Oyshaa 2: Taani Hayqqiyo Wode Waaniyaanaa?
KAAMIYAN daafabay gakkin a mata laggee hayqqiyo wode, Roomani guutta naˈa. I, “Ta laggee hayqqin taani keehi mishettaas. He daafabay gakki simmin, nuuni hayqqiyo wode waaniyaakko daro layttau qoppaas” yaagiis.
He oyshaa oychiyoogee bessiyaaba gididoy aybissee?
Asay hayqqiyoogee meretan deˈiyaabaa milatenna. Nu layttay ay keena gidikkokka, hayqqanau koyokko. Daroti hayqqi simmidi waananaakko hirggoosona.
Issoti issoti he oyshaa zaaruwaa woygiyoonaa?
Daroti issi uri hayqqiyo wode, appe shaahettidi paxa deˈiyaabi deˈees giidi ammanoosona. Eti loˈˈo asati saluwan woytuwaa demmoosona, qassi iita asati bantta nagaraa gishshau merinau qaxxayettoosona giidi ammanoosona. Harati qassi issi uri hayqqiyo wode paxa deˈenna, qassi wurssettan i muleera dogettees yaagidi qoppoosona.
He zaaroy ay qonccissii?
Koyro zaaroy issi uri hayqqiyo wode i tumuppe hayqqennaagaa qonccissees. Naaˈˈanttoogee qassi deˈuwau halchidobi baynnaagaa bessees. Deˈuwau halchidobi baawa giidi qoppiya asay, “Simmi moosinne uyoos; aissi giikko, nuuni wontto haiqqana” giidi qoppana danddayees.—1 Qor. 15:32.
Geeshsha Maxaafay ay tamaarissii?
Geeshsha Maxaafay issi uri hayqqiyo wode, appe shaahettidi paxa deˈiyaabi deˈees giidi tamaarissenna. Kawuwaa Solomoni, “Paxa de7iya asati issitoo haiqqanau de7iyoogaa eroosona; shin haiqqidaageeti aibanne erokkona” yaagidi xaafanaadan Xoossay ba ayyaanan denttettiis. (Era. 9:5) ‘Aybanne erennaageeti’ bantta yuushuwan hanettiyaabaa mule akeekokkona. Eti aynne qoppana woy oottana danddayokkona. Yaatiyo gishshau, hayqqidaageeti paxa deˈiyaageeta maaddana woy qohana danddayokkona.
Daroti qoppiyoogaappe dumma hanotan, Xoossay asaa naati hayqqanaadan halchibeenna. I koyro bitanee Addaamee saˈan merinau deˈanaadan medhiis. Azazettennan ixxikko qaxxayanabaa Addaameyyo odido wode xallan, Xoossay hayquwaabaa yootiis. I Addaamee issi mittaa ayfiyaa meenna mala odiis; qassi hegaappe miyaaba gidikko, neeni “tumu haiqqana yaagidi” Addaameyyo yootiis. (Doo. 2:17) Addaameenne Hewaana Xoossau azazettidi deˈiyaakko, etinne Xoossau ammanettida eta zeretta ubbay saˈan merinau deˈana shin.
Addaamee Xoossay yootidobaa siyibeenna. I Xoossau azazettennan ixxido wode nagaraa oottiis; yaatidi hayqqiis. (Roo. 6:23) Addaamee hayqqido wode appe shaahettidi paxa deˈiyaabi baynna gishshau, i mule deˈuwan deˈenna. Xoossay Addaamessi hagaadan giis: “Neeni biittau simmana gakkanaassi, daafuran ne som77oi cawattin oottido ne qumaa maana; aissi giikko, neeni biittaappe ekettadasa; neeni baana; neeni baanau simmana.” (Doo. 3:19) Asaa naati ubbay Addaame gulbbataappe yelettido gishshau, nuuni nagaraanne hayquwaa appe laattida.—Roo. 5:12.
Addaamee azazettennan ixxikkonne, a zareti saˈaa kumanaadan Xoossay halchido ba halchuwaa polana. (Doo. 1:28; Isi. 55:11) Mata wode, Yihooway hayqqida asaappe daruwaa hayquwaappe denttana. He wodiyaabaa, kiitettida PHauloosi, “Asai ubbai, worddoikka xilloikka haiquwaappe denddana” yaagiis.—Oos. 24:15.
Qommoora abay odettido Roomani, Geeshsha Maxaafaa xannaˈiis; qassi hayquwaabaanne Yihoowabaa Geeshsha Maxaafay tamaarissiyoobaa eriis. I eridobay a keehi maaddiis.
