Taani Kosta Rika giyo kataman diccaas. Tana yelidaageetussi hosppun naati deˈoosona; taani laappuntto naˈa. Taayyo layttay hosppuna gidiyo wode ta aaway hayqqiis. Hegaa gishshawu, ta aayyiyaa nuna barkka dichchaasu.

Taani naatettaappe doommada ispporttiyaa * dosays; qassi hegee ta deˈuwan aybippenne aadhdhiyaaba gidiis. Taani yelagatettan deˈiyo wode, amatere ligiyan annaacettiya citan kaaˈiyoogaa doommaas. Taani amatere ligiyan kaaˈishin tawu layttay 20 gidin, gooba kaassanchchaa koyiya issi bitanee Nikaraguwan deˈiya erettida citawu kaaˈanaadan tana oychchiis. SHin he wode ta aayyiyaa sahettiyo gishshawunne iyyo koshshiyaabaa kunttiya asi baynna gishshawu taani Nikaraguwa baanawu koyabeykke. Yaatiyo gishshawu hegan maayettabeykke. Hegaappe simmin, gooba kaassanchchaa koyiya hara bitanee amatere ligiyaappe doorettida kaassanchchati deˈiyo Kosta Rika biittawu kaaˈanaadan tana shoobbiis. He wode, shoobiyaa ekkaas. Yaatada 1949ppe 1952 gakkanawu, ta biittawu kaaˈaas; qassi Kuuban, Meksikkooninne Nikaraguwankka kaaˈaas. Taani he citan gooba kaassanchcha. Qassi 17 kaassata aynne moorennan kaaˈaas!

Taani shori baynna deˈuwaa deˈidoogan zilˈˈettays. He wode taassi issi laggiyaa deˈiyaaba gidikkonne, hara maccaageeturakka mattumaa gayttays. Taani ushshaa likkiyaappe aattada uyays. Issi qammi taani keehi mattottido gishshawu, wonttin hiittaappe denddiyo wode soo waana simmidaakko hassayikke! Taani domino giyo ceeriyaa kaaˈaysinne lotoriya qanxxays.

He wode, ta aayyiyaa Yihoowa Markka gidaasu. A taayyo Geeshsha Maxaafaabaa yootanawu baaxetidaba gidikkonne, taani ispporttiyaabaa xallaa qoppiyo gishshawu siyabeykke. Taani loohiyo wode he kaassaabaa xallaa qoppiyo gishshawu, qumaa miyo wodiyaakka hassayikke! Taani aybippenne aaruwan he kaassaa dosays!

SHin taayyo layttay 29 gidido wode, he kaassaa kaaˈishin kuwaasiyaa oyqqanawu malaydda keehi qohettaas. Taani paxa simmada, he kaassaa kaaˈiyoogaa aggaas. SHin amatere ligiyan kaaˈiyaageeta loohissiyoogaa aggabeykke.

Taani 1957n, Yihoowa Markkatu gita shiiquwan shoobbettada kase taani kaaˈido isttaademiyan shiiqaas. Taani uttada ezggiyo wode, kase kuwaasiyaa beˈanawu he isttaademiyan shiiqiya asaappe Yihoowa Markkati keehi dummatiyoogaanne eti issoy issuwaa bonchchiya asa gidiyoogaa akeekaas. He shiiquwan beˈidobay taani Yihoowa Markkatuura Geeshsha Maxaafaa xannaˈanaadaaninne eta shiiqota shiiqanaadan tana denttettiis.

Taani Geeshsha Maxaafaappe tamaarido darobaa keehi dosaas. Leemisuwawu, Yesuusi ba erissiyo ashkkarati wurssettaa wodiyan Xoossaa Kawotettaa mishiraachchuwaa kumetta alamiyan sabbakanaagaa kasetidi yootiis. (Maatiyoosa 24:14) Qassi tumu Kiristtaaneti Xoossawu oottiyoy miishshaa demmanaassa gidennaagaa akeekaas. Yesuusi, “Intte coo ekkideta; coo immite” yaagiis.—Maatiyoosa 10:8.

Taani Geeshsha Maxaafaa xannaˈada, Geeshsha Maxaafay yootiyoobaa Yihoowa Markkati oottiyoobaara geeddarssaas. Eti Xoossaa Kawotettaabaa sabbakanawu minnidi oottiyoogan maalaalettaas. Yesuusi ba erissiyo ashkkaratussi yootidoogaadan, eti keha gidiyoogaa akeekaas. Yaatiyo gishshawu, Yesuusi Marqqoosa 10:21n “yaada tana kaalla,” giidi shoobbidoogaa nabbabada Yihoowa Markka gidanawu koyaas.

Taani laamettiyoogee amarida wodiyaa ekkiis. Leemisuwawu, daro layttatuyyo taani taayyo “qaada” gaada wottido payduwan saaminttan saaminttan nu biittaa lotoriyaa kaaˈaas. SHin, “Qaada giyo eeqaayyo” goynniyaageetanne yaaretiyaageeta Xoossay ixxiyoogaa taani Geeshsha Maxaafaappe tamaaraas. (Isiyaasa 65:11; Qolasiyaasa 3:5) Yaatiyo gishshawu, taani ceeriyaa kaaˈiyoogaa agganawu kuuyaas. SHin taani ceeriyaa kaaˈiyoogaa aggoosappe koyro Woggaa galla taani “qaada” gaada wottido paydoy xooniis! Taani he saaminttan kaaˈenna gishshawu asay ta bolli miicciis; qassi taani zaarettada kaaˈana mala eti tana iisettidosona; shin taani kaaˈabeykke. Taani zaarettada ceeriyaa kaaˈabeykke.

Taani Yihoowa Markkatu gita shiiquwan xammaqettido galla hara paacee tana gakkiis. (Efisoona 4:24) He qammi taani shemppido hooteeliyaa biyo wode, ta kase laggiyaa ta kifiliyaa penggen eqqada tana naagawusu. A “Saamii, haaya; issippe ufayssiya wodiyaa aattoos!” gaada tana iisettaasu. SHin taani iyyo sohuwaara “Akkay!” gaada zaaraas. Mattumaa gaytettaanne aqo deˈuwaa xeelliyaagan Geeshsha Maxaafay yootiyoobawu taani haˈˈi azazettiyoogaa iyyo yootaas. (1 Qoronttoosa 6:18) A dagammada “hee, woygay?” gaasu. Yaatada, A mattumaa gaytettaanne aqo deˈuwaa xeelliyaagan Geeshsha Maxaafay yootiyoobay aynne maaddennaba gidiyo gishshawu nuuni kaseegaadan deˈana bessees gaada yootaasu. Gidikkonne, taani ta kifiliyaa gelada kariyaa gorddaas. Taani 1958ppe doommada Yihoowayyo ammanettada deˈiyoogan, ha wodiyan keehi ufayttays.

Taani demmido anjjota ubbaa xaafana giyaakko gita maxaafa gidana gaada qoppays! Ha wodiyan taayyo daro tumu laggeti deˈoosona, giiga deˈuwaa deˈaysinne wozanappe ufayttays; hegeeti taani demmido anjjotuppe amaridaageeta.

Taani haˈˈikka he kaassaa dosays; shin taani ta deˈuwan hara keehi koshshiyaabaa xoqqu ootta xeellays. Taani he kaassan erettida asa gididabanne daro miishshaa demmidaba gidikkonne, hegeeti merinawu deˈiyaaba gidokkona. SHin Xoossaaranne ta ishanttuura deˈiya dabbotay merinawu deˈana. Geeshsha Maxaafay hagaadan gees: “Ha sa7ainne ha sa7an asi amottiyo ubbabai aadhdhana. SHin Xoossai giidoogaa oottiya urai merinau de7ana.” (1 Yohaannisa 2:17) Taani haˈˈi aybippenne aaruwan Xoossaa Yihoowanne A asaa siiqays!