Han Abril 16, 2018, ginsuportaran han Korte Suprema han Azerbaijan an desisyon han hamubo nga korte nga baydan hin danyos hira Irina Zakharchenko ngan Valida Jabrayilova tungod han 11 ka bulan nga diri makatadunganon nga pagpriso ha ira. Antes hito, han Pebrero 2017, gin-abswelto na han Korte Suprema inin duha nga babaye ha kriminal nga akusasyon nga nananaltag hira hin relihiyoso nga mga literatura nga waray permiso han Estado. Kondi an mga civil court an ginpadesisyon han Korte Suprema may kalabotan ha pagbayad han danyos.

Katapos maabswelto ha ngatanan nga akusasyon, hira Ms. Zakharchenko ngan Ms. Jabrayilova, nga mga Saksi ni Jehova, naghangyo ha mga civil court nga mabaydan hira tungod han sayop nga pagtratar ha ira. Han Agosto 2017, inabuyon an district court nga baydan hira hin danyos, pero igin-apela han Ministry of Finance ito nga desisyon. Han Nobyembre 2017, ginsuportaran han usa nga court of appeals an desisyon han district court. Nag-apela utro an Ministry of Finance ngan nagpasaka hin Cassation Complaint ha Korte Suprema han Pebrero 2018. Iginbasura han Korte Suprema an apela han Ministry of Finance ngan ginsuportaran an desisyon nga baydan hin danyos an duha nga babaye.

Labot la han pagbayad hin danyos, ginkilala liwat han Korte Suprema an kadaot nga naeksperyensyahan nira Ms. Zakharchenko ngan Ms. Jabrayilova ha mga opisyal, nga nag-abuso han ira awtoridad ngan nagtalapas han mga katungod hinin inosente nga mga babaye.