Han Disyembre 13, 2019, iginpahibaro han mga Saksi ni Jehova ha internasyonal nga kombensyon ha Buenos Aires, Argentina, nga nahuman na an Bag-o nga Kalibotan nga Hubad han Kristiano Griego nga Kasuratan ha Argentinean Sign Language (LSA). Ini an siyahan nga higayon nga an Kristiano Griego nga Kasuratan ginhubad ha LSA.

Han Disyembre 3, 2014, gintikangan han usa nga translation team inin hilawig nga proyekto. Nagtikang hira ha libro han Mateo. Tungod kay an mga publikasyon ha sign-language iginpupublikar sugad nga video, kada kahuhuman han tagsa nga libro, iginbubutang dayon ito ha JW Library Sign Language nga app.

Sumala han mga pag-usisa, may-ada mga 400,000 an nagamit hin LSA ha Argentina. Kaupod hito an mga 2,700 nga magwarali nga nagamit hin LSA​—470 hito mga ngula. Hi Sister Laura Losada, nga usa nga ngula ngan maopay mag-LSA, nagsiring: “Malipayon ngan mapasalamaton ako kan Jehova tungod han iya ginhatag nga daku nga bulig. Hadto, han waray pa ako Biblia ha LSA, naniningkamot ako pagbasa han inispanyol nga hubad pero diri ko nasasabtan an akon ginbabasa. Yana, tungod hinin bag-o ngan klaro nga hubad, inabat ko nga mas nagrig-on an akon relasyon kan Jehova.”

An kabugtoan nga nagamit han LSA mapasalamaton kan Jehova tungod hinin masayon masabtan nga hubad, nga makakabulig ha ira nga magpabilin nga marig-on ha espirituwal. Sigurado kami nga ini nga kahuhuman pa la nga kompleto nga hubad makakabulig liwat ha mga magwarali nga mabuligan an mas damu pa nga ngula ha Argentina nga magin sangkay han Dios.​—Buhat 13:48.