Diura karichi aidinii irib aimeakan kid Disu kuwadnii xaꞌapaꞌu nii amazada ikudan dunuꞌu naa patukun. Ipei aimeakan kid Disu kuwadnii aidiyan, yryy kazuwaytipaꞌuraz Tuminkery Naubunaitinhap kiz aukaz ii.

Tuminkery Karichian kuwad Disu sakadan dun pakazuwaytipan ywaatnii Siitan naꞌik uiaꞌu durunainhau aukaz ik. Aizii kainhaꞌa indyan imiꞌi baaraꞌa an, yryy id, 1914 diꞌik, kaxaꞌapannaa maxaapkary pauwaꞌa zii. — Revelation (Apocalipse) 12:7, 9.

Kaxaꞌapanaa pidiannau maxaapan aizii, mazan ypyꞌy, irib pidiannau kaminkeꞌytkau Disu kazuwaytipan id Tuminkery Naubunaitinpen idiaꞌan. Disu kuwadnii iribeꞌu nii pidiannau tuminhapkidkeu Tuminkery karichian dayꞌan ipei amazada kawan at. Yryy id, irib pidiannau tuminhapkidkeu naꞌik in izuꞌutin kakinhauri kid Tuminkery karichian diꞌikiꞌu. (Isaiah [Isaías] 2:2-4) Irib pidiannau tuminpen naꞌapam kiz inmaxaapan kunaykii paydainhau tym, naꞌapam kiz inkaydinhan naꞌik inkaiween papyraatan. Intuminhapkidkeu naꞌapam kiz inmaxaapan kaimen aizii naꞌik naꞌapam nii inkadyz diura imiꞌi baara idiaꞌa Tuminkery aipen kawan at diinheꞌitiꞌi.

Disu kazuwaytipan pyꞌy aukaz ii, mazan ypyꞌy, pidiannau naubunaitinpen inkazuwaytipan pawiiz kid. Mazan Tuminkery kian Disu at: “Pykazuwaytap pytarybnau biꞌi.” (Psalm [Salmo] 110:2) Maunaptan naa Disu mainhaabatan ipei patarybnau, mazan ipei pidiannau izuꞌitiꞌuraz Yewah panhikynyy diꞌik, kaimenaꞌu nii naa inmaxaapan.

Yryy xaꞌapan daynaꞌan, kanumaꞌu nii bauran xaꞌap Tuminkery Naubunaitinpen dun?

• Ymainhaabatan nii panaꞌitiꞌu chuuchinhau. Panaꞌitiꞌu chuuchinhau tuminhapkidiaꞌuraz maridinkery Tuminkery daꞌy naꞌik baitinkidiaꞌuraz pidiannau, yryy id, inmainhabatkau nii. Tuminkery karichian kuwadan panaꞌitiꞌu chuuchinhau, inhau naꞌap zynaba sellipeyz pananaa kawan, in uian id manawyn. Kadimenaꞌu idiaꞌanaꞌu nii panaꞌitiꞌu chuuchinhau mainhaabatkau yryy dun. — Revelation (Apocalipse) 17:15, 16.

• Ymainhaabatan nii ipei pidiannau naubunaitinpeinhau. Tuminkery Naubunaitinpen mainhaabatan nii pidiannau naubunaitinpeinhau. — Revelation (Apocalipse) 19:15, 17, 18.

• Ymainhaabatan nii dikeydainhau pidiannau. Kanumaꞌu nii xaꞌap pidiannau tym xaꞌapapaꞌuraz dikeydaꞌu aimeakan naꞌik aunaꞌuraz in izuꞌutiꞌizun Yewah? “Yryy id mainhaabatkau nii imiꞌi baara ik xaꞌapapayznhau dikeydaꞌu aimeakan.” — Proverbs (Provérbios) 2:22.

• Siitan naꞌik uiaꞌu durunainhau inmainhabatkau nii. Siitan naꞌik uiaꞌu durunainhau aunaꞌu nii naa pauwaꞌa ‘inxaꞌapat kidian uiaꞌu ipei pidiannau at inmaridipan idiaꞌan.’ — Revelation (Apocalipse) 20:3, 10.

Xaꞌapauran kaimen kidiaꞌu xaꞌapan nii pidian at izuꞌutiꞌuraz kakinhaurii Tuminkery Naubunaitinpen daꞌy atiꞌuraz?

Aimeakan kid Disu xaꞌaptan nii ykazuwaytipan dun Tuminkery Naubunaitinhapkiz ii, kaimenaꞌu nii pauwaꞌa zii pidiannau naubunaitinpeinhau ai. 144 mil pidiannau widiaykariweinhau inkaminkeꞌytan nii Disu kazuwaytipan aukaz ik imiꞌi baaraꞌa. (Revelation [Apocalipse] 5:9, 10; 14:1, 3) Disu saaban nii imiꞌi baara naꞌap Tuminkery aipen kawan at. Pytykap kanumaꞌu nii xaꞌap Tuminkery Naubunaitinpen dun:

• Ykatukuntan nii rinhei kid naꞌik mauwakary. “Aunaꞌu nii naꞌiam pidian kian: ‘Unkarinhan’”, naꞌik “aunaꞌu nii naa pauwaꞌa pidian maukan”. — Isaiah (Isaías) 33:24; Revelation (Apocalipse) 21:4.

• Ytaan nii kaimenaꞌu maxaapkary aunaꞌu nii naa pauwaꞌa tarikery naꞌii. “Ymanawynyꞌu nii manawyn kaimenaꞌu maxaapkary pydainhau at”, naꞌik “insakantan nii papauribeinhau waran ii, aunaꞌu nii pauwaꞌa intarichan patarybnau ai.” — Isaiah (Isaías) 54:13; Micah (Miqueias) 4:4.

• Kaimenaꞌu nii kaydinkizei ipei pidiannau at. “Unwidiayan nii inhau marainpen nii paxaꞌapatnii kaydinkizei. Aunaꞌu nii inkaydinhan madiweytapkau.” — Isaiah (Isaías) 65:22, 23.

• Ysaabaan nii aimeakan kid ipei amazada kawan at. “Baaraz naꞌik amazada aradaꞌu kunaykian nii, baaraz kunaykian nii ytaan nii susui kid naꞌap açafrão kawan.” — Isaiah (Isaías) 35:1.

• Pidiannau tuminhapkidkeu nii kanum kiz inxaꞌapat karikeunan kiz inmaxaapan. “Kaikepaꞌu wyryꞌy karikeunanyꞌuraz kakypkary ikudkau: pidiannau aichipan idiaꞌan suu baydap pygary mixiꞌu Tuminkery, naꞌik in aichipan idiaꞌan ungary, Disu Kristu, pydiyydaniaz imiꞌi baara at.” — John (João) 17:3.

Tuminkery taaꞌazun kaimen kidiaꞌu aimeakan pyꞌat. (Isaiah [Isaías] 48:18) Diura karichi aidiyan nii kanum kiz pyxaꞌapat kai pymaxaap kiz kaimenaꞌu amazada idiaꞌa diinheꞌitiꞌi.