Tikang han Abril 1, 2022, an mga Saksi ni Jehova binalik pagkatirok ha mga Kingdom Hall. An bisan ano nga kabaraka nga bangin inabat han aton kabugtoan madagmit nga nasaliwnan han katatawa, mga luha han kalipay, ngan malipayon nga pagkanta han mga Kingdom song.

Para ha iba, ito an ira pinakasiyahan nga pagkadto ha usa nga Kingdom Hall.

“Ini an akon siyahan nga pagtambong hin katirok ha Kingdom Hall,” siring ni Brother Krzysztof Hoszowski nga taga-Poland. “Nahibaroan ko an kamatuoran pinaagi ha videoconference ngan an akon bawtismo gin-stream pinaagi ha Zoom. Maaram ako kon ano an nahitatabo ha mga katirok ha Kingdom Hall kay damu na nga video an akon nakita mahitungod hito. Nalipay ako hinduro tungod han minagburugto nga gugma, kalipay, ngan pagkabuotan nga akon naeksperyensyahan ha katirok.”

Katapos nga nagkaada COVID-19 ha bug-os nga kalibotan han Marso 2020, an mga Saksi ni Jehova natikang pagkatirok pinaagi ha videoconference. An diri makakatambong ha mga katirok ha Kingdom Hall puydi la gihap tumambong ha mga katirok pinaagi ha videoconference.

“Han nagtikang an musika ngan dinungan ako pagkanta han siyahan nga kanta, malipayon ngan mapasalamaton gud ako kay nakaupod ko na liwat an akon kabugtoan ha siyahan nga higayon paglabay hin duha ka tuig,” siring ni Brother Neil Campbell nga taga-Edinburgh, Scotland.

Nagpapasalamat kita kan Jehova kay ginbendisyonan niya an pagbalik han aton mga katirok ha mga Kingdom Hall.—Salmo 84:10.