Nagtitikaduro an pagkasunog han kagurangan ha Australia. Han 2019, nahirekord an pinakamapaso ngan pinakamamara nga temperatura hito nga nasud. Tikang han Septyembre, damu na nga terible nga sunog an nahitabo ha tagsa nga estado han Australia. Bisan kon tinikangan pa la ini han fire season ha Australia, damu na hinduro nga sunog an nahitabo didto. An pinakaapektado nga mga lugar amo an baybayon ngan sur-este nga mga rehiyon, Victoria ngan New South Wales.

Waray iginreport nga kabugtoan nga namatay o nasamaran, pero damu gud an nawad-an hin propyedad, upod na an lima nga balay nga naugtang han kalayo. Ha pagkayana, sobra 700 nga kabugtoan an gin-ebakwit. Damu nga Saksi nga pamilya an bumaya ha apektado nga mga lugar tungod han duro nga aso, nga siring pa han pipira nga eksperto peligroso gud ha mga makakahanggab hito. Kadam-an han nag-ebakwit an nakilungon ha ira kapamilya, kasangkayan, o ha kabugtoan ha kahigrani nga mga kongregasyon, nga waray maapektohi han sunog.

An sanga nga opisina ha Australasia nagporma hin duha nga Disaster Relief Committee para magtagana hin espirituwal ngan materyal nga bulig. Ginpaparig-on an kabugtoan ha apektado nga mga rehiyon han duha nga paramangno han sirkito ngan han mga membro han Komite han Sanga. Bisan kon kadam-an han aton kabugtoan nga naapektohan han sunog mga kapoy, ha pisikal man o ha emosyonal, damu an nagpahayag hin kinasingkasing nga pagpasalamat tungod han tim-os nga Kristiano nga gugma nga padayon nga iginpapakita han aton kabugtoan.​—1 Pedro 2:17.