“Haratuyyo atto geenna uri ba huuphe pinnanau deˈiyo zarphiyaa menttees.” Birttaaniyaa biitta asa gidida 17tta xeetu layttan taarikiyaa xaafee Ediward Herbertti giido ha qofay, nuuni haratu mooruwaa atto gaana koshshiyo issi gaasuwaa, hegeekka, harati nuuyyo atto gaanaadan nuuni koyiyo wodee deˈana danddayiyoogaa qonccissees. (Maatiyoosa 7:12) Gidoppe attin, nuuni haratuyyo atto gaana koshshiyo hara gaasoy deˈees. Kiitettida PHauloosi, ‘Issoy issuwaabaa danddayite; ooninne ba laggiyaa bolli hanqqettidobay deˈikko, issoy issuwau coo atto yaago. Yihooway intteyyo coo atto giidoogaadan, inttekka atto giite’ giido qofaa akeeka.—Qolasiyaasa 3:13.

Nuuni ubbay nagarancha gidiyo gishshau, issi issitoo harata hanqqetissana woy yiilloyana danddayeettees; qassi etikka nu bolli hegaadan oottana danddayoosona. (Roome 3:23) Nuuni nagarancha gidida nu mala asaara sarotettan deˈana danddayiyoy ayba ogiyaanee? PHauloosi Xoossaa ayyaanay denttettin, nuuni danddayanaadaaninne atto gaanaadan zoriis. He qaalay xaafettoosappe naaˈˈu shaˈu laytta heera gidikkokka, haˈˈikka keehippe goˈˈees. Ane PHauloosi yootidobaa akeekan pilggoos.

‘Issoy issuwaabaa danddayite.’ Issi xuufee, Kiristtaaneti “balabaa oottidaageetu woy ufayssenna eeshshay deˈiyoogeetu hanotan yiillotiyaaba gidikkokka, eta danddayiyoogan” ha eeshshaa bessiyoogaa yootees. ‘Issoy issuwaabaa’ giyaagee naaˈˈaykka issoy issuwaa danddayiyoogee bessiyaaba gidiyoogaa qonccissees. Geella harata ufayssenna eeshshay nuuyyo deˈiyoogaa akeekiyo wode, nuna ufayssenna eta eeshshaa gaasuwan etaara deˈiya sarotettay moorettanaadan oottokko. Gidoppe attin, harati nu bolli nagaraa oottikko shin?

‘Issoy issuwau coo atto yaago.’ Wolayttatto Geeshsha Maxaafan “atto yaago” geetettida Giriiketto qaalay, issi eranchay giidoogaadan, “issi uray kehatettan atto giyoogaa bessees.” Hara xuufee yootiyoogaadan, ha qaalaa birshshettay “harata ufayssiyaabaanne maaddiyaabaa oottiyoogaa, etau kehiyoogaa” giyoogaa gidana danddayees. Nuuni ‘nu laggiyaa bolli hanqqettidobay deˈikkokka,’ atto giyoogan kehatettaa bessoos. SHin nuuni hegaadan kehana koshshiyoy aybisee? Issi gaasoy, geella nuuni mooriyo wode ikka nuussi atto giyoogan kehanaadan koyiyo gishshataassa.

‘Yihooway intteyyo coo atto giidoogaadan, inttekka atto giite.’ Nuuni haratuyyo coo atto gaana koshshiyo waanna gaasoy, Yihooway nuuyyo coo atto giyo gishshataassa. (Mikiyaasa 7:18) Yihooway bantta nagaraappe simmiyaageetuyyo bessido aaro kehatettaa ane issi kutti qoppa. Yihooway nu mala nagarancha gidenna. SHin nagaranchati au atto giyoogan kehana koshshennaagaa i eriyaaba gidikkokka, bantta nagaraappe simmiyaageetuyyo eta nagaraa muleera atto yaagees. Bantta nagaraappe simmiyaageetuyyo coo atto giyoogan Yihoowa mali baynnaagee tuma!

Yihoowa maarotay nuuni akko shiiqanaadaaninne a leemisuwaa kaallanaadan denttettees. (Efisoona 4:32–5:1) ‘Yihooway ta nagaraa kehatettan atto giyaaba gidikko, ba mooruwaa ammanidi atto gaanaadan tana woossiya ta mala nagarancha urau atto gaana bessennee?’ yaagidi nuna oychana koshshees.—Luqaasa 17:3, 4.