Mussinnay Attibeennay Aybissee?
“Issi asi bau de7iya haariyo maataa hara asa qohanau [go7ettees].”—ERA. 8:9.
HA XIQISEE asaa naatu haaruwaabaa loytti qonccissees. Keehi daro tuggaunne waayiyau gaasoy asa aysuwaa. Asi deˈido wode ubban, deretettay giiga gidanaadan suurebaa qoppidi baaxetida asatakka yaarettiyoogeenne mussinnay muletoo shaalliis. Hegaadan hanidoy aybissee? Mussinnay attibeennay aybissee? Hegau gaasoy hagaappe kaallidi deˈiya heezzubaa.
1. Nagaray gaaso gidees.
Geeshsha Maxaafay nuuni “ubbai issippe nagaraappe garssan de7iyoogaa” geeshshidi yootees. (Roo. 3:9) Laattido, yeddenna harggiyaadan, nagaray nu giddon ‘deˈees.’ SHaˈan qoodettiya layttau nagaray asaa naata kawodan ‘haariis.’ A ‘higgee’ nu giddon ubbatoo oottees. Asaa naati nagarancha gidiyoogee, eti bantta koshshaa kaseyanaadan woy harata qohidikka gidin, bantta deˈuwan aqo woy maata demmanau bichaaranaadan oottiis.—Roo. 5:21; 7:17, 20, 23, 25.
2. Ha iita alamee gaaso gidees.
Ha alamiyan deˈiya daro asay yaareteesinne ba xallaa dosees. Hegaa mala hanotan, issi issi asay hara asaagaappe dummatiyaabaa oottanau metootees. Eti sunttettanau keehi qaaqqatoosona. Eti banttau koshshiyaagaappe daro miishshaanne aquwaa demmanaukka keehi amottoosona. Eti hegaa malabaa demmanau likke gidennabaa oottanau koyiyoogee azzanttiyaaba. Hegaa mala asay qohiyaabaa ixxiyoogaa aggidi, “iitabaa oottanau daro asaa” kaallees.—Kes. 23:2.
3. Seexaanaa Dabloosi gaaso gidees.
Makkalancha gidida ayyaana meretay, Seexaanay, “sa7a ubbaa” balettiiddi deˈees. (Ajj. 12:9) I asaa naata ba koyiyoobaa ootissiyoogan ufayttees. Asay ishalanaunne duretanau amottiyo gishshau, he amottiyoobaa demmanau bessennabaa oottanaadan Seexaanay eta cimmana danddayees.
Hegaa giyoogee nuuni Seexaanau azazettidi, i koyiyo ubbabaa oottana bessees giyoogee? Ha oyshaa zaaruwaa hagaappe kaalliya huuphe yohuwan beˈana.
