‘Imattati’ Issippetettan Tumu Goynuwaa Goynnoosona

“Imattatikka intte gadiyaa goyananne intte woiniyaa turaa naagiyaageeta gidana. Intte qassi, ‘GODAA qeeseta’ geetettidi xeesettana.”—ISI. 61:5, 6.

WOYGADA ZAARUUTEE?

Issi issi asay allaga biittaa asaa waati xeellii, qassi Geeshsha Maxaafay hegaabaa ay tamaarissii?

Ubba biittan deˈiya asay ay oottanaadan shoobettiiddi deˈii?

Yihoowa Markkatu giddon allaga biittaa asi baynnay ayba ogiyaanee?

1. Issi issi asay allaga biittaa asaa waati xeellii, shin hegee likke gidennay aybissee?

 HAGAAPPE kasetiya huuphe yohuwan beˈidoogaadan, allaga biittaa asa woy ‘imatta’ giya qaalaa, issi issi biittan asay he asaa kariyoogaanne ixxiyoogaa bessanau goˈettees. Issi uri ba biittaa asay allaga biittaa asaappe aadhiyaabadan qoppiyoogee he biittaa asaa bonchennaagaa bessiyaaba. Hegaa bollikka, hegaa mala xeelay tuma gididabaa ekkennaagaa bessiyaaba. Asaa Naatu Zariyaa giya xuufee, asaa naatu zare geetettiya ubbay Geeshsha Maxaafay tamaarissiyoogaadan ishantta gidiyoogaa yootees. Ishantti issoy issuwaappe darotoo dummatikkonne, eti ishantta.

2, 3. Imattatuura gayttidaagan Yihoowa xeelay aybee?

² Nuuni awan deˈiyaaba gidikkonne, allaga biittaa asay nu giddon deˈees. Higgiyaa maachaa Xoossaa Yihoowaara maacettidi aara dumma dabbotan deˈida, beni Israaˈeelatu hanotaykka hegaa mala. Israaˈeelati bantta giddon deˈiya allaga biittaa asaa maatay he keena gidikkonne, eta zaggana koshshenna, qassi bonchana bessees. Hegee nuuni kaallana koshshiyo loˈˈo leemiso. Tumu Kiristtaaneti asa asappe shaakkana, woy hara ura gaasoy baynnan ixxana bessenna. Aybissi? Kiitettida PHeexiroosi, “Xoossai asa som77o xeellenna; shin dere ubban baassi yayyiyaagaanne xillo ooso oottiyaagaa galatiyoogaa taani tumu akeekaas” yaagiis.—Oos. 10:34, 35.

³ Beni Israaˈeela biittan deˈiya imatta asati he biittaa asaara issippe deˈiyoogan goˈettidosona. Hegee Yihoowa qofaara maayettiyaaba. Hegaa xeelliyaagan kiitettida PHauloosi daro layttappe guyyiyan Yihoowabaa, “Xoossai Aihudatu xalaalau Xoossee? Aihuda gidenna asau Xoossaa gidennee? Tuma, Aihuda  gidennaageetuyyookka i qassi Xoossaa” yaagiis.—Roo. 3:29; Yuu. 2:32.

4. Xoossaa Israaˈeela” giddon imatti baawa gaana danddayiyoy aybissee?

⁴ Xoossay tiyettida Kiristtaanetu gubaaˈiyaara ooratta maachaa maacetti simmin, Israaˈeela deriyaanne Yihoowa giddon deˈiya dumma dabbotay duuxxiis. Yaatiyo gishshau, tiyettida Kiristtaanetu gubaaˈee “Xoossaa Israaˈeela” gidiis. (Gal. 6:16, NW) PHauloosi yootidoogaadan, ha ooratta deriyan “Giriike asa woi Aihuda asa, qaxxarettidaagaa woi qaxxarettibeennaagaa, ammanoi bainnaageetanne ainne tamaaribeennaagaa, aille woi goqa giidi shaakkiyoobi baawa; Kiristtoosi ubbabaa; i ubbankka de7ees.” (Qol. 3:11) Yaatiyo gishshau, Kiristtaane gubaaˈiyan oonanne imattadan xeellokko.

5, 6. (a) Isiyaasa 61:5, 6⁠ra gayttidaagan denddiya oyshay aybee? (b) Isiyaasi, “GODAA qeeseta” giidoogeeti oonee, ‘imattata’ giidoogeeti shin? (c) ‘Godaa qeesetinne’ ‘imattati’ issippe oottiyoy ayba ogiyaanee?

⁵ SHin issi uri Kiristtaane gubaaˈiyan polettiiddi deˈiya hiraagay deˈiyo Isiyaasa shemppo 61 woygiyoogaakko qoppana danddayees. Paydo 6y “GODAA qeeseta” gididi oottanaageetubaa yootees. SHin, paydo 5y ‘qeesetuura’ hashetana ‘imattatubaa’ yootees. Hegaa ayba ogiyan akeekana danddayiyoo?

⁶ “GODAA qeeseta” geetettida he asati “koiro dendduwan” denddana tiyettida Kiristtaaneta gidiyoogaa eroos: qassi “eti Xoossaassinne Kiristtoosassi qeeseta gidana; eti aara issippe sha7u laittau haarana.” (Ajj. 20:6) Saˈan deˈanau hidootiya, ammanettida daro Kiristtaanetikka deˈoosona. Ha asati saluwan Xoossau oottanaageetuura hashetiyaabanne laggettiyaaba gidikkonne, leemiso hanotan imatta. Eti “GODAA qeeseta” ufayssan maaddoosona; qassi leemiso hanotan eta ‘gadiyaa goyiyoogaaninne eta woyniyaa turaa naagiyoogan,’ kattaa shiishshiyoogan etaara issippe oottoosona. Eti sabbakiyoogaaninne asaa tumaa tamaarissiyoogan tiyettidaageeti Xoossaa bonchissanaadan maaddoosona. Tiyettidaageetikka “hara dorssatikka” Xoossau merinau oottanau koyiya ashkke asata koyi demmidi tamaarisoosona.—Yoh. 10:16.

 ABRAHAAMADAN ‘IMATTA’ GIDIDI DEˈIYAAGEETA

7. Ha wodiyan deˈiya Kiristtaaneti Abrahaamanne beni wode deˈida ammanettida asatu mala gididoy ayba ogiyaanee?

⁷ Hagaappe kasetiya huuphe yohuwan beˈidoogaadan, tumu Kiristtaaneti Seexaanaa iita alamiyan allaga biittaa asa mala woy imatta. Eti hegaadan deˈiyoogan, “sa7an imattanne yedetettidi kiyida asata” geetettida, beni wode deˈida Abrahaamanne hara ammanettida asatu mala. (Ibr. 11:13) Nu hidootay ayba gidikkonne, Abrahaamaagaadan Yihoowaara dabbotiyo maatay nuuyyo deˈees. Yaaqoobi, “‘Abrahaami Xoossaa ammaniis. Xoossaikka hegaa ayyo xillotettan qoodiis’ giidoogee polettiis; qassi Xoossaa dabbo geetettidi i xeesettiis” yaagiis.—Yaaq. 2:23.

8. Yihooway Abrahaamassi ay oottanau qaalaa gelidee? Qaalaa gelidobaa xeelliyaagan Abrahaami ay qoppidee?

⁸ Xoossay issi dere asa xalla gidennan, saˈaa asa ubbay Abrahaamanne a zerettaa bagaara anjjettanaagaa yootiis. (Doomettaabaa 22:15-18 nabbaba.) Xoossay ehaana giido he anjjoy polettanay daro wodiyaappe guyyiyaana gidikkonne, Abrahaami hegee polettanaagaa ubbatoo ammanettiis. Abrahaami ba deˈo layttaappe dariya baggaa ba soo asaara dumma dummasan toylattiiddi deˈiis. Abrahaami bau Yihoowaara deˈiya dabbotaa muletoo minttidi deˈiis.

9, 10. (a) Nuuni Abrahaama leemisuwaa ayba ogiyan kaallana danddayiyoo? (b) Nuuni yootiyo kiitay aybee?

⁹ Abrahaami Xoossay yootido hidootay polettanaashin ay keena wodiyaa naaganaakko erana xayikkonne, i Xoossaa siiqiyoogaanne au aqidaagaa gididi deˈiyoogaa aggibeenna. Abrahaami imatta gidiyoogaa ubbatoo hassayido gishshau, issi biittan muletoo deˈiya uri deˈana bessees giidi asay qoppiyoogaa mala deˈo deˈibeenna. (Ibr. 11:14, 15) Nuuni aquwaabaa, sunttatettaabaa woy oosuwaabaa keehi qoppennan aggiyoogan, Abrahaama leemisuwaa kaallidi sima deˈuwaa deˈiyoogee eratetta! Matan xayana alamiyan injje giyo deˈo deˈanau bichaariyoogee bessiyaabee? Xayiya alamiyaa siiqana koshshii? Nuunikka Abrahaamaagaadan, ha alamiyan deˈiyaabaappe keehi aadhiyaabaa hidootan naagoos. Nu hidootay polettana gakkanaassi danddayan naagoos.—Roome 8:25 nabbaba.

¹⁰ Yihooway ubba biittaa asay Abrahaama zerettaa baggaara anjjettanaadan haˈˈikka shoobbiiddi deˈees. Qassi ayyaanan tiyettida ‘GODAA qeesetikka’ hara dorssa gidida “imattatikka” ha kiitaa alame yuushuwan 600ppe dariya doonan yootiiddi deˈoosona.

UBBA BIITTAA ASAA SIIQA

11. Solomoni Israaˈeela asa gidennaageeti ay oottanaadan shoobbidee?

¹¹ Solomoni 1026n K.K. beeta maqidasiyaa anjjissiyo wode, nuuni Yihooway ubba biittaa asaa xeelliyo ogiyaa akeekanaadan maaddiyaabaa woosan yootiis. Solomoni ubba deriyaa asay beeta maqidasiyaakko simmidi woossiyo wode Yihooway siyanaadan oychiis. Hegee Yihooway Abrahaamassi gelido qaalan eti goˈettana danddayiyo oge. Solomoni hagaadan giis: “Ne asaa Israa7eela gidenna kare biittaa asi ne gita sunttaabaanne neeni ne asaayyo oottido maalaalissiya oosotubaa siyidi, haaho biittaappe yiidi, ha Beeta Maqidasiyaakko simmidi, nena woossikko, neeni de7iyoosan saluwan siya. Ne asati Israa7eelati eriyoogaadan, sa7an de7iya asai ubbai ne sunttaa erana malanne neeyyo yayyana mala, . . . he kare biittaa asi  nena woossiyoobaa ayyo pola.”—1 Kaw. 8:41-43.

12. Yihoowa Markkati bantta deˈiyo biittan asasaa asa mala gididoy aybissee?

¹² Asasaa asi ba biitta gidennasaa beˈanau biida asa woy yan deˈiya asa. Yihoowa Markkati asasaa asa mala. Eti alame yuushuwan daro biittan deˈiyaaba gidikkonne, saluwan deˈiya Xoossaa Kawotettaunne he Kawotettaa Kawuwaa, Yesuus Kiristtoosau exatoosona. Hara asay eti polotikan gelana koshshees giidi qoppiyaaba gidikkonne, eti deˈiyoosa ubban polotikan gelokkona.

13. (a) Nuuni issi uraa asasaa asadan xeellennan aggana danddayiyoy ayba ogiyaanee? (b) Asaa asasaa asadan xeelliyoogee Yihooway koyro halchidobee? Qonccissa.

¹³ Harata eta haasayan, eta wogan, eta meran woy ubba eta maayuwan eti hara biitta asa gidiyoogaa issi issitoo akeekana danddayettees. SHin, ubba dere asaa issi mala oottiyaabay eta dummayiyaabaappe aadhees. Hegaa gishshau, asay issi ura asasaa asadan xeelliyoy i issi issiban dummatiyo gishshataassa. Issi uri nuuppe dummatiyoobaa nuuni qoppiyoogaa aggikko, a asasaa asadan xeellennan aggana danddayoos. Saˈan deˈiya asa ubbay issi biitta asa gidiyaakko, ooninne asa biittaa asa geetettenna. Qassi Yihooway asaa naati ubbay issi aysuwan, giishin ba aysuwan issi keettaa asa gidanaadan koyro halchiis. Ha wodiyan kumetta saˈan deˈiya asau hegaa malabay hananee?

14, 15. Yihoowa Markkatu citay akeekidobay aybee?

¹⁴ Nuuni deˈiyo alamiyan daro asay ba biittay hara biittaappe aadhees giidi qoppeesinne yaaretees. SHin, ubba biittaa asaa siiqiya amaridaageeti deˈiyoogaa eriyoogee ufayssiyaaba. Asa coo ixxiyoogaa aggiyoogee metana danddayees. Issi erettida televizhiine xaabiyaa essida bitanee dumma dumma biittaappe yiida gooba asatuura oottiis. I, hara biittaappe yiidaageeta asasaa asadan gidennan, ba biittaa asadan, giishin kumetta saˈan deˈiya asaa issi biitta asadan xeelliyoogaa yootiis. I ba oosanchati “kare biitta” giidi haasayennaadan dambbiyaa kessiis. Eti hegaadan giyoogaappe “alame yuushuwaa” gaana koshshees.

¹⁵ Kumetta saˈan deˈiya biittatun, Xoossaa qofaa qoppiyay Yihoowa Markkatu citaa xalla. Eti asaa Yihoowagaadan xeelliyoogaa tamaarido gishshau, hara asaa xeelliyo ogiyaanne etabaa qoppiyo ogiyaa laammidosona. Eti hara biittaappe yiya asaa ixxokkona woy asasaa asi ammanettenna giidi qoppokkona. Asay dumma dumma gidiyoogeenne  dumma dummabaa oottiyoogee eta ufayssees. Asay oottiyo dumma dummabaanne hegee nena waati goˈˈidaakko qoppa eray?

ALLAGA BIITTAA ASI BAYNNA ALAMIYAA

16, 17. Ajjuutaa 16:16⁠ynne Daaneela 2:44y polettiyo wode, ne deˈoy ay mala gidanee?

¹⁶ Ha wodiyan deˈiya kawotettati ubbay mata wode Xoossaa haaruwaa eqettidi Yesuus Kiristtoosaaranne i kaalettiyo saluwaa olanchatuura olettana; he olay “Ibraisxxe qaalan Armmageedoona” geetettees. (Ajj. 16:14, 16; 19:11-16) Hananabaa yootiya Daaneeli 2,500ppe dariya layttaappe kase, Xoossaa halchuwaa eqettiya asaa naatu kawotettata gakkanabaa ayyaanay denttettin hagaadan giis: “He kawotu laittan, saluwaa Xoossai mulekka kunddenna, hara asaukka imettenna kawotettaa essana. He eqqida kawotettai he kawotettata ubbaa gaaceretti xaissana; shin i merinau eqqidi daana.”—Dane. 2:44.

¹⁷ Hegee polettiyo wode neeni demmanabaa qoppana danddayay? Ha wodiyan alamee a zaway zaway deˈiyo dumma dumma biittan shaahettido gishshau, nuuni ubbay allaga biittaa asa geetettana danddayoos. SHin Armmageedoonappe simmin, he zaway deˈenna. Asay he wodekka issoy issuwaappe dummatiyaaba gidikkonne, hegee Xoossay medhido maalaalissiya dumma dummabaa qonccissees. He ufayssiya hidootay nuna Medhida Xoossaa, Yihoowa ubbatoo sabbanaunne bonchanau nuuyyo danddayettida ubbabaa oottanaadan denttettana koshshees.

18. Yihoowa Markkati issoy issuwaa allaga biittaa asadan xeellennaagaa bessiya leemisoy aybee?

¹⁸ Alame yuushuwan deˈiya asay hara asaa allaga biittaa asadan xeelliyoogaa tumu agganee? Hegee hananaagaa ammanana danddayoos. Yihoowa Markkati ha wodiyankka harata allaga biittaa asadan xeellokkona. Leemisuwau, amarida guutta macara biirotun oosettiya oosoy mata wode hara biittan deˈiya macara biirotussi imettiis. Hegaadan oottidoy danddayettida oge ubban mishiraachuwaa metootennan asau yootanaassa. (Maa. 24:14) Issi biittaa higgee azazana xayikko, hegaa kuuyiyoy he biittaa zawaa qoppidi gidenna. Xoossaa Kawotettau Kawo gidida Yesuus Kiristtoosi Yihoowa Markkati biittaa zawaadan zawaadan shaahettenna mala maaddiiddi deˈees. Matan, i muleera ‘xooniyo’ wode biittatu zawaa ubbaa xayssana!—Ajj. 6:2.

19. Geeshsha gidida tumaa qaalay aybi hananaadan oottidee?

¹⁹ Yihoowa Markkati daro biittan deˈoosona; qassi dumma dumma qaalaa haasayoosona. SHin, tumay eta giddon issippetettay deˈanaadan oottido gishshau, eti mule shaahettokkona. (Sofonaasa 3:9 nabbaba.) Eti alame yuushuwan deˈiya issi keettaa asa mala. Eti ha wodiyan iita alamiyan deˈiyaaba gidikkonne, ha alamiyaa bagga gidokkona. Eti issi keettaa asadan issippetettan deˈiyoogee ooratta alamiyan allaga biittaa asi deˈennaagaa qonccissees. He wode saˈan deˈiya asa ubbay zare ubbaappenne biitta ubbaappe yiidaageeta ishadan xeellana.

[Oyshata]

[Sinttaa 31n deʼiya misiliyaa qonccissuwaa]

Asi wottido zawi baynna, qassi allaga biittaa asa giyoogee attiyo wodiyaa hidootan naagay?

[Sinttaa 28n deʼiya misiliyaa qonccissuwaa]

Abrahaamaagaadan Xoossay ehaanau qaalaa gelidobay polettiyo wodiyaa ubbatoo qoppay?

[Sinttaa 30n deʼiya misiliyaa qonccissuwaa]

Yihoowa xeelan etappe ooninne allaga biittaa asa gidenna