TUMINHAPKARY 35

Naꞌapam nii wawidiayan waxaꞌapat kinha nii kaimen kidiaꞌu aimeakan?

PLAY

Ipei waynau wawidiayan irib aimeakan. Panadun wawidiayan kaimenaꞌu aimeakan waꞌat uu aunaa, wawidiayan idiaꞌan kaimenaꞌu, wamaꞌuzakadan nii wakaminhaydaꞌytinpen Yewah tym, mazan aunaan an wawidiayan kaimenaꞌu, ypatakaꞌyan nii wakaminhaydaꞌytinpen Yewah tym. Wawidiay naꞌiam nii wamaxaapan, naꞌapam nii waikudan pyraata wamaxaap kinha nii, wamazidyan nii man uu aunaa. Wawidiayan dun kaimenaꞌu, kunaykiaꞌu nii wamaxaapan naꞌik wakunaykikidian nii Yewah nhikynyy.

1. Naꞌapam nii pykaiween Tuminkery Karichian piwidiay kinha nii kaimen kidiaꞌu aimeakan?

Piwidiayan iaꞌii pyxaꞌaptan aimeakan, pyturinhap, pipixaa Yewah at ykaminkeꞌyt kiz pygary, naꞌik piaichi naꞌapauram Tuminkery Karichian kuwadan pi aiapnii daꞌy at. (Piaichi Proverbs [Provérbios] 2:3-6.) Kainhaꞌa kakinhaurii kid Yewah taanii, maxaꞌapannaꞌu yaichiapkau. Naꞌap kidiaꞌu kakinhaurii, kaimenaꞌu nii pi izuꞌutin an ykuwadan kawan at.

Mazan aunaan an pi ikudan Tuminkery Kakinhauri idiaꞌa piaichipaꞌazunii? Mazan ypyꞌau nii zii, Yewah naꞌakan nii pygary “dynap idiaꞌan, naꞌiakam nii pichiꞌikpan”. (Isaiah [Isaías] 48:17) Mazan naꞌap dii? Kainhaꞌa kywai kid Tuminkery Karichian idiaꞌa, kaminkeꞌytaꞌu nii pygary dirib aimeakan daꞌy. Wyryy kywai kid mixi kidiaꞌu wyryy, intuminhapkid waynau naꞌapam Yewah diꞌitinpen pabiꞌikid aimeakan daꞌyan. Tyryy wa aichipan naꞌapam Tuminkery diꞌitinpen wa aichian dun kywai kid Tuminkery Karichian diꞌikiꞌu. Wawidiayan nii kaimenaꞌu aimeakan kunaykii kidiaꞌuraz Yewah, wa aichipan dun naꞌap dii yabatinpen pabiꞌikid aimeakan daꞌyan.

2. Kanum kiz pidiꞌichap pyxaꞌaptan iaꞌii aimeakan?

Tuminkery Karichian kian: “Aichapinhaꞌu pidian ydiꞌitinhap kaimenaimen yxaꞌaptan iaꞌii ipei xaꞌapauran aimeakan.” (Proverbs [Provérbios] 14:15) Ykayꞌan wawidiayan iaꞌii waxaꞌaptan aimeakan, wamaxaadin kiz maskaydaꞌy naꞌik wadiꞌitinhap kiz naꞌapam nii wyryy waxaꞌapatazuniaz panadan nii wamaxaapan kadyz. Pidiꞌitinhap: ‘Xaꞌapauran kakinhaurii kid Tuminkery Karichian diꞌikiꞌu kaminkeꞌytan nii ungary? Unwidiayan an diurazyꞌy, kaimenaꞌu nii man un abatinpen unnhikynyy ii? Unxaꞌaptan an diurazyꞌy naꞌapam nii baurainhau abatinpen?’ Mazan kaimenaꞌu nii pauwaꞌa zii pidiꞌitinpen kaikepaꞌa: ‘Wyryy unxaꞌapatazunii kunaykikidian nii man Yewah?’ — Deuteronomy (Deuteronômio) 32:29.

Yewah tuman id waynau, tyryy ykakinhautan waynau kaimenaꞌu idiaꞌan uiaꞌu ai. Wa aichipan dun kaimenaimen Yewah kakinhauri kid naꞌik mixi kidiaꞌu kywai ykarichian diꞌikiꞌu, naꞌikim karikeunan an wa izuꞌutiꞌizun, kaimenaꞌu nii wadiꞌitinpen. Wyryy wadiꞌitinpen naꞌik wa abatinpen wanazu ii, wa aichiap kinha niꞌu kaimenaꞌu naꞌikim uiaꞌu aimeakan. (Romans [Romanos] 2:14, 15) Wadiꞌichipan dun watuminhapnii kid daꞌy Tuminkery Karichian idiaꞌa, ysaabaan nii wadiꞌitinpen naꞌik wanhikynyy, wawidiay kinha nii kaimenaꞌu aimeakan.

PYTUMINHAP PAUWAꞌA ZII

Pytykap naꞌap dii mixiꞌi kidiaꞌu kywai Tuminkery Karichian diꞌikiꞌu naꞌik wadiꞌitinpen Tuminkery Paradan kawan at, kaminkeꞌytan nii wawidiayan kaimen kidiaꞌu.

3. Pytaapad Tuminkery Paradan kakinhautan pygary

Naꞌap dii mixi kidiaꞌu kywai Tuminkery Karichian diꞌikiꞌu aidyan xaꞌapauran aimeakan wawidiay kiz? Yawynyytap VÍDEO. Ydaynaꞌan ykadakuinhap diuraz aimeakan kid daꞌy:

VÍDEO: Pytaapad mixii kidiaꞌu kywai Tuminkery Karichian diꞌikiꞌu kakinhautan pygary (5:54)

Kandii Yewah taapad waxaꞌaptan?
Kandii nii Yewah taapadan wawidiayan aimeakan wa aipenat?
Kandii Yewah taanii waꞌat wawidiay kinha nii kaimen kidiaꞌu aimeakan?

Watykap baydap mixiꞌu kywai Tuminkery Karichian diꞌikiꞌu, yaichi Ephesians (Efésios) 5:15, 16. Ydaynaꞌan ykadakuinhap naꞌapam nii pyxaꞌapatinhan, ‘pytykpan an naꞌapainim kainhaꞌa kaimenaꞌu aimeakan xaꞌapatkary nii, yxaꞌapataꞌak sariap’ . . .

karikeunan piaichi kiz Tuminkery Karichian.
pytanautinhan pauwaꞌa zii kaimenaꞌu daiarii uu daiarui, darii uu darui, uu danii nii.
pybaukuptinhan Yewah Puchurynau tym Yewah dapanaa ii.

4. Pytuminhap piaichiap kiz piwidiayan kaimenaꞌu aimeakan

Kainhaꞌa kakinhaurii Tuminkery Karichian diꞌikiꞌu maxaꞌapannaꞌu yaichiapkau, ykayꞌan maxaꞌapannaꞌu nii wa aichipan kanumaꞌu nii waxaꞌapat. Mazan aunaan an Tuminkery Kakinhauri kuwadan aimeakan waxaꞌapatazunii daꞌyan? Yawynyytap VÍDEO. Ydaynaꞌan ykadakuinhap diuraz aimeakan daꞌy:

VÍDEO: “Kaimen paꞌi pytaap pidiꞌitinpen naꞌikim pinhikynyy” (5:13)

Vídeo idiaꞌa, kandii Yewah Puchuryaba xaꞌaptan uaichap kiz padiꞌitinpen kaimenaꞌu idiaꞌan naꞌik uwidiay kiz aimeakan kunaykikidiaꞌu nii Yewah?

Kandii nii aunaa kiz wapixaan baurainhau widiay kiz naꞌapam nii waxaꞌapatinhan? Yaichi Hebrews (Hebreus) 5:14. Ydaynaꞌan ykadakuinhap diuraz aimeakan kid daꞌy:

Wapixaan dun baurainhau widiayan naꞌapam nii waxaꞌapatinhan, panadun maxaꞌapannaa waꞌat. Mazan kanum ipei waynau “wa aichiap kiz”?
Watykpan kawan vídeo idiaꞌa, kandii pyxaꞌapat kiz pidiꞌitinhap kinha nii kaimenaꞌu idiaꞌan naꞌik piwidiay kiz kaimenaꞌu?

Naꞌap mapa kawan, wadiꞌichipan kaminkeꞌyt wawidiayan xaꞌapauran dynap wachiꞌikep kiz

5. Wataap kiz kaimen baurainhau aunaan an indiꞌitinpen waynau kawan

Ipei pidiannau pabiꞌinaak kidiaꞌu, yryy id, inwidiay pabiꞌinaak kidiaꞌu aimeakan baurainhau ai. Ykayꞌan naꞌap dii wa aidyan wataapan kaimen baurainhau, indiꞌitinpen an panaꞌa waꞌai? Watykap diaytam aimeakan:

Baydap aimeakan: Baydap Yewah Puchuryaba umakun umaxaapan nan bauran amazada diꞌit, naꞌii Yewah Puchuryabanau aunaa innaydpan intykpan dun zynaba kaiwedan chururu.

Yaichi Romans (Romanos) 15:1 naꞌik 1 Corinthians (1 Coríntios) 10:23, 24. Ydaynaꞌan ykadakuinhap diuraz aimeakan daꞌy:

Diuraz saadinpeꞌu kid kian kawan, kanumaꞌu nii panadun wyryy Yewah Puchuryaba xaꞌaptan? Kanumaꞌu nii pyxaꞌaptan, kainhan dun bauran pidian py tym, diꞌitinpeꞌu panaꞌitiꞌu baydap aimeakan xaꞌapatkau, mazan pygary at aunaa yxaꞌapan?

Bauran aimeakan: Baydap Yewah Puchury yaichiap Tuminkery Paradan kian, aunaa panaꞌitiꞌu man pidian tyyzan dun maskaydaꞌy, mazan ynaꞌaptan panhikynyy diꞌit, aunaꞌu nii ytyyzan, nii maskaydaꞌy. Ydapadkau yaruwap kiz pamin mixidian dap ii. Naꞌii, ytykap baurainhau intyyz riwyni.

Yaichi Ecclesiastes (Eclesiastes) 7:16 naꞌik Romans (Romanos) 14:1, 10. Ydaynaꞌan ykadakuinhap diuraz aimeakan daꞌy:

Diuraz saadinpeꞌu kid kian kawan, kanumaꞌu nii panadun wyryy Yewah Puchury xaꞌaptan? Kanumaꞌu nii pyxaꞌaptan, kainhan dun bauran pidian py tym xaꞌaptaꞌuraz aimeakan aunaꞌuraz pinhikynyy naydpan?

Kanum kiz waxaꞌapat wawidiay kiz kaimen kidiaꞌu aimeakan?

1. Pyturinhap Yewah at ykaminkeꞌyt kiz pygary piaichiap kinha nii kanumaꞌu nii pyxaꞌaptan. — James (Tiago) 1:5.

2. Pydurut Tuminkery Karichian idiaꞌa naꞌikim karichi kid Yewah Puchurynau tuminii, pi ikud kinha nii mixii kidiaꞌu kywai kaminkeꞌytaꞌu nii pygary. Pyparada pymin mixidiannau tym kaimenaimenaꞌuranaa in aichipan Tuminkery Paradan.

3. Pidiꞌitinhap kaimenaꞌu nii man uu aunaa pinhikynyy at naꞌikim baurainhau nhikynyy at, wyryy aimeakan piaipeniaz pyxaꞌaptan.

PABIꞌIKID PIDIANNAU KIAN: “Unxaꞌapat kanum un aiapnii, ungary wyryy! Aunaa unnhikynyatin naꞌapam baurainhau diꞌitinpen.”

Kandii nii wadiꞌichap kiz naꞌapam Tuminkery naꞌikim baurainhau abatinpen?

WATUMINHAPNII

Kaimen wawidiayan aimeakan, wa aichipan dun naꞌapam Yewah diꞌitinpen naꞌik wadiꞌichipan dun naꞌapam nii baurainhau abatinpen waxaꞌaptan an waxaꞌaptazunii.

Watykap kuxan

Naꞌapam nii piwidiayan kaimen kidiaꞌu aimeakan kunaykikidiaꞌu nii Yewah nhikynyy?
Naꞌapam nii pytuminhapkidian pyzuway piwidiay kiz kaimen kidiaꞌu aimeakan?
Naꞌap dii wa aidyan wataapan kaimen baurainhau, indiꞌitinpen an panaꞌa waꞌai?

Un ipeian:

Pitiween paꞌi

Pidiꞌitinhap aimeakan daꞌy, piwidiayan niꞌu pyxaꞌaptan uu aunaa. Yryy naa, pitiween, pyxaꞌapatinhan naꞌap watuminhapnii kawan idikinhaydaꞌy aimeakan kid kawan at, quadro idiaꞌa “ Kanum kiz waxaꞌapat wawidiay kiz kaimen kidiaꞌu aimeakan?”.

Bauran aimeakan:

Bauran aimeakan pyxaꞌaptaꞌazun