IYANA aaway keehi daro uyiya asa. Iyani asatettan bau koshshiyaabay kumin diccidaba gidikkonne, ba aawaappe koyiyo siiquwaanne hegaa malabaa demmibeenna. Iyani, “I keehi uyiyoogaappenne ta aayyiyo oyqqiyo ogiyaappe denddidaagan, a darin siiqikke” yaagiis. Iyani gitaa gididi, Xoossay deˈiyoogaa siriyoogaa doommiis. Taani, “‘Xoossay deˈiyaaba gidikko, asay tuggatanaadan aybissi paqqadii?’” gaada qoppaas.

Nena daro waayissiyaabi deˈana xayikkonne, xillo asi waayettiyoogaa beˈiyo wode mishettana danddayaasa. SHin, Iyanaagaadan nena metoy gakkikko, woy neeni siiqiyo uri sakettikko woy hayqqikko, waayettiyoogaara gayttidabay nena keehi qofissiyaaba.

Xoossay nuuni nu huuphiyaa kaushshiyaageetanne qarettiyaageeta gidanaadan tamaarissanau nu bolli metoy gakkanaadan paqqadees giidi issoti issoti ammanoosona. Harati asay haˈˈi ba deˈuwan waayettiyoy yelettanaappe kase deˈido deˈuwan oottido nagaraa gaasuwaana giidi qoppoosona.

Xoossay asaa naatussi qoppenna gishshau, a siiqiyoogee metiyaaba. Xoossay meqetta iita.

Asaa naatu metuwau Xoossaa amassalana koshshennaagaa Geeshsha Maxaafay geeshshidi yootees. “Ooninne paacettido wode, ‘Tana Xoossai paaccees’ gooppo. Aissi giikko, Xoossai iitan paacettanau danddayenna; qassi i ba huuphen oonanne paaccenna.” (Yaaq. 1:13) Asaa naata gakkiya waayiyau Xoossaa amassaliyoogee Geeshsha Maxaafay Xoossaa eeshshaabaa yootiyoobaara maayettenna. Hegaadan giyoy aybissee?

Siiqoy Xoossaa waanna eeshshatuppe issuwaa. (1 Yoh. 4:8) Hegaa loytti qonccissanau, Geeshsha Maxaafay Xoossay xanttiya aayeedan qarettiyoogaa yootees. Xoossay, “Aayyiyaa ba xanttiyo na7aa doganau danddayaiyye? Ba uluwaappe yelido na7au qarettekkeeyye?  Geelladan a dogiyaakkokka, taani nena dogikke!” yaagees. (Isi. 49:15) Siiqiya aayyiyaa ba naˈaa eraydda qohawusu gaada qoppay? Ba naˈaa siiqiya uri a qohiyoogaappe, i metuwaappe shemppanaadan oottanau baaxetees. Hegaadankka, Xoossay xillo asay metootanaadan oottenna.—Doo. 18:25.

Yaatikkonne, xillo asay waayettiiddi deˈees. Neeni, ‘Xoossay nuussi qoppiyaabanne ubbaa danddayiyaaba gidikko, asay waayettanaadan oottiyaabaa ayssi xayssennee?’ gaada qoppana danddayaasa.

Xoossay ha wodiyankka metoy gakkanaadan paqqadido gaasoy deˈees. Ane hegeetuppe issuwaa qoppa: Darotoo hara asay waayettanaadan oottiyay asaa. Hara asaa gamiyaanne naaqqiya daroti bantta eeshshaa laammanau koyokkona. Yaatiyo gishshau, Xoossay waayiyau waanna gaasuwaa xayssanau, hegaa mala asaa xayssana.

Xoossay iitabaa oottiya asata hanno gakkanau xayssibeennay aybissakko, kiitettida PHeexiroosi hagaadan giis: “Issooti issooti qoppiyoogaadan, Godai ba oottana giidoogaa oottanau takkenna; shin ooninne ba nagaraappe simmanaadan koyeesippe attin, ooninne xayana mala koyenna gishshau, inttebaa genccees.” (2 PHe. 3:9) Xoossaa Yihooway gencciyoogee i siiqiyaagaanne maariyaagaa gidiyoogaa bessees.

SHin, matan Xoossaa Yihooway iitata xayssana. I, xillota “waissiyaageetu bolli waayiyaa ehaana.” Asaa naaqqidi waayssiyaageeti “merinaa bashshan qaxxayettana.”—2 Tas. 1:6-9.

Qommoora abay odettido Iyani, waayiyaa xeelliyaagan i oychiyo oyshau aliya zaaruwaa demmiis. I tamaaridobay deˈuwaara gayttidaagan a xeelaa laammiis.