Markkabee eqqiyo, Turku giyo kataman dure gidenna asay deˈiyo heeran diccaas. Ta aaway bokisiyaa annaaciyan erettida asa; taaninne ta kaalo ishaykka asaara bokisettiyoogaa dosoos. Timirtte keettan darotoo haratuura warettays. Yelagatettan, keehi iita naatuura zuppetaas; hegee taani wolqqaama warettanancha gidanaadan oottiis. Qassi hevi-meetal giyo muuziqaa tamaaraas, qassi rok giyo muuziqan keehi gooba gidanau koyaas.

Amarida karaabiyaa shammada, muuziqaa banddiyaa essada, takkennan he banddiyan waanna yettancha gidaas. Yexxiyo wode madirakiyan maari baynnabaa haniyoogaa dosays. He banddiyan kobabaa haniyo gishshaunne shori baynnabaa bessiyo gishshau, loddan loddan keehi erettida. Daro asaa sinttan muuziqaa kaaˈiyoogaa doommida; amaridaagaa kaaseetiyan kessida; hegeetuppe wurssettaagaa asay daro nashshiis. Nu banddiyaa erissanau 1988 heeran Amarkkaa biida. Amarida wodiyau Niyoorkke katamaaninne Losanjjeles kataman yexxida; qassi Finlandde simmanaappe kase, muuziqan keehi erettida asatuura gayttida.

Taani yettaa yexxiyoogan ufayttikkokka, hegaappekka aaruwan ufayssiya deˈo deˈanau keehi koyaas. Muuziqaara gayttidabaa oottiyaageeti keesettiyoogeenne amalancha gidiyoogee tana hidootaa qanxxissiis; qassi taani shori baynna duussaa deˈiyoogeekka salettiis. Tana iita asa gaada qoppiyo gishshau, siˈooliyaa taman xuugettays gaada yayyaas. Hegaara gayttidabaa eranau dumma dumma haymaanoote maxaafata nabbabaas; qassi taani a ufayssennaagaa erikkokka, Xoossay tana maaddanaadan minttada woossaas.

Deˈossi koshshiyaabaa demmanau, he wode postta keettan oottays. Issi gallassi, tanaara oottiyaageetuppe issoy Yihoowa Markka gidiyoogaa eraas. Taani a daro oyshaa oychaas. I Geeshsha Maxaafaappe zaarido ammanttiya zaaruwan keehi ufayttido gishshau, aara Geeshsha Maxaafaa xannaˈanau maayaas. Amarida saaminttau xannaˈa simmin, nu banddee kaaseetiyan duuqqin daro miishshaa demissiya  konttiraatiyaa ekkanaadan shoobettiis; he kaaseetee Amarkkankka bayzettana danddayiyaagaa. Hegaa mala qaadaa audekka demmana danddayikke gaada qoppaas.

Issi kaaseetiyaa kessa simmada Geeshsha Maxaafay yootiyoobaa ta deˈuwan minttada kaallana koyiyoogaa tana xannaˈissiyaagau yootaas. I ba qofaa yootennan, Maatiyoosa 6:24n Yesuusi yootidobaa taani nabbabanaadan shoobbiis. He xiqisee, “Naa77u godatuyyo haarettanau danddayiyai ooninne baawa” yaagees. Taani Yesuusi giidobaa akeekido wode, ta wozanay gagettiis. Guutta saaminttappe guyyiyan, qassi tana xannaˈissiyaagee garamettanaadan oottiyaabaa au odaas. Taani Yesuusa kaallanau koyiyo gishshau, he bandddiyaappe kiyidoogaa yootaas!

Geeshsha Maxaafay, taani moorettidabaa xeellada giigissiyo herega mala gidiis. (Yaaqooba 1:22-25) Ta eeshshay keehi iita gidiyoogaa akeekaas: Taani otorettiyaanne hayttatanau amottiya asa. Taani cayays, asaara warettays, sijaaraanne daro ushshaa uyays. Taani Geeshsha Maxaafay yootiyoobaara keehi phalqqettiya ogiyan deˈiyoogaa erido wode, hada deˈo deˈiyoogaa akeekaas. SHin taani laamettanau qofaa qachaas.—Efisoona 4:22-24.

Koyro heeran, taani kase oottido mooruwaa qoppiyoogan keehi unˈˈettaas. SHin tana xannaˈissiya ishay tana keehi maaddiis. Isiyaasa 1:18n, “Intte nagarai baaraadan zo77ikkokka, shachchaadan booxxana” yaagidi Geeshsha Maxaafay yootiyoogaa tana bessiis. Hageenne hara xiqiseti, saluwan deˈiya nu Aaway maariyaagaanne bantta nagaraappe simmiyaageetu masunttaa pattanau koyiyaagaa gidiyoogaa taani ammananaadan oottidosona.

Taani Yihoowa erada a siiqiyoogaa doommido wode, ta huuphiyaa au geppanau koyaas. (Mazamure 40:8) Ruusiyaa biittan, Seynt Piterssiberg giyo kataman, 1992n daro biittaappe yiidaageeti issippe shiiqiyo awuraajjaa shiiquwan xammaqettaas.

Yihoowayyo goynniya darotuura laggetaas. Issi issitoo issippe shiiqidi loˈˈo muuziqaa kaaˈoosinne Xoossay immido ha imotan ufayttoos. (Yaaqooba 1:17) Qassi taani keehi siiqiyo ta keettaayyiyo Kiristtiino ekkidoogee tau gita anjjo. Iira ufayssiyaanne metiya wodiyaa issippe aattida; qassi ta wozanaabaa iyyo yootays.

Taani Yihoowa Markka gidennaakko, haˈˈi paxa deˈennan aggana danddayays. Taani hagaappe kase darotoo metuwaaninne daafaban gelays. SHin haˈˈi ufayssiya deˈo deˈays; qassi ubbabaykka maarattiis gaada qoppays.