Han Hunyo 1, 2023, damu nga pasilidad han Bethel ha bug-os nga kalibotan an gin-abrihan utro para ha pag-tour. Sobra tulo na ka tuig an naglabay han naundang an pag-tour tungod han COVID-19 nga pandemya. Espesyal gud ito nga adlaw para ha mga membro han pamilya han Bethel ha bug-os nga kalibotan ngan ha yinukot nga magtu-tour.

Samtang naabot an mga bisita, ginwi-welcome hira han mga Bethelite pinaagi hin mga plakard, kanta, hiyom, ngan hangkop. Hi Ellis Bott nga nagtikang pag-alagad ha world headquarters ha Warwick, New York, ha panahon han pandemya, nagsiring: “Makalilipay gud makita an mga Bethelite nga nagpipila ha gawas han lobby nga may mga plakard ha pag-welcome! An mga luha han kalipay nga akon nakita nagpahinumdom ha akon nga espesyal gud an Bethel.” Hi sister Alexis Alexander, usa nga part-time commuter Bethelite, eksayted gud nga makaupod ha pag-welcome ngan pag-abiabi ha mga magtu-tour. Nagsiring hiya: “Makalilipay gud makita an gugma han kabugtoan para kan Jehova ngan ha Iya balay.”

Eksayted gud hi Mi-yeon Jo nga dad-on an iya otso anyos nga anak nga hi Yoon, basi mag-tour ha branch office ha South Korea. Eksayted gud hi Yoon nga mag-tour ha Bethel salit haros diri hiya mahingaturog ha gab-i antes hito. Siring ni Mi-yeon: “Pagmata namon, namati kami dayon han kanta mahitungod han pag-tour nira Caleb ngan Sophia ha Bethel. Ngan ginpatokar namon ito bisan ha amon biyahe pakadto ha branch.” Nag-enjoy gud hi Yoon pag-tour ngan nakasiring hiya: “Animals na la an kulang ha Bethel para magin paradise.”

Hi Noah Johnsen, usa nga batan-on nga lalaki tikang ha Alberta, Canada, nga may sakit nga spinal muscular atrophy, maiha na nga naghihingyap nga makag-tour ha Bethel ha New York, U.S.A. Tungod han iya kondisyon diri hiya makakagbiyahe pinaagi hin eruplano, salit iginbiyahe hiya han iya kag-anak hin mga 4,100 ka kilometro (2,500 ka milya) para makag-tour ha branch ha United States ha Wallkill, New York. Han ginhinumdom ni Noah an iya pag-tour, hiya nagsiring: “Ito nga eksperyensya maisasaysay hin usa nga pulong—gugma. Gin-abat ko an gugma ni Jehova ngan han kabugtoan.”

Hi Fyodor Zhitnikov nga 76 anyos ngan an iya asawa nga hi Yulita, eksayted gud nga makag-tour ha museum han Bethel ha Kazakhstan. Ha usa nga bahin han museum, iginpapakita an pipira nga kabugtoan nga matinumanon nga nagpailob hin mga dekada. Ini nga exhibit espesyal gud kan Fyodor, nga nag-alagad kaupod han damu ha ira. Mapasalamaton gud hi Fyodor han maopay nga pagkahimo han exhibit. Hiya nagsiring: “Kon nairekord han kabugtoan an amon ministeryo ngan mga ginbuhat ha naglabay nga katuigan, mas labi na nga gin-aapresyar ngan diri hingangalimtan ni Jehova an tanan nga aton ginbubuhat.”

Nalilipay kita nga makakag-abiabi na kita utro hin mga bisita ha Bethel ha bug-os nga kalibotan. Eksayted kita nga abiabihon an yinukot pa nga mabisita ha masunod nga mga adlaw!—Salmo 122:1.

An mga piktyur ha ubos nagpapakita han kabugtoan nga nag-tour ha iba-iba nga pasilidad ngan museum han Bethel.