Han nagtikang an girra ha Ukraine, hi Iryna Makukha, 46 anyos nga solo nga sister, kinadto ha estasyon han tren ha Kharkiv. Nagdesisyon hiya nga magigin mas talwas hiya kon mabaya hiya ha nasud. Masamok hinduro an kahimtang, an mga tawo nasakay ha mga tren nga diri maaram kon tipakain ito. An tren nga ginsakyan ni Iryna linarga ha estasyon nga sarado an mga bintana basi maibanan an posibilidad nga atakehon. Han nakalarga na an tren ha estasyon, dida la niya nasabtan nga tipakadto ito ha Slovakia.

Hi Iryna naukoy na yana ha Czech Republic, inabot hiya ha Prague, an kapital nga syudad, han Marso 3, 2022. Nagtatrabaho hiya sugad nga dyanitor ngan naukoy ha usa nga apartment kaupod an duha pa nga sister nga taga-Ukraine, nga mga refugee liwat. Hi Iryna nag-aaram hin Czech ngan iginpadayon niya an iya bug-os-panahon nga ministeryo, nga dida hito nakapokus an iya kinabuhi ha sulod hin 20 ka tuig.

“Nakita ko mismo kon paonan-o kami gin-aataman ni Jehova pinaagi han iya katawohan. Naparig-on gud hito an akon pagtoo,” siring ni Iryna.

Haros 23,000 han aton kabugtoan an nagdesisyon nga bumalhin ha iba nga mga nasud. An mga nagdesisyon nga kumadto ha iba nga nasud bangin aada na ha mas talwas nga lugar, pero kinahanglan la gihapon hira mamiling hin trabaho ngan urukyan, kumuha hin legal nga mga dokumento, ngan ipaenrol an ira mga anak ha bag-o nga mga eskwelahan, samtang nag-aaram hin bag-o nga yinaknan. Inabat nira nga an ira rutina ha pag-alagad kan Jehova ngan an mahigugmaon nga kabugtoan daku gud nga bulig durante hinin makuri hinduro nga panahon.

An tulo nga membro han pamilya Perceac, nga hira Anatoli, Olena, ngan an 17 anyos nga hi Alina, nagtikang hin bag-o nga pagkinabuhi ha Romania katapos mabungkag tungod han pambomba an mga bahin han ira komunidad ha Mykolaiv Oblast, Ukraine. Ini nga pamilya binalhin han Marso 6, 2022. Tungod kay hi Anatoli tuminungnong han Moldova, gintugotan hiya nga dad-on an iya pamilya ha Romania. Ginhulagway ni Olena an pagbalhin ha iba nga nasud nga sugad hin “paggabot hin usa nga kahoy upod an mga gamot hito ngan ibalhin ito ha iba nga lugar.”

Ha bulig han kabugtoan ha Romania, an pamilya Perceac may-ada na yana kalugaringon nga apartment. Dugang pa, hira Anatoli ngan Olena may mga trabaho na, ngan natapos na ni Alina an iya mga asaynment online ha iya eskwelahan ha Ukraine.

Ginbubuligan han kabugtoan ha Romania diri la an materyal nga panginahanglan han pamilya, kondi pati liwat an ira emosyonal ngan espirituwal nga panginahanglan. An kabugtoan regular nga naggagahin hin panahon nga makaupod an pamilya basi diri hira mingawon didto ha iba nga nasud. Hira Olena ngan Alina nag-aaram hin Romanian gamit an JW Language nga app ngan pinaagi ha pakigbahin ha ministeryo kaupod an ira bag-o nga mga kakongregasyon. Hi Anatoli nagdaku nga nagyayakan hin Romanian.

“Nakita namon an bulig ni Jehova tikang pa ha tinikangan,” siring ni Anatoli. “Inabat namon an gugma ni Jehova pinaagi han iya organisasyon ngan han suporta han kabugtoan.”

Hi Alina Havryliuk, nga balo na antes han girra, ngan an iya 16 anyos nga anak nga hi Vladyslav, inabot ha Suwałki, Poland, tikang ha Vinnytsia, Ukraine, han Pebrero 27. “Ha siyahan, naghunahuna ako kon diin kami ngan han akon anak maukoy ngan kon paonan-o namon susuportaran an amon kalugaringon, pero nasarig liwat ako nga aatamanon kami ni Jehova,” siring ni Alina.

Hi Alina, nga 37 anyos, namiling dayon hin trabaho nga diri makakaulang ha iya pagtambong ha mga katirok. Nakaagi hiya hin trabaho sugad nga dyanitor ha usa nga eskwelahan. “An pinakaimportante, ini nga trabaho naghahatag ha akon hin mas damu nga oportunidad nga makigbahin ha ministeryo ngan pinaagi hini nasusuportaran ko an akon pamilya,” siring niya.

Hira Alina ngan Vladyslav nag-aaram hin Polish ngan padayon nga nag-aalagad sugad nga auxiliary payunir ha usa nga kongregasyon nga nagyayakan hin Polish. Hi Vladyslav nagpaenrol liwat ha hayskul.

An aton kabugtoan ha Ukraine nakakaeksperyensya hin duro nga mga problema ngan pagbag-o, pero padayon nga gintatagan hira ni Jehova han diri ordinaryo nga gahum. Nagin tinuod ha ira an mga pulong ha 2 Corinto 4:8: “Gin-iipit gud kami ha ngatanan nga paagi, pero diri naghuhuruot nga diri na nakakagios; diri kami maaram han hihimoon, pero diri nga waray na gud magagawsan.”