Hi Brother Femi Durodola ngan an iya asawa, hi Yana, nakamata han alas-5:00 ha aga tungod kay gintawagan hira han usa nga tigurang ha ira kongregasyon. “Nagsiring an tigurang: ‘Ayaw kabaraka, pag-andam la. An mga sundalo han Russia tikanhi na ha Kyiv!’” nagsiring hi Yana. “Han ginsiring niya ito, ginkulba ako hinduro.”

Inin bag-o nga mag-asawa nagliwan, nagtimpla han kape nga ultimo nga ira iinumon ha ira balay, ngan nagbasa han teksto para hito nga adlaw. Ito nasiring: “Magigin makusog kamo kon magpapabilin kamo nga kalmado ngan masarig kamo.” (Isaias 30:15) Sinsero gud hi Femi nga nag-ampo kan Jehova. Hi Femi, nga tikang ha Nigeria, ngan hi Yana, nga tikang ha Ukraine, nagkuha han ira mga go bag ngan ginbayaan an ngatanan basi pumalagiw ngadto ha Netherlands.

Sugad hito an naeksperyensyahan han kadam-an han aton kabugtoan nga nagdesisyon nga pumalagiw tikang ha Ukraine katapos umatake an Russia han Pebrero 24, 2022. Mga 130,000 an Saksi ni Jehova ha Ukraine. Ha pagkayana, sobra 36,000 nga Saksi an nagdesisyon nga pumalagiw tikang ha ira mga urukyan ngan sobra 16,000 ha ira an pinalagiw ngadto ha iba nga nasud. Damu an binaya ha ira mga balay, trabaho, ngan kongregasyon. Durante han girra, an mga lalaki nga taga-Ukraine nga 18 tubtob 60 anyos diri gintutugotan nga bumaya ha nasud. Pero an mga lalaki nga taga-iba nga nasud nga naukoy didto gintutugotan nga bumaya.

Pipira ngan importante la nga mga butang an puydi dad-on hadton mga pinalagiw. Bisan kon makuri an pagbiyahe, sumakay hira hin mga tren o bus basi makabiling hin talwas nga lugar, ngan usahay diri hira maaram kon diin an ira destinasyon. An ira marig-on nga pagtoo kan Jehova naghatag ha ira hin kusog nga bayaan an mga syudad nga gindaot han girra, ngan diri hira maaram kon makakabalik pa hira.

“Ginbayaan namon an ngatanan. Pipira la nga butang an amon gindara,” siring ni Yana. “Ini nga sitwasyon nagpahinumdom gud ha amon nga an importante la amo an imo relasyon kan Jehova.”

Tikang ha iya balay ha Kyiv, nababatian ni Sister Lilia Antoniuk an makusog nga mga sirena nga nagpapahamangno nga may mabuto nga mga bomba ngan an makusog nga mga pagbuto. Ha mga kalsada, may sunog nga mga awto ngan nagsarang nga mga guba tikang ha mga bilding ngan mga tulay.

Hi Lilia ngan an iya 17 anyos nga anak nga babaye, hi Oleksandra, nagdesisyon nga bumaya ha Ukraine. Ha sulod hin pipira ka adlaw, nagbiyahe hira sakay hin tren nga puno nga tipakadto ha Poland. Gutiay gud la an ira pagkaon ngan natindog la hira hin pipira ka oras. Naibanan an kabaraka hini nga mga sister han inabot hira ha Przemyśl, Poland.

“Pakakita namon ha kabugtoan nga may kapot nga ‘JW.ORG’ nga mga karatola, maaram kami nga aatamanon nira kami,” siring ni Lilia. Gindara hira ha usa nga Kingdom Hall basi diri hira hagkuton ngan makakaon hira ngan makapahuway. Waray pag-iha, ginbalhin hira ha usa nga balay.

“Gin-abat namon an pag-ataman ni Jehova ngan nagrig-on an amon pagtoo,” siring ni Lilia, nga naukoy na yana ha Germany. “Mapasalamaton gud ako kan Jehova tungod ha iya gugma ngan ha kabugtoan nga andam bumulig hinin makuri nga panahon.”

Iginsumat ni Sister Anastasiia Kovalyova kon paonan-o gin-atake han mga taga-Russia an syudad han Zaporizhzhia. Tikang ha iya apartment, nakikita ngan nababatian niya an tigda nga pagpawa ngan mga pagbuto tungod ha mga pambomba. An mga umangkon ni Anastasiia, nga syete ngan tres anyos, nagkaada truma tungod han sunod-sunod nga mga pambomba salit nagdesisyon hira nga bumaya. “Diri damu an puydi namon madara, salit kulang kami hin mga bado ngan iba pa nga butang,” siring ni Anastasiia. “Pero igintagana han kabugtoan an ngatanan. May-ada kami han tanan nga butang nga amon kinahanglan, ngan sobra pa an amon nakarawat.” Hi Anastasiia, an iya hipag nga hi Anya, ngan an mga bata nagbiyahe tipakadto ha Germany nga ha Poland inagi.

Hi sister Anastasiia Shchukina ngan an iya nanay, hi Sister Olha Lysenko, natago ha matugnaw nga basement han ira gutiay nga balay ha kada pakakabati nira han mga sirena nga nagpapahamangno han mga pambomba. Inin payunir nga mga sister nag-aalagad diin may daku nga panginahanglan ha gutiay nga bungto han Brailiv, Vinnytsia Oblast. Nakurian hira pagdesisyon kon mabaya hira o diri, pero ha urhi, nagdesisyon hira nga bumaya han nagin mas peligroso an sitwasyon. Importante la nga mga butang an ira gindara, ngan nagbiyahe hira hin duha ka adlaw sakay hin tren, ngan gutiay la an ira katurog. Diri masayon an pagpalagiw para kan Olha, nga 58 anyos ngan may mga problema ha kahimsog. Inabot hira ha Rzeszów, Poland, han alas-2:00 han maagahon. May pipira nga kabugtoan nga nakadto basi tapoon hira. “Bisan kon maagahon adto, naghulat ha amon an mga bugto,” siring ni Anastasiia. “Mapasalamaton gud kami kan Jehova ngan ha mga kabugtoan.”

Ha syudad han Sumy, hi Brother Andrzej Chyba—nga tikang ha Poland—ngan an iya asawa, hi Elizabeth, nga tikang ha Britain, nagtago ha basement ha balay han usa nga bugto upod an lima nga iba pa. Nabatian nira an mga eruplano nga pan-girra pati an mga purupsilay ngan mga pambomba. An mga bugto nagkaada kaisog han ginkita nira an drama nga basado ha Biblia nga O Jehova, ha Imo Nasarig Ako, nga nagsusumat han ginhimo ni Hadi Hezekias han inabot an mga Asiryano basi atakehon an Jerusalem.

“An mga kabugtoan nagpadara ha amon hin iba-iba nga mensahe nga basado ha Kasuratan, sugad han pagdasig nga basahon an Salmo 27,” siring ni Andrzej, nga yana naukoy na ha Poland, kaupod an iya asawa.

Nasarig kita nga bibendisyonan ni Jehova an aton kabugtoan nga ‘binaya ha ngatanan nga butang’ samtang naglalaom hira ha tiarabot nga waray na girra.—Filipos 3:8.