaa hagaadan giidi yootiis: “Asa nu leemisuwan nuna milatissidi ane medhdhoos; medhdhin eti abbaa moliyaa, saluwaa kafuwaa, biittaa bolli woxxi qaaxxiya mereta ubbaa haarona.” (Doo. 1:26) Yaatiyo gishshau, Addaamessinne Hewaanissi, qassi guyyeppe asaa naatu ubbaassi mehiyaanne doˈaa haariyo maatay imettiis.
8. Ha wodiyan doˈau ay mala eeshshay deˈii?
8 Asaa naati mehiyaanne doˈaa ubbaa haarananne etaara sarotettan deˈana danddayiyoonaa? Daro asay kanaanne gawaraa malabaa keehippe dosees. Doˈaa shin? Doˈaara meezetidi etabaa xannaˈiya saynttistteti xanttiya doˈay ubbay siiqiyoogaanne ixxiyoogaa mala hanotaa qonccissiyoogaa yootoosona. Doˈay qohoy bana gakkiyo wode yayyiyoogaanne hanqqettiyoogaa eroos; shin dosana danddayii? He saynttistteti, xanttiya doˈati bantta marata dichiyo wode eta keehippe dosiyoogaa qonccissidosona.
9. Doˈaara gayttidaagan laamettanabay aybee?
9 Yaatiyo gishshau, Geeshsha Maxaafay asaynne doˈay sarotettan deˈanaagaa yootiyooban nuuni maalaalettana koshshenna. (Isiyaasa 11:6-9; 65:25 nabbaba.) Maalaalettana koshshennay aybissee? Noheenne a soo asay, Bashshaa Haattaappe simmin markkabiyaappe kiyido wode Yihooway etau, “Biittan woxxi qaaxxiyaabai . . . ubbai intteyyo yayyonanne dagammona” giidoogaa hassaya. Hegaa gishshau, daro doˈay asay bana qohennaadan baqatees. (Doo. 9:2, 3) Yihooway ba koyro azazoy polettanaadan, doˈay yayyiyoogaanne dagammiyoogaa agganaadan oottana danddayennee? (Hoo. 2:18) Bashshaappe attidi he wode saˈan deˈana ubbay keehi ufayttana!
‘XOOSSAY AFUTTA UBBAA QUCCANA’
10. Darotoo, asaa naati yeekkiyoy aybissee?
10 Solomoni “salo gufantton asi asa ai keenaa [naaqqiyaakko]” beˈido wode azzanidi, “Naaqettidaageeti banttana minttettiyaabaa xayidi yeekkoosona” yaagiis. (Era. 4:1) Ha wodiyankka hanotay hegaa mala woy ubba yaa iita. Dumma dummaban yeekkibeennay oonee? Issi issitoo asay ufayttidi afuxxana danddayees. Gidoppe attin, afuttay darotoo wozanan azzanidoogaa bessiyaaba.
11. Neeni qarettanaadan oottiya Geeshsha Maxaafaa taarikee awugee?
11 Geeshsha Maxaafan deˈiya, yeekkida asaabaa yootiya daro taarikiyaa hassaya. Saara 127 layttaa deˈada hayqqido wode, “Abrahaami Saariyyo yeekkanaunne kayyottanau biis.” (Doo. 23:1, 2) Naaˈooma amˈˈe gidida ba naatu machotuppe shaahettiyo wode, “eti bantta qaalaa xoqqu oottidi [yeekkidosona]”; qassi “bantta qaalaa xoqqu oottidi, haranttuwaakka yeekkidosona.” (Uru. 1:9, 14) Kawuwaa Hizqqiyaasi keehi sahettidi hayqqanau matido wode, Xoossaakko woossiis; qassi “keehi mishettidi yeekkiis”; Yihooway au qarettidi a pattiis. (2 Kaw. 20:1-5) Kiitettida PHeexiroosi Yesuusa kaddidoogaa yootiya taarikee azzanttennay oonee? PHeexiroosi kuttoy waassiyoogaa siyido wode, “kare kiyidi, mishettidi yeekkiis.”—Maa. 26:75.
12. Xoossaa Kawotettay asaa naati tumu woppaa demmanaadan oottanay ayba ogiyaanee?
12 Guutta gidin gita gidin, asaa naatu bolli azzanttiyaabay gakkiyo wode eti minttettiyaabaanne woppissiyaabaa keehippe koyoosona. Hegaa gishshau, Kiristtoosa SHaˈu Layttaa Haaruwaa wode, “Xoossai [asaa] aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7enna.” (Ajj. 21:4) Kayyoy, waasoynne sahoy hegaappe sinttanau deˈennaagee, qassi Xoossay asaa naatu waanna morkkiya, hayquwaakka xayssanau qaalaa gelidoogee keehippe ufayssiyaaba. Hegee polettanay ayba ogiyaanee?
“DUUFUWAN DE7IYAAGEETI . . . DUUFUWAAPPE GAXI KIYANA”
13. Addaamee nagaraa oottido wodiyaappe doommidi, hayqoy asaa naata qohidoy ayba ogiyaanee?
13 Addaamee nagaraa oottido wodiyaappe doommidi, hayqoy asaa naata haariis. Hayqoy nagarancha asaa naati kessi ekkana danddayenna, eti keehippe azzananaadaaninne kayyottanaadan oottiya wolqqaama morkke. (Roo. 5:12, 14) Miilooniyan qoodettiya asay “bantta de7o ubban haiquwau yayyidi, au ailletidi” deˈidosona.—Ibr. 2:15.
14. Hayqoy xayiyo wode aybi hananee?
14 Geeshsha Maxaafay ‘wurssetta morkkee hayqoy xayanaagaa’ yootees. (1 Qor. 15:26) He hanotan goˈettana naaˈˈu citati deˈoosona. Ha wodiyan deˈiya ‘zawi baynna daro asay’ Xoossay qaalaa gelido ooratta alamiyaa gelidi merinau deˈana danddayoosona. Hayqqida biilooniyan qoodettiya asay qassi hayquwaappe denddana. ‘Zawi baynna daro asay’ hayquwaappe denddiyaageeta mokkiyo wode, asay ay keena ufayttanaakko qoppa. Geeshsha Maxaafan deˈiya, hayquwaappe denddidaageetu taarikiyaa pilggiyoogee, sinttappe asay hayquwaappe denddiyo wode ay mala hanotay deˈanaakko nuuni akeekanaadan maaddees.—Marqqoosa 5:38-42; Luqaasa 7:11-17 nabbaba.
15. Neeni siiqiyoogeeti hayquwaappe denddiyo wode beˈiyaakko waanuutii?
15 “Asai keehi daro garamettiis,” giyaagaanne “Xoossaa galatidosona” giya qofaa akeeka. Neeni he sohuwan deˈiyaaba gidiyaakko, neenikka he asatudan hanennan aggakka. Nuuni siiqiyoogeeti hayquwaappe denddiyo wode beˈiyoogee, nuuni keehippe ufayttanaadan oottana. Yesuusi, “Duufuwan de7iyaageeti a cenggurssaa siyiyo wodee yees. Siyidi eti duufuwaappe gaxi kiyana” giis. (Yoh. 5:28, 29) Nuuni hegaa malabay haniyo wode mule beˈi erokko; hegee haˈˈi ‘beettennaba’ shin sinttappe beˈana keehi gita hanotatuppe issuwaa.
“XOOSSAY UBBAASSI UBBABAA HANANA”
16. (a) Haˈˈi beettenna anjjuwaabaa nuuni ufayttidi haasayana koshshiyoy aybissee? (b) PHauloosi Qoronttoosan deˈiya Kiristtaaneta minttettanau woygidee?
16 Ee, ha metiya wodiyan Yihoowayyo ammanettidi deˈiyaageeti sinttappe maalaaliyaabaa demmana! Gita anjjoti haˈˈi beettennaba gidikkokka, he anjjota ubbatoo qoppiyoogee nuuni keehippe koshshiyaabaa kaseyanaadaaninne ha alamiyan deˈiya, attiyaaban xubettennaadan maaddees. (Luq. 21:34; 1 Xim. 6:17-19) So asaa goynuwan tobbiyo wode, nu mala Kiristtaanetuura haasayiyo wode, harata Geeshsha Maxaafaa xannaˈissiyo wodenne tumaa eranau koyiyaageetuyyo markkattiyo wode, maalaalissiya nu hidootaabaanne woytuwaabaa ufayttidi haasayiyaageeta gidoos. Hegee nu hidootay nuussi qoncce gididi beettanaadan maaddees. Kiitettida PHauloosi ba mala Kiristtaaneta hegaara gayttidaagan minttettiis. I yootidobay eti Kiristtoosa SHaˈu Layttaa Haaruwaa wurssettan hananabaa qoppanaadan maaddiis. Koyro Qoronttoosa 15:24, 25, 28n (Nabbaba.) deˈiya qofaa loytta akeekanau mala.
17, 18. (a) Yihooway asaa naata medhido wode ‘ubbaassi ubbabaa hanidoy’ ayba ogiyaanee? (b) Yesuusi sarotettaanne issippetettaa zaarettidi ehaanau ay oottanee?
17 “Xoossay ubbaassi ubbabaa hanana” giya qofaa keenaa, shaˈu layttaa wurssettan hananabaa loyttidi qonccissiya hara qofi baawa. Hegee woygiyoogee? Polo asa gidida Addaameenne Hewaana, issippetettan deˈiya Yihoowa keettaa asa gididi Edenen deˈido wodiyaa hassaya. He wode, Ubbabaa Hariyaa Yihooway ba meretaa ubbaa, giishin kiitanchatanne asaa naata ba huuphe haarees. Eti aara haasayana, ayyo goynnana, qassi appe anjjuwaa demmana danddayoosona. He wode i “ubbaassi ubbabaa” hanees.
18 Asaa naati seexaanay balettin Yihooway haariyo maataa bolli makkalido wode he issippetettay moorettiis. Gidoppe attin, Mase Kawotettay 1914ppe doommidi, zaarettidi he sarotettaynne issippetettay deˈanaadan oottiiddi deˈees. (Efi. 1:9, 10) SHaˈu Layttaa Haaruwaa wode, haˈˈi ‘beettennaba’ gidida maalaaliyaabati polettana. Hegaappe simmin, “wurssettai” yaana; hegee Kiristtoosa SHaˈu Layttaa Haaruwaa wurssetta gidana. Hegaappe simmin aybi hananee? Yesuusau “maata ubbai saluwaaninne sa7an” imettidaba gidikkokka, i Yihoowa maataa bau ekkanau koyenna. I ba huuphiyaa kawushshidi, “Xoossaassi ba Aawaassi kawotettaa [immana].” I baayyo deˈiya dumma maataa ‘Xoossaa bonchuwau’ goˈettana.—Maa. 28:18; Pili. 2:9-11.
19, 20. (a) Xoossaa Kawotettau haarettiyaageeti ubbay Yihoowau haarettiyoogaa bessiyoy ayba ogiyaanee? (b) Nuuni sinttappe demmana gita anjjoy aybee?
19 He wode, ha saˈan Xoossaa Kawotettaayyo haarettiyaageeti polo asa gidana. Eti Yesuusa leemisuwaa kaallana; qassi bantta huuphiyaa kawushshidi bantta dosan Yihoowa maatau haarettana. Eti wurssetta paaciyaa aadhiyoogan hegaadan oottana koyiyoogaa bessoosona. (Ajj. 20:7-10) Hegaappe simmin, makkalida ubbay, giishin asaa naatinne ayyaana meretati merinau xayana. Hegee keehippe ufayssiya wode gidana! Yihoowa keettaa asay ubbay “ubbaassi ubbabaa hanana” Yihoowa ufayssan sabbana.—Mazamure 99:1-3 nabbaba.
20 Xoossaa Kawotettay mata wode ehaana maalaaliyaabati neeni ne deˈuwan Yihoowa sheniyaa kaseyanau baaxetanaadan denttettokkonaa? Seexaanaa alamiyaa worddo hidootaynne cimoy Yihoowayyo oottiyoogaa nena dogissennaadan naagettay? Yihoowa Kawotettau exatanau qofaa qachadii? Neeni oottiyoobay merinau hegaadan oottanau koyiyoogaa bessiyaagaa gido. Yaatikko, shaˈu layttaunne hegaappe simminkka sarotettaanne ufayssaa demmana danddayaasa!
[Oyshata]
[Sinttaa 16n deʼiya misiliyaa qonccissuwaa]
Yesuusi Kawo gididi oottanaadan baayyo imettida oosuwaa poliyo wode, ba huuphiyaa kawushshidi kawotettaa ba Aawaayyo immana
