Tuminkery kian Pakarichian idiaꞌa ytaan nii waꞌat ‘kaimenaꞌu maxaapkary naꞌik ytaa wazaidap kinha nii kaimen kidiaꞌu aimeakan ytaazuniaz waꞌat’. a (Jeremiah [Jeremias] 29:11) Tuminkery saad kidnii paparadan “maꞌuzakadaꞌu nii wanhikynyy aunaa kiz wakaxadinhan wazaidipan Tuminkery kuwadaniaz pataan nii waꞌat”. (Romans [Romanos] 15:4) Watuminpen nii kaimenaꞌu paradakary daꞌy Tuminkery Paradan idiaꞌuraz, wataap kiz wanhikynyy kunaykii. Naꞌik Tuminkery Paradan kuwad diinheꞌitiꞌi wamaxaapan nii kaimen naꞌik kunaykii kunaynimaꞌu amazada baaraꞌa.

Watuminpen nii:

•  Naꞌapam Tuminkery Karichian kaminkeꞌytan waynau pakawan kiz wazaidipan kaimen kidiaꞌu aimeakan xaꞌapan?

•  Kanum Tuminkery Karichian kuwad yxaꞌaptan nii pidiannau at?

•  Kaimenaꞌu paradakary Tuminkery diꞌikiꞌu maꞌuzakadaꞌu nii wanhikynyy

 Tuminkery Karichian taa kakinhaurii waꞌat wamaxaap kinha nii kaimen. Wyryy kakinhaurii taapan nii wanhikynyy kunaykii naꞌik aunaꞌu nii wakaxadinhan wazaidipan kaimen kidiaꞌu aimeakan xaꞌapan. Pytykap pabiꞌikid aimeakan.

•   Pydurut kakinhaurii Tuminkery Karichian idiaꞌa. Psalm (Salmo) 119:105 kian: “Pyparadan ikudazuꞌu lâmpada kawynyꞌu kanadpaꞌu nii unchiꞌik kiz, naꞌik kanadpaꞌu nii unpunaa.” Kandaꞌu ykandap aimeakan maunapaꞌu wa idiaꞌat naꞌik ykandap wapunaa. Wadubtan dun kaxaꞌapanaa kidiaꞌu aimeakan, Tuminkery Paradan taapan nii wanhikynyy kunaykii wadubatpan pyꞌy kaxaꞌur kidiaꞌu. Kaimenaꞌu kywai Tuminkery Karichian idiaꞌuraz maꞌuzakadan nii naꞌik “kunaykikidian nii wanhikynyy”. (Psalm [Salmo] 19:7, 8) Tuminkery Karichian kanadap wapunaa ykuwadan idiaꞌan dirib kaimen kidiaꞌu aimeakan daꞌy xaꞌapaꞌu nii diinheꞌitiꞌi, Tuminkery xaꞌapatazuniaz pidiannau at imiꞌi baaraꞌa. Wyryy kaimenaꞌu kywai kunaykikid waynau.

•   Pytaapad baurainhau kaminkeꞌytan pygary. Wanhikynyy kaxaꞌurtinhan dun panaadun aunaa watykpaꞌazun aunaa naꞌiauram pidian, atii wairibennau kapam. Mazan Tuminkery Karichian kakinhautan waynau, aunaa kiz waxaꞌapatinhan naꞌap, yxaꞌapanym kayꞌan panadun waxaꞌaptan nii aimeakan ma aichiapinhakadayn naꞌik ynaꞌakan nii waynau uiaꞌu diꞌit. (Proverbs [Provérbios] 18:1) Pidiannau marainpeinhawyz waynau kaminkeꞌytan nii wadiꞌitinhap kiz kaimen. Naꞌik inkakinhautan nii waynau wa aichiap kinha nii naꞌapam kiz waxaꞌapatinhan wadubatpan dun kaxaꞌapanaa kidiaꞌu aimeakan. (Proverbs [Provérbios] 11:14) Panaadun inkunaykikidian nii waynau naꞌik inmaꞌuzakadan nii wanhikynyy aunaa kiz wakakinpen wazaidipan pyꞌy aimeakan kid saabainhan. — Proverbs (Provérbios) 12:25.

•   Pyturinhap Tuminkery at. Tuminkery Karichian kian: “Ytaa Tuminkery at ipei aimeakan kimidaytaꞌu ynhikynyy, naꞌapaꞌu idiaꞌanaꞌu nii ytaapan pygary. Aunaa naꞌapainim nii ytaapadan kaimenaꞌu pidian patakaꞌytinhan manawyn.” b (Psalm [Salmo] 55:22) Tuminkery Karichian kian: ‘Tuminkery taa wazaidap kinha nii’. (Romans [Romanos] 15:13) Pyturinpen idiaꞌan pykuwad Tuminkery at “ipei aimeakan kaxaꞌurdaytaꞌu pinhikynyy”, ytaapnii wyryy pygaryz. (1 Peter [1 Pedro] 5:7, kainharibei) Naꞌik Tuminkery Karichian kian: “Ysaabaan nii naa ynau puwaa it, naꞌik ymaꞌuzakadan nii ynau kaimenaimen, mixi kiz ymixidipan, aunaa kiz ykaxadinhan.” — 1 Peter (1 Pedro) 5:10.

•   Kaxaꞌapannaꞌa kidiaꞌu aimeakan wadubatpan tuminhapkid waynau, marii kiz wamixidian Yewah yryꞌu nii wazaidipan saabaaꞌu nii kaxaꞌur kidiaꞌu aimeakan. Tuminkery Karichian kuwadan: “Pidian abataꞌuraz Tuminkery ymaxaapan nii kaimen naꞌik kazanatinhap, aunaꞌu nii ydupitinhan aimeakan dikeydaꞌu xaꞌapan dun paꞌat.” (Proverbs [Provérbios] 1:33) Austrália ii, maꞌuzkaꞌu awary dubtan Margaret dap idiaꞌan, uwaziwe dirib paxaꞌapayz kid. Mazan ypyꞌy aunaa udupian, yxaꞌapanym kayꞌan utuminhapnii: ipei wyryy pidian xaꞌapayz, aunaa karikeunanyꞌu nii man ynaꞌayzun, baydap kamuu yzaman nii uu ypatakaꞌyinhan nii. Yryy daynaꞌan, pauwaꞌa zii umaꞌuzakadan pamixidian, utaap kiz kiwiichap kanum ymanawynyꞌuraz manawyn — uiribennau, uminhaydaꞌynau, ukaminhaydaꞌytinpen Tuminkery tym naꞌik uzaidipan kaimen kidiaꞌuraz aimeakan Tuminkery kuwadaniaz xaꞌapaꞌu nii diinheꞌitiꞌi. — Psalm (Salmo) 37:34; James (Tiago) 4:8.

 Tuminkery Karichian kuwadan kaimen kidiaꞌu aimeakan xaꞌapan nii diinheꞌitiꞌi pidiannau at daꞌaa imiꞌi baaraꞌa. Aunaꞌu nii ytuminikin yxaꞌapan. Wyryy kaxaꞌapanaa kidiaꞌuraz wadubatpaniaz aizii kainhaabatan waꞌat wamaxaapan naa diuraz “amazada ikudaꞌanan diꞌitiꞌi naa patukun”. (2 Timothy [2 Timóteo] 3:1-5) Atazunaa Tuminkery saaban diura amazada naꞌik ymainhaabatan nii baitinkery naꞌik ipei dikeyd kidiaꞌu. Ysaabaan nii wyryy amazada paNaubunaitinpen idiaꞌan, ykazuwaytipan nii ipei amazada. (Daniel 2:44; Revelation [Apocalipse] 11:15) Disu kuwadnii wyryy Naubunaitinhapkizei daꞌyan, ytuminhapkidian dun papuchurynau turinhapkary daꞌy: “Marii kiz pyNaubunaitinhan. Marii kiz aimeakan kid xaꞌapan pi aipen kawan at. . . daꞌaa imiꞌi baaraꞌa.” — Matthew (Mateus) 6:9, 10.

 Tuminkery Karichian kuwadan kaimenaimen kanumaꞌu nii Tuminkery xaꞌapat pidiannau tym. Pytykap pabiꞌikid aimeakan baitin kidiaꞌu pidiannau aizii naꞌik naꞌapam nii Tuminkery Naubunaitinpen mainhaabatan:

•   Zamaz. “Pauribei kid sudan nii naꞌik inkaꞌakan nii maduwaka.” — Psalm (Salmo) 67:6.

•   Rinhei. “Aunaꞌu nii naꞌiauram pidian kian: ‘Unkarinhan.’” — Isaiah (Isaías) 33:24.

•   Mauwakary. Tuminkery “inuan nii in awyn yy kid, aunaꞌu nii naa puwaꞌa pidian maukan uu kaxaꞌuran, uu zaadayzun uu baiaapan kaziweꞌu. Yxaꞌapanym kayꞌan kiwiichipaꞌuraz uiaꞌu xaꞌaptayzkariwei kidiaz mainhaabatkau idiꞌi naa.” — Revelation (Apocalipse) 21:3, 4.