Siiqoy harata wozanappe dosiyoogaa gujjiyaaba. Ba goˈˈaa agganaadan oottiyaaba gidikkokka, issi uri haasayiyoobaaninne oottiyooban ba siiquwaa qonccissees.

Muusee Xoossaa siiqiyoogaa qonccissiis. Ayba ogiyan? Koyro Yohaannisa 5:3y, “Xoossaa siiqiyoogee a azazuwaa naagiyoogaa” giyoogaa hassaya. Muusee Xoossaa siiqiyo gishshau, a azazuwaa naagiis. Xoossay azazido ubbabaa Muusee azazettiis; ba gatimaa Zoˈo Abbaa bolli miccanaadan yootido deexxennaba milatiya azazuwaa gujjin, wolqqaama gidida Paaroona haasayissanaadan yootido yashshiya azazuwaakka i azazettiis. Yihoowa azazoy deexxiyaaba gidin, gidana xayinkka Muusee azazettiis. “[I] ubbabaakka GODAI bana azazidoogaadan oottiis.”—Kessaabaa 40:16.

Muusee Israaˈeelata siiqiyoogaakka bessiis. Yihooway ba asaa Muuse baggaara kaalettiyoogaa eti akeekidi, dumma dumma metuwaa giigissanaadan akko boosona. Geeshsha Maxaafay, “Asai Muuse yuushuwan maalladoppe omarssi gakkanaassi eqqiis” yaagees. (Kessaabaa 18:13-16) Israaˈeelati bantta metuwaa yootiyo wode, kumetta gallassaa siyiyoogee Muusa ay keena daafurssiyaabakko qoppa! Gidikkokka, Muusee asaa siiqiyo gishshau, eta maaddiyoogee a ufayssees.

Muusee eti yootiyoobaa siyiyoogaa xalla gidennan, ba siiqiyoogeetu gishshaakka woossiis. I ubba bana azzanttidaageetu gishshaakka woossiis! Leemisuwau, Muuse michiyaa Miiriyaama a bolli zuuzummido wode, Yihooway o hanttaara gogaa harggee oyqqanaadan oottiis. Muusee Xoossay o qaxxayido gishshau ufayttiyoogaappe, “Hai Xoossau, o pattarkkii!” yaagidi sohuwaara i gishshaa woossiis. (Qoodaabaa 12:13) Muusee hegaadan woossanaadan oottiday siiqoppe attin haraba gidenna.

Xoossaa wozanappe siiqiyoogan Muuse leemisuwaa kaallana danddayoos. Hegaa mala siiqoy nuuni “kumetta wozanaappe” a azazuwaa naaganaadan oottees. (Roome 6:17) Nuuni wozanappe Yihoowayyo azazettiyo wode a ufayssoos. (Leemiso 27:11) Hegee nunakka goˈˈees. Qassi, nuuni Xoossaa wozanappe siiqidi ayyo oottiyo wode, suurebaa oottoos; hegaadan oottiyoogankka ufayttoos!—Mazamure 100:2.

Nuuni Muuse leemisuwaa kaallana danddayiyo hara ogee, nu goˈˈaa aggidi harata siiqiyoogaa. Nu laggeti woy nu soo asay banttana qofissidabaa nuuyyo yootiyo wode, nuuni (1) eti yootiyoobaa wozanappe ezgganaadan, (2) etau qarettanaadaaninne (3) etabay nuna qofissiyoogaa etau yootanaadan siiqoy denttettees.

Muuseegaadan, nuuni nu siiqiyoogeetu gishshaa woossana danddayoos. Eti bantta metuwaa nuussi yootiyo wode, issi issitoo eta maaddana danddayennabadan qoppana danddayoos. Nuuni, “Ne gishshaa woossikkoppe attin harabaa aynne oottana danddayikke” gaana danddayoos. SHin, “Xillo asa woosai wolqqaama oosuwaa oottees” giyaagaa hassaya. (Yaaqooba 5:16) Nuuni woossennaakko geella Yihooway he urassi oottennabaa oottanaadan nu woosay denttettana danddayees. Yaatin, nu siiqiyo ura gishshaa woossiyoogaappe hara loˈˈobaa ay oottana danddayiyoo? *

Nuuni Muuse leemisuwaappe darobaa tamaarana danddayiyoogaa maayikkii? I nu mala asa gidikkokka, ammanuwan, ashkketettaaninne siiquwan keehippe loˈˈo leemiso. Nuuni a leemisuwaa loyttidi kaallikko, nunanne harata keehi goˈˈoos.—Roome 15:4.