“Abatayz turinhapkary, ipei xaꞌapauran pidiannau durutan nii pygary.” — Psalm (Salmo) 65:2.

Pabiꞌikid pidiannau turinhap aunaa pyꞌy inmixidian naꞌapam paturinpen abatkau. Inxaꞌapatan naꞌap inkuwadan id naꞌapam pa abatinpen uu pakaxaꞌuran, yryy daynaꞌan kaimen in abatinpen. Wyryy turinhapkary aunaa suu wa aiapkau man karikeunan wa abatinpen kaimen wabaitnii kid dayꞌan. Tuminkery Paradan Karichianaa aidi naꞌapam “Yewah a maunapdin pidiannau idiaꞌat, wyryy dautanhawyz yryy mixiꞌu idiaꞌan. . . Yabat indupian dun”. — Psalm (Salmo) 145:18, 19.

Yryy id, pimixid kiz Yewah Tuminkery yabat papuchurynau turinpen. Pakamarainpenyn id, ykian: “Ydapadan nii ungary ywaꞌatin nii un idiaꞌat, yturinpen idiaꞌan, yryy id un abatan nii ynau.” — Jeremiah (Jeremias) 29:12.

“Karikeunan yturinhap Tuminkery at.” — Romans (Romanos) 12:12.

Tuminkery Paradan Karichianaa aidi ‘karikeunan kiz waturinpen.’ Yryy aidi naꞌapam Yewah Tuminkery aipen pidiannau turinpen paꞌat. — Matthew (Mateus) 26:41; Ephesians (Efésios) 6:18.

Kandii nii Tuminkery aipen waturinpen paꞌat? Pidiꞌichap baydap aimeakan: kunaykii man darii nhikynyy ydan pixan dun paminkeꞌyi nii y ai? Panadun darii aichap kanum paydan aipen. Yryy id darii abatan dun paydan pixan paminkeꞌyi nii y ai, yaichap naꞌapam paydan mixid paygary naꞌapain yaichap ykaminkeꞌytan nii kapam. Naꞌap kapam, waturinpen dun Yewah Tuminkery at, wa aidiyan wamixidian yryy naꞌapain wakaminhaydaꞌytinpeaꞌazun ytym. — Proverbs (Provérbios) 15:8; James (Tiago) 4:8.

“Ytaa Tuminkery at ipei aimeakan kimdaytaꞌu naꞌik kaxaꞌurdaytaꞌu ynhikynyy, yxaꞌapanym kayꞌan ytaapnii wyryy ynauyz.” — 1 Peter (1 Pedro) 5:7.

Tuminkery aipen waturinpen paꞌat ymarainpen id waynau naꞌapain ykarudpan id ipei waynau. Yaichap kanum kadyz kid wabaitnii kid naꞌapain wadupian dun, ykaminkeꞌytaꞌazun waynau.

Karikeunan Davi turinpeyzun Yewah at, yaipen id paminkeꞌyi nii. Naꞌapain ykuwad Tuminkery at naꞌapam padiꞌitinpen naꞌik naꞌapam pa abatinpen. (Psalm [Salmo] 23:1-6) Naꞌap dii Tuminkery diꞌitinpen Davi daꞌy? Ymarainhapnii Davi naꞌapain yabat yturinpen paꞌat. (Acts [Atos] 13:22) Yryy kawan, Tuminkery abat waturinpen dun paꞌat ymarainpen id ipei waynau.

Naꞌap Tuminkery Puchury saadau salmos Karichianaa idiaꞌa. Wyryy ysaadaniaz aidi ymixid naꞌapam Tuminkery abatnii yturinpen paꞌat. Yryy kaminkeꞌyt yabatinpen Tuminkery dazubaꞌa naꞌapain maꞌuzak yabatinpen pabaitnii kid dayꞌan naꞌapain ykaxaꞌuran dun. — Psalm (Salmo) 116:1-9.

Wamixidian dun Tuminkery abat waturinpen, karikeunanyꞌu nii waturinpen yꞌat. Watykap Pedro dayꞌan, yryy maxaapaꞌu wiizei dakutkariweiz Espanha ii. Ydan 19 ywynyn ymaukan. Tyykii Pedro kaxaꞌuran. Yryy id, karikeunan yturinpen Tuminkery at panhikynyy ik, yaipen id panhikynyy maꞌuzakadkaꞌu naꞌapain yaipen id paminkeꞌyi nii. Kanum xaꞌap yryy daynaꞌan? Ykian: “Yewah dakuꞌat unturinpen ykaiween id unmin mixidiannau inmaꞌuzakad kinhaꞌa nii unnhikynyy, inkaminkeꞌyt kinhaꞌa nii ungary naꞌapain undaiaru.”

Aunaa pyꞌy ydan kakypan puwaa it, yturinpen pyꞌy padamat. Mazan turinhapkary tyykii ykaminkeꞌytan Pedro naꞌapain yiribennau. Ydaiaru, María Carmen, unhikynyichap: “Turinhapkary kaminkeꞌyt unhikynyy kaxaꞌuran dun. Un mixid Yewah Tuminkery, yaichap naꞌapam un abatinpen, unturinpen dun yꞌat. Ykaminkeꞌyt unhikynyy aunaa kiz un abatinpen kaxaꞌur.”

Tuminkery Paradan Karichianaa idiaꞌu kawan naꞌik kywai diura kawan kidiaꞌu, aidi naꞌapam Tuminkery abat waturinpen dun. Mazan kapam aunaa Tuminkery dakuꞌitin ipei turinhapkary. Kandii nii Tuminkery dakuꞌat pabiꞌikid turinhapkary, mazan baurainhau aunaa?