TUMINHAPKARY 20

Naꞌap dii Yewah Puchurynau xaꞌapatinhan pabaukupainhap kiz sakichipaꞌu idiaꞌan?

PLAY

Yewah xaꞌaptin kaimen naꞌik sakichipaꞌu idiaꞌan. (1 Corinthians [1 Coríntios] 14:33, 40) Ykayꞌan naꞌap kapam, ypidianannau xaꞌapatinhan. Mazan naꞌap dii Yewah kazuwaytipan papidianannau Disu idiaꞌan? Kanum kiz waxaꞌapat wakaminkeꞌyt kinha nii?

1. Kanum wyryy mixidiainhau zuwaynaa?

‘Ipei mixidiainhau zuwaynaa Disu Kristu.’ (Ephesians [Efésios] 5:23) Disu aukaz ik ykazuwaytipan kaydinkizei Yewah pidianannau xaꞌapapnii ipei amazada ii aka. Yzamatnii “puchuryi mixiꞌu ykaydinhayzun kaimen naꞌik aichipabaꞌu” — inhau daunaiuranau dubtaꞌuraꞌanaa inkaydinhan Yewah at, aunaa iribeꞌu man indyan, indakutkau kazuwaytpainhau ipei baukuptinkizei kid. (Piaichi Matthew [Mateus] 24:45-47.) Kutyaꞌanaa apóstolonau naꞌik kazuwaytpainhau baukuptinkizei Jerusalém ii, yryy dun, inkakinhaupayznii mixidiainhau. (Acts [Atos] 15:2) Naꞌap kapam aizii, kazuwaytpainhau ipei baukuptinkizei kid kakinhaupan mixidiainhawyz Yewah, ipei amazada ii aka. Mazan aunaa innaubunaitinpen pamin mixidiainhau at. Karikeunan intuminpen Tuminkery Karichian daꞌy in aichiap kiz kanum Yewah aipen inxaꞌaptan naꞌikim indaꞌanan Disu kakinhauri.

2. Kanum wyryy kazuwaytpainhau baukuptinkizei? Naꞌapauram inkaydinkiz?

Wyryy kazuwaytpainhau, dubtaꞌuraꞌanaa inkaydinhan Yewah at, inkaiwee Tuminkery Paradan kaminkeꞌytaꞌu nii Yewah Puchurynau. Karikeunan minziu inkaminkeꞌytaꞌazun naꞌik inmaꞌuzakadaꞌazun pamin mixidiainhau. Aunaa in aipen pakawinipinatkau pakaydinhan id Yewah at. Mazan, “kunaykiaꞌu idiaꞌan inxaꞌaptan pakaydinkiz Tuminkery aipen kawan at. Aunaa in aipen id man pa ikudan aimeakan paꞌat karikeunan”. (1 Peter [1 Pedro] 5:1, 2) Kainhaꞌa bauran daunaiuranau kaminkeꞌypaꞌunii kazuwaytpainhau baukuptinkizei, ydaynaꞌan, tyryy intanautinhan kazuwaytipainhau nii baukuptinkizei kapam.

Kazuwaytpainhau ipei baukuptinkizei kid, inzamat pabiꞌikid kazuwaytpainhau baukuptinkizai ik, inkaydinkiz muruwaytpayznhau nii baukuptinkizei kid. Wyryy daunaiuranau, inmuruwayt dirib baukuptinkizei kid diꞌit, intaa kiz kakinhaurii kid naꞌik inmaꞌuzakad kiz pamin mixidiainhau. Wyryy muruwaytpayznhau baukuptinkizei kid indaꞌan Tuminkery Paradan kawan at, in aichiap kinha nii tyryy man pamin mixidian kaminkeꞌypaꞌu nii uu kazuwaytpaꞌu nii baukuptinkizei. — 1 Timothy (1 Timóteo) 3:1-10, 12; Titus (Tito) 1:5-9.

3. Kanum kiz ipei Yewah Puchurynau Kakuwapainhau xaꞌapat?

Ipei mixidiainhau ‘kunaykikid Yewah yy’ inkynyian dun naꞌik indakuꞌitin dun baukuptinkizei ii, naꞌik inkakuwapan dun kaimenaꞌu kywai daꞌy pakaꞌichian kawan at.— Piaichi Psalm (Salmo) 148:12, 13.

PYTUMINHAP PAUWAꞌA ZII

Pytykap naꞌapam Disu kazuwaytipan naꞌik naꞌapam kazuwaytipainhau baukuptinkizei intiwee patamakpan Disu. Naꞌapam kiz wa izuꞌitin Disu naꞌik naꞌapam wakaminkeꞌytan wyryy kazuwaytpainhawyz baukuptinkizei.

4. Disu yryy kaimenaꞌu ykazuwaytipan

Kaimenaꞌu idiaꞌan Disu dapadan waynau. Yaichi Matthew (Mateus) 11:28-30. Ydaynaꞌan ykadakuinhap diuraz aimeakan kid daꞌy:

Kanum kadyz zuwaynaa wyryy Disu? Naꞌap dii Disu aipen wa abatinpen pakazuwaytipan id waynau?

Naꞌap dii kazuwaytpainhau baukuptinkizei tamakpan Disu kadyz? Yawynyytap VÍDEO.

VÍDEO: Minziu kazuwaytpainhau baukuptinkizei kaminkeꞌytan pamin mixidiainhau, amazada nakainhan dun Nepal ii (4:56)

Tuminkery Karichian kuwad kaimenaimen naꞌapam kiz kazuwaytpainhau baukuptinkizei xaꞌaptan pakaydinkiz.

Yaichi Isaiah (Isaías) 32:2 naꞌik 1 Peter (1 Pedro) 5:1-3. Ydaynaꞌan ykadakuinhap diuraz aimeakan kid daꞌy:

Naꞌap dii piabatinpen piaichipan id kazuwaytpainhau baukuptinkizei intiwee pa aidyan pakamynanyn naꞌap Disu kawan?
Naꞌap dii kazuwaytpainhau baukuptinkizai tamakpan Disu bauran aimeakan kid idiaꞌan?

5. Kazuwaytpainhau baukuptinkizei intuminhap kidian pakadyz kid idiaꞌan

Naꞌap dii Disu aipen kazuwaytpainhau baukuptinkizei intaapan pakaydinkiz paxaꞌapapniaz Yewah at? Yawynyytap VÍDEO.

VÍDEO: Kazuwaytpainhau baukuptinkizei inkazuwaytap pamin mixidiannau (7:39)

Disu taanii kakinhauri kid kazuwaytpainhau baukuptinkizei at, intaap kinha nii pamin mixidiannau. Yaichi Matthew (Mateus) 23:8-12. Ydaynaꞌan ykadakuinhap diuraz aimeakan kid daꞌy:

Naꞌap dii Tuminkery Karichian kian kazuwaytpainhau baukuptinkizei xaꞌaptin kiz? Kazuwaytpainhau bauran chuuchi kid xaꞌaptin naꞌap?

Kazuwaytpainhau baukuptinkizei maꞌuzaka intaapan pamixidian naꞌikim ikaminkeꞌyt pairibennau mixidian Yewah kapam.
Kazuwaytpainhau baukuptinkizei inkaminkeꞌyt ipei pamin mixidiannau.
Kazuwaytpainhau baukuptinkizei karikeunan inkakuwap Tuminkery Paradan daꞌy.
Kazuwaytpainhau baukuptinkizei intuminhap kid Tuminkery Paradan daꞌy. In saabap kapam Yewah Dapanaa kaimen kiz yaidinpen.

6. Tyryy wakaminkeꞌytan kazuwaytpainhau baukuptinkizei

Tuminkery Karichian kuwad kandii nii kaimenaꞌu wakaminkeꞌytan kazuwaytpainhau baukuptinkizei. Yaichi Hebrews (Hebreus) 13:17. Ydaynaꞌan ykadakuinhap diuraz aimeakan kid daꞌy:

Kandii nii Tuminkery Karichian kian marii kiz minziu waizuꞌitin kazuwaytpainhau baukuptinkizei? Naꞌap dii pidiꞌitinpen naꞌapaꞌu daꞌyan?

Yaichi Luke (Lucas) 16:10. Ydaynaꞌan ykadakuinhap diuraz aimeakan kid daꞌy:

Kandii nii waizuꞌat kiz kazuwaytpainhau baukuptinkizei atii kaikesud kidiaꞌu aimeakan idiaꞌan?

PABIꞌIKID PIDIANNAU KIAN: “Aunaa yxaꞌapan aunaan an pyzamtinpen aunii baydap chuuchi diꞌit, tyryy pychuuchinpen pybaurantin.”

Kandii nii kaimenaꞌu nii waꞌat wachuuchinpen dun baukup pidiannau tym mixidiainhawyz Tuminkery?

WATUMINHAPNII

Disu yryy ipei mixidiainhau zuwaynaa, yryy id kazuwaytpainhau baukuptinkizei in izuꞌat ykakinhauri. Tyykii wakunaykian wakaminkeꞌytan kazuwaytpainhau baukuptinkizei, yxaꞌapanym kayꞌan, kaimenaꞌu inkadyz naꞌik intuminhap kid waynau pakadyz kid idiaꞌan.