‘Imatta’ Gididi Deˈiyoogaa
‘Imatta’ Gididi Deˈiyoogaa
“Intte ha sa7an imattanne yedettin asasan de7iyaageeta gididoogaadan, . . . asatettaa amuwaappe intte haakkana mala, taani inttena woossais.”—1 PHE. 2:11.
WOYGADA ZAARUUTEE?
Tiyettidaageeti imattadan deˈiyaageeta geetettana danddayiyoy aybissee?
‘Hara dorssati’ imatta geetettiyoy ayba ogiyaanee?
Neeni hidootan naagiyoobay aybee?
1, 2. PHeexiroosi ‘Xoossay dooridoogeeta’ giidoogeeti oonee, qassi i eta ‘imatta’ giidoy aybissee?
YESUUSI saluwaa bi simmin, 30 gidiya layttaappe guyyiyan, kiitettida PHeexiroosi, “Xoossai doorido asatuyyo PHanxxoosa biittan, Galaatiyaa biittan, Qaphphadooqiyaa biittan, Isiyaa biittaaninne Bitiniyaa biittan yedettin laalettidi de7iyaageetuyyo” dabddaabbiyaa xaafiis. (1 PHe. 1:1) PHeexiroosi, Kiristtoosaara saluwan haaranaadan “de7uwaa” hidootaa ekkanau naaˈˈantto yelettida ayyaanan tiyettidaageetussi he dabddaabbiyaa xaafiis. (1 PHeexiroosa 1:3, 4 nabbaba.) SHin, i ha doorettidaageeta “imattanne yedettin asasan de7iyaageeta” giidoy aybissee? (1 PHe. 2:11) Alame yuushuwan deˈiya Yihoowa Markkatuppe ayyaanan tiyettida giyaageeti keehi guutta gididaashin, hegaa nuuni ubbay eranau koyiyoy aybissee?
2 Koyro xeetu layttan deˈida, ayyaanan tiyettidaageeti ‘imatta’ geetettidoogee bessiyaaba. Ayyaanan tiyettidaageetuppe attida ha wodiyan deˈiyaageetuugaadan, etikka saˈan merinau deˈokkona. Ayyaanan tiyettida, ‘amarida dorssa wudiyaa’ yara gidida kiitettida PHauloosi, “Nu biittai saluwaana; nuuni qassi saluwaappe yaana nuna ashshiya Godaa Yesuus Kiristtoosa naagoos” yaagiis. (Luq. 12:32; Pili. 3:20) Eta “biittai saluwaana” gidiyo gishshau, tiyettidaageeti hayqqiyo wode Seexaanay haariyo saˈaa deˈuwaa aggoosona; yaatidi saluwan hayqqenna deˈuwaa demmoosona. (Piliphphisiyuusa 1:21-23 nabbaba.) Eti saˈan deˈiyoy amarida wode xalla gidiyo gishshau, ‘imatta’ geetettana danddayoosona.
3. ‘Hara dorssata’ xeelliyaagan nuuni ay oychana koshshii?
3 ‘Hara dorssati’ shin? (Yoh. 10:16) Geeshsha Maxaafay eti saˈan merinau deˈanaagaa yootees. Yaatin, nuuni etikka imatta mala gaana danddayiyoy aybissee?
‘MERETA UBBAY OOLEES’
4. Deriyaa haariyaageeti teqqana danddayibeennabay aybee?
4 Seexaanaa iita alamee deˈiyo wode ubban, Kiristtaaneta gujjin, ubba asay Seexaanay Yihoowa bolli makkalidoogee kaalettidoban ubbatoo waayettees. Roome 8:22y, “Mereta ubbai issippe hanno gakkanaassi, maccaasa leessoi oiqqin ooliyoogaadan, sahuwan ooliyoogaa nuuni eroos” yaagees. Deriyaa haariyaageeti, saynttisttetinne asaa maaddiyaageeti wozanappe baaxetikkonne, ha metuwaa teqqana danddayokkona.
5. Miilooniyan qoodettiyaageeti 1914ppe haa simmin ay oottidonaa, qassi aybissi?
5 Yaatiyo gishshau, 1914ppe haa simmin, miilooniyan qoodettiya asay Xoossay sunttido Kawuwaa, Kiristtoos Yesuusau ba dosan haarettees. Eti Seexaanau haarettanau koyokkona. Eti Seexaanaa alamiyaara exatokkona. Ubba eti bantta deˈuwan Xoossaa Kawotettaara gayttidabaa oottoosona; qassi bantta aquwaakka hegau goˈettoosona.—Roo. 14:7, 8.
6. Yihoowa Markkati asasan deˈiya asa geetettana danddayiyoy ayba ogiyaanee?
6 Yihoowa Markkati deˈiyo 200ppe dariya biittan higgiyau azazettoosona. SHin, eti awan deˈiyaaba gidikkokka, asasan deˈiya asa mala. Eti bantta deˈiyo biittaa polotikan gelokkona; qassi deretettan deˈiya metuwaa giigissokkona. Eti ha wodiyankka banttana Xoossay giigissiyo, ooratta alamiyaa dere asadan xeelloosona. Eti ha iita alamiyan imatta gididi deˈiyoy guutta wode xallaassa gidiyo gishshau ufayttoosona.
7. Xoossaa ashkkarati merinau deˈanay ayba ogiyaanee, qassi eti merinau deˈanay awaanee?
7 Kiristtoosi mata wode Seexaanaa iita alamiyaa xayssana. Kiristtoosa haaruwan nagaraynne azzanoy muleera xayana. A haaruwan, Yihooway ubbabaa haariyo maataa eqettiya ubbay xayana. Xoossau ammanettidi oottiyaageeti saˈay Gannate gidiyo wode merinau deˈana. (Ajjuutaa 21:1-5 nabbaba.) He wode mereta ubbay muleera “bashshaa ailletettaappe . . . kiyana; qassi he meretati Xoossaa naati ailletettaappe kiyido bonchcho kessaa shaakkana.”—Roo. 8:21.
TUMU KIRISTTAANETI WAANANA KOSHSHII?
8, 9. PHeexiroosi ‘asatettaa amuwaappe haakkanaadan’ yootidoogee woygiyoogaakko qonccissa.
8 PHeexiroosi, Kiristtaanetuppe koyettiyaabaa hagaadan giis: “Ta dabbotoo, intte ha sa7an imattanne yedettin asasan de7iyaageeta gididoogaadan, ubba wode intte shemppuwaara olettiya asatettaa amuwaappe intte haakkana mala, taani inttena woossais.” (1 PHe. 2:11) I he zoriyaa immidoy tiyettida Kiristtaanetussa gidikkonne, Yesuusa hara dorssatikka he zoriyaa kaallana koshshees.
9 Nuuni amottiyo issi issibaa, Medhidaagee kessido maaran polikko, hegee bala gidenna. Hegee deˈuwan ufayttanaadan maaddiyaaba. Leemisuwau, miyoogan, uyiyoogan, minttettiya oosuwaa oottiyoogaaninne haratuura loˈˈo wodiyaa aattiyoogan ufayttiyoogee nuuni amottiyoobaappe loˈˈoba. Aqo laggiyaara poliyo asho gaytotettan ufayttanau koyiyoogeekka bessiyaaba. (1 Qor. 7:3-5) SHin, PHeexiroosi ‘asatettaa amuwaa’ giidoogeeta ‘shemppuwaara olettiya’ amuwaa xallaara gattidoogee bessiyaaba. Hegee bala gidida asatettaa amo. Issi issi Geeshsha Maxaafaa birshettati hegaa “ashuwaa amuwaa” (King Jemis Vershin) woy “nagaraa amuwaa” (Niwu Intternaashinaal Vershin) goosona. Xoossaa sheniyaara maayettenna, qassi Xoossaara deˈiya dabbotaa moorana danddayiya asatettaa amoy wolqqaamennaadan teqqana bessees. Nu asatettaa amuwaa bala ogiyan poliyaaba gidikko, hayqqana danddayoos.
10. Seexaanay Kiristtaaneti ha alamiyaa bagga gidanaadan paacciyo issi issi ogeti awugeetee?
10 Seexaanay tumu Kiristtaaneti ha alamiyan ‘imattadan’ deˈiyaageeta gidiyoogaa ubbatoo qoppennaadan oottanau halchiis. I nuuni aquwaabau bichaaranaadan, shori baynnabaa oottanaadan, nu huuphiyaa xoqqu oottidi xeellanaadan, ubbabau yaaretanaadaaninne nu biittan ceeqettiyaageeta gidanaadan koyees. Ha ubba amoy Seexaanaa pire gidiyoogaa nuuni akeekana koshshees. Nuuni ha iita asatettaa amuwaappe haakkanau murttiyoogee, Seexaanaa iita alamiyaa bagga gidanau koyennaagaa bessees. Yaatiyoogan, nuuni hagan deˈiyoy ‘imattadaana’ gidiyoogaa bessoos. Nuuni tumuppe koyiyoynne baaxetiyoy xillotettay deˈiyo Xoossaa ooratta alamiyan merinau deˈanaassa.
LOˈˈO EESHSHAA
11, 12. Allaga biittaa asaa issi issitoo asay waati xeellii, qassi issi issi asay Yihoowa Markkata xeelliyaagan ay qoppii?
11 PHeexiroosi ‘imatta’ gididi deˈiyaageetuppe koyettiyaabaa paydo 12nkka hagaadan giis: “Aihuda gidenna asai inttena iitabaa oottiyaageetudan zigiriyo wode, Kiristtoosi yiyo gallassi intte lo77o oosuwaa eti akeekidi, Xoossaa galatana mala, intte de7uwaa eta giddon loitti naagite.” Imattati allaga biittan woy bantta biitta gidennasan deˈoosona. Imattati heeran deˈiya asaappe dummatiyo gishshau, asay eta amassalees, qassi issi issi asay eta iita asadan xeellees. Eta haasayay, eti oottiyoobay, eta maayoy, ubba qassi eta meray heeran deˈiya asaagaappe dummatana danddayees. SHin eti eeshshan loˈˈo gidiyoogee, eti iita gidennaagaa hara asay akeekanaadan oottana danddayees.
12 Hegaadankka, tumu Kiristtaaneti haasayan, woy wodiyaa aattanau dooriyoobaa malaban bantta shooron deˈiya daro asaappe dummatoosona. Darotoo, eti maayiyoobaaninne alleeqettiyooban heeran deˈiya daro asaappe eta shaakki erana danddayettees. Eti haratuppe dumma gidiyo gishshau, issi issi asay iitabaa oottida asadan eta ‘zigirees.’ SHin, eta maara deˈuwaa gishshau, harati eta galatana danddayoosona.
13, 14. “Aadhdhida eratettai ba oosuwan” tuma gididi beettidoy ayba ogiyaanee? Leemisuwaa yoota.
13 Nu loˈˈo eeshshay, nuna ‘zigiriyo’ gaasoy baynnaagaa asay akeekanaadan maaddana danddayees. Xoossau polo azazettida asi Yesuusa xalla. SHin asay akka wordduwan mootiis. Issoti issoti a “ha yoraanne woine eessaa uyiyaagaa be7ite; giiraa ekkiyaageetuuranne nagaranchchatuura siiqettees” yaagidosona. SHin, i hegaa mala asa gidennaagaa ba loˈˈo eeshshan bessiis. Yesuusi, “Aadhdhida eratettai ba oosuwan tuma gididi beettees” yaagiis. (Maa. 11:19) Hegee ha wodiyankka tuma. Leemisuwau, Jarmanen, Seltters giyo sohuwan deˈiya Beeteelen oottiya ishanttanne michontta shooron deˈiya issi issi asay asakko shiiqennabadan xeellees. SHin he katamaa ayssiyaagee etau exatidi, “Yan oottiya Yihoowa Markkatu deˈuwaa hanotay haratuugaappe dummatees; shin hegee heeran deˈiya asaa hirggissiyaaba gidenna” yaagiis.
14 Eraashiyaa biittan Moskko kataman deˈiya Yihoowa Markkatuura gayttidaagan mata wode kuuyettidabaykka hegaara issi mala. Asay eta daroban wordduwan mootiis. SHin, Tamme 2010n, Paransaaye biittan Isttrasbur giyo kataman deˈiya, Awurooppan Asaa Maataa Pirdda Keettay, Moskko katamay yan deˈiya Yihoowa Markkatu goynuwan kelttiyaa gelidi eti shiiquwaa shiiqennaadan diggidoogee bessennaba gidiyoogaa akeekidoogaa yootiis. Awurooppan Asaa Maataa Pirdda Keettay, Yihoowa Markkati moorobaa oottidosona gaanau Raashiyaa pirdda keettati naqaasha demmibeennaagaa yootiis. He pirdda keettay Yihoowa Markkatu bolli bessennabaa oottanau, Moskko pirdda keettati yaa haa qaattenna bantta higgiyaa goˈettidoogaa yootiis.
BESSIYAAGAADAN HAARETTIYOOGAA
15. Alame yuushuwan deˈiya tumu Kiristtaaneti kaalliyo Geeshsha Maxaafaa maaray awugee?
15 Moskkon deˈiya Yihoowa Markkati, ubba alame yuushuwan deˈiyaageetikka, PHeexiroosi Kiristtaanetuppe koyettiyaabaa yootido harabaakka poloosona. I, “Godaa gishshau, asa higge ubbaayyo haarettite; kawoikka ubbaappe bolla gidiyo gishshau, ayyo haarettite. Qassi deriyaa haariyaageetuyyookka haarettite” yaagiis. (1 PHe. 2:13, 14) Nuuni ha iita alamiyaa bagga gidokko. SHin, PHauloosi yootidoogaadan tumu Kiristtaaneti deriyaa heemmiyaageetu higgee Xoossaa higgiyaara palqqettennaba gidikko, azazettoosona.—Roome 13:1, 5-7 nabbaba.
16, 17. (a) Nuuni kawotettaa eqettennaagaa bessiyay aybee? (b) Deriyaa heemmiya issoti issoti woygidonaa?
16 Yihoowa Markkati ha alamiyan imatta gididi deˈoosona; shin eti hegaadan deˈiyoy kawotettaa eqettanau woy hara asaa toochanau koyiyo gishshataassa gidenna. Polotikaara woy deretettaa deˈuwaara gayttidaagan harati kuuyiyoobaa Yihoowa Markkati eqettokkona woy hegan kelttiyaa gelokkona. Issi issi haymaanooteti polotikan kelttiyaa geloosona; shin Yihoowa Markkati gelokkona. Eti haariyaageeti asaa ayssiyo maaraa laammanaadan oottanau mule malokkona. Yihoowa Markkati kawuwaa bolli denddanau woy harati denddanaadan oottanau mule koyokkona!
17 PHeexiroosi, “Kawo bonchchite” giidi zoridoogaara maayettiya ogiyan eti deriyaa ayssanau sunttettidaageetuyyo azazettiyoogan he asata bessiyaagaadan bonchoosona. (1 PHe. 2:17) Deriyaa heemmiyaageeti issi issitoo, Yihoowa Markkati asaa hirggissiyaabaa oottoosona giidi qoppanaadan oottiyaabi baynnaagaa yootoosona. Leemisuwau, Jarmane biittan Branddenberggen kase kaabiniyaa ministtire, guyyeppe qassi Jarmane parllaamaa yara gidida SHitefan Raykee Naazeti eta yedettido wode, Yihoowa Markkati loˈˈo eeshshay deˈiyoogeeta gididoogaa yootiis. Yihoowa Markkati yedetettiiddikka bantta ammanuwaa laammibookkona; qassi banttanaara issippe qashettidaageeta kehatettan oyqqidosona. I issi issi asay hara biittappe yiida, woykko polotikan woy haymaanootiyan banttaagaappe dummatiya qofay deˈiyo asatussi iiti iiti biyo gishshau, he eeshshay Jarmane mala biittau keehi maaddiyaaba gidiyoogaa yootiis.
SIIQIYOOGAA
18. (a) Ishantta ubbaa siiqiyoogee nuussi meeze gididoy aybissee? (b) Yihoowa Markka gidenna amarida asati ay akeekidonaa?
18 Kiitettida PHeexiroosi, “Intte ishantta siiqite. Xoossau yayyite” yaagiis. (1 PHe. 2:17) Yihoowa Markkati Xoossau yayyoosona; giishin, a azzanttiyaabaa oottenna mala yayyoosona. Eti Xoossaa hegaadan bonchiyoogee a sheniyaa oottanau koyanaadan denttettees. Eti banttaagaa mala koshshay deˈiyo, alame yuushuwan deˈiya ishanttuuranne michonttuura Yihoowau ufayssan oottoosona. Yaatiyo gishshau, alame yuushuwan deˈiya “ishantta” ubbaa siiqiyoogee etayyo meeze gididaba. Asay ba xallaa siiqiyo ha alamiyan meeze gidenna ha siiquwan, Yihoowa Markka gidenna asati issi issitoo garamettoosona. Leemisuwau, asay manddariyo wode maaddiya Amarkka dirijjitiyan imatta asaa heeraa bessiyaara, Jarmane biittan 2009n daro biittappe yiidaageeti shiiqido awuraajjaa shiiquwan Yihoowa Markkati kare biittaappe yiidaageeta maaddiyoogaanne siiqiyoogaa beˈada garamettaasu. A heeraa bessiyaaro gidada oottido wode ubban, hegaa malabaa mule beˈa erennaagaa yootaasu. Guyyeppe, issi Yihoowa Markkay, “A nubaa ubbabaa keehi garamettaydda yootaasu” yaagiis. Neeni shiiqido awuraajjaa shiiquwan Yihoowa Markkatubaa akeekidi asi hegaadan gin siyadii?
19. Nuuni ay oottanau murttana koshshii, qassi aybissi?
19 Qommoora beˈido ogetuuninne haratun, Yihoowa Markkati Seexaanaa alamiyan tumuppe ‘imatta’ gidiyoogaa bessoosona. Eti ubbatoo hegaadan deˈanau murttidosona. Xoossay giigissido, geeshshatettay kumido ooratta alamiyan mata wode merinau deˈanau eti hidootiyoogee bessiyaaba. Neeni he ooratta alamiyan deˈanau amottay?
[Oyshata]
[Sinttaa 23n deʼiya misiliyaa qonccissuwaa]
Nuuni Seexaanaa alamiyaa kaafokko
[Sinttaa 23n deʼiya misiliyaa qonccissuwaa]
Nuuni Xoossay ehaana ooratta alamiyaabaa yootoos
[Sinttaa 25n deʼiya misiliyaa qonccissuwaa]
Geeshsha Maxaafaa tumay Eraashiyaa biittan deˈiya ha so asay issippe ufayttidi deˈanaadan maaddiis
