Taani yelettidoy kase Jarmane Dimokiratik Repablik geetettiya biittan Sakisen giyo heeraana. Nu soo asay siiqettees; qassi ta aawaynne aayyiyaa tawu loˈˈo kanddoy deˈanaadan tana tamaarissidosona. Jarmane Dimokiratik Repablikee Koministte haaro gidiyo gishshawu Sakisenen deˈiya daro asay haymaanoote koyenna. Taani Xoossay baawa gaada qoppaas. Xoossay baawa giyo qofaynne koominizime haaroy tawu layttay 18 gakkanaashin ta qofaa laammiis.

Kominizime haaroy tana ufayssidoy aybissee? Ubba asay issi lagge giyo qofaa taani dosido gishshataassa. Qassi hegee keehi duretu giddooninne keehi hiyyeesatu giddon deˈiya dummatettay xayanaadan oottiyo gishshawu, aqo ubbay asawu issi lagge shaakettanaadan oottees gaada ammanaas. Yaatiyo gishshawu, Koministte yelagatu dirijjitiyan minna oottaas. Taayyo layttay 14 gidido wode, heeraa naaganawu eqqida dirijjitiyan moorettida woraqataa zaarettidi goˈettanawu oottiyo oosuwaa daro saatiyawu oottaas. Taani deˈiyo Awo giyo katama sunttati ta oottidobaa gishshawu tana galatiyoogaa bessanawu woytidosona. He wode taani yelaga gidikkonne, Jarmane Dimokiratik Repablike polotikan waannatiya amaridaageeta eraas. Taani suurebaa halchchaasinne ta deˈoy sinttappe loˈˈo gidana gaada qoppaas.

SHin ubbabay qoppennan laamettiis. Berline katamaa gimbbee 1989n laalettido wode Arshsho Awurooppaa Koministte haaroy xayiis. Taani dagammanaadan oottiday hegaa xalla gidenna. Jarmane Dimokiratik Repabliken naaqoy keehi daridoogaa taani sohuwaara akeekaas. Leemisuwawu, Kominizime haaruwawu exatenna asaa ziqqi ootti xeelloosona. Hegaadan waani hanana danddayii? Nuuni Koministteti ubbay asay issi lagge giidi ammanokkoniiyye? Kominizime haaroy xayidee? Taani hirggan maashaas.

Yaaniyo gishshawu, ta kaseyiyoobata laammada muuziqaanne misiliyaa kaseyaas. Taani naaˈˈantto xekka timirttiyaa muuziqaa timirtte keettan tamaarido gishshawu, yuniveristtiyaa geliyo wode hegaa tamaaranawu halchchada yettanchchanne misiliyaa medhdhiyaagaa gidanawu qoppaas. Qassi, taani naatettan tamaarido kandduwaa maarata mule agga bayaas. Allaxxiyoogaa he wode xoqqu ootti xeelliyo gishshawu issi kutti daro macca naatuura wodiyaa aattays. SHin, yexxiyoogee, misiliyaa medhdhiyoogeenne yeda deˈo deˈiyoogee taani hirggiyoogaa agganaadan oottibeenna. Ubba qassi taani medhdhido misileti yashshan ta maashiyoogaa bessoosona. Sinttappe aybi hananee? Qassi deˈuwawu halchchidobi aybee?

Ta oyshatussi zaaruwaa wurssettan demmidoogan taani keehi maalaalettaas. He timirtte keettan issi galla omarssi taani amarida tamaaretuura sinttanaabaa tobbaas. Mando * giyo tamaariyaa Yihoowa Markka. He galla omarssi A tana loˈˈo zore zoraasu. A hagaadan gaasu: “Andreˈasaa, neeni deˈuwaabaanne sinttanaabaa xeelliyaagan oychchiyo oyshatussi zaaruwaa demmanawu koyikko, Geeshsha Maxaafaa loytta pilgga.”

Hegee tana loytti ammanttana xayikkonne, zaaruwaa demmanawu Geeshsha Maxaafaa pilgganawu kuuyaas. Manda tana Daaneela shemppo 2 bessin, nabbabidoban maalaalettaas. Ha hiraagay ha wodiyaa gakkanaassi kalli kallidi alamiyan haariya kawotettatubaa qonccissees. Manda sinttanaa deˈuwaa xeelliyaagan Geeshsha Maxaafay yootiyo hara hiraagata tana bessaasu. Ta oyshatu zaaruwaa wurssettan demmaas! SHin he hiraagata xaafiday oonee? Qassi sinttanaabaa likkebaa yootana danddayiyay oonee? Xoossay deˈees giyoogee?

Horstanne Anjeliko giyo Yihoowa Markka gidida azinaaranne michcheera Manda tana gattin Xoossaa Qaalaa taani eranaadan eti maaddidosona. Yihoowa giyo Xoossaa buzo sunttaa ubbatoo goˈettiyaynne hara asawu erissiyay Yihoowa Markkatu haymaanoote xalla gidiyoogaa sohuwaara akeekaas. (Mazamure 83:18, NW; Maatiyoosa 6:9) Gannate gidiya saˈan merinawu deˈiyo hidootaa Xoossaa Yihooway asawu immidoogaa taani tamaaraas. Mazamure 37:9y hagaadan gees: “GODAN ufaissaa oottiyaageeti biittaa laattana.” Xoossay xillotettawu kessido Geeshsha Maxaafay yootiyo maaraadan deˈanawu baaxetiya ubbay merinaa deˈuwaa hidootay deˈiyoogee tana ufayssiis.

Gidoppe attin, Geeshsha Maxaafay tamaarissiyoobaara maayettada deˈana mala ta deˈuwaa laammanawu keehi baaxetaas. Taani yexxiyoogaaninne misiliyaa medhdhiyoogan gooba gidiyoogee ta otorettanaadan oottido gishshawu, koyro tana ziqqi oottiyoogaa tamaarana koshshiis. Hegaa bollikka, shori baynna deˈuwaa aggiyoogee tana metiis. Geeshsha Maxaafay tamaarissiyoobaa oosuwan peeshshanawu banttawu danddayettida ubbabaa oottiya asata Yihooway danddayiyo, maariyoonne eta hanotaa akeekiyo gishshawu taani A keehi galatays!

Xoossay baawa giyo qofaynne koominizime haaroy tawu layttay 18 gakkanaashin ta qofaa laammiis; he wodeppe ha simmin Geeshsha Maxaafay ta deˈuwaa laammiis. Taani tamaaridobay sinttanaabawu hirggiyoogaa agganaadaaninne deˈuwaa halchchuwaa eranaadan oottiis. Taani 1993n xammaqettada Yihoowa Markka gidaas; qassi minna haggaaziya ta mala Kiristtaaniyo Tabeto 2000n machchaas. Harati Geeshsha Maxaafaa eranaadan maaddanawu nuussi danddayettida keenan daro saatiyawu oottoos. Nuuni demmiyo daroti Xoossay baawa giyoogeetanne koominizime haaruwawu exatiyaageeta. Eti Yihoowa eranaadan maaddiyoogan taani keehi ufayttays.

Taani Yihoowa Markkatuura koyro xannaˈiyoogaa doommido wode, ta aawaynne ta aayyiyaa keehi yayyidosona. SHin, Yihoowa Markkatuura xannaˈidoogee ta deˈoy laamettanaadan oottidoogaa eti guyyeppe akeekidosona. Haˈˈi eti Geeshsha Maxaafaa nabbabiyoogeenne Yihoowa Markkatu shiiqotun shiiqiyoogee tana keehi ufayssees.

Tabetanne taani Geeshsha Maxaafay aqo laggetussi yootiyo zoriyaa mintti kaallanawu baaxetiyo gishshawu nu aqo deˈuwan ufayttoos. Leemisuwawu, Geeshsha Maxaafay aqo laggeti issoy issuwawu ammanettanaadan yootiya zoriyaa oosuwan peeshshiyoogee nu aqo deˈoy ubbatoo minnanaadan oottiis.—Ibraawe 13:4.

Taani deˈuwaabaanne sinttanaabaa xeelliyaagan hirggiyoogaa aggaas. Tumuppe sarotettaaninne issippetettan kumetta saˈan deˈiya so asaa yara gididabadan tawu siyettees. Ha son, nuuni issoy issuwaa haraappe shaakki xeellokko. Hegee taani ammaniyoobaanne ta deˈo ubban demmanawu koyidoba.