Gintututukan gud han world headquarters han mga Saksi ni Jehova an pagkalyap han sakit nga novel coronavirus (kilala ha tawag nga COVID-19). Hinbaroan naton ha tagna han Biblia nga an epidemya bahin han tigaman han kataposan nga mga adlaw. (Lucas 21:11) Kon may-ada nagkalyap nga sakit, maaramon an paghimo hin praktikal nga aksyon para maproteksyonan an aton kalugaringon ngan an iba.—Proberbios 22:3.

Bangin nahunahuna han iba kon kumusta an aton kabugtoan ha mga apektado nga mga lugar. Daku gud an epekto han pagkalyap han COVID-19 ha mga sanga nga opisina ngan mga kongregasyon ha Italy, Japan, South Korea, ngan ha iba pa nga nasud. May mga sanga nga opisina nga diri la anay nakarawat hin tour ngan mga bisita tikang ha gawas. Ha iba nga nasud, ginbawal han gobyerno an pagkaada dagku nga katitirok, amo nga kinahanglan kanselahon han sanga nga opisina an sirkito nga mga asembleya. Dugang pa, ha pipira nga lugar, kinahanglan bag-uhon han mga kongregasyon an ira mga kahikayan ha pagministeryo ngan mga katirok. Bisan pa hini nga mga problema, padayon nga ginpaparig-on han aton kabugtoan an ira espirituwalidad ngan nagdidinasigay hira ha kada tagsa.—Judas 20, 21.

Hini nga mga sitwasyon, nakita han aton kabugtoan nga mapulsanon an mga prinsipyo ha ubos. Makakabulig liwat ini nga mga punto ha imo ngan ha imo pamilya kon kalyap ha iyo lugar an sakit.

• Ayaw Pagpanik. Bisan kon maopay nga magin alerto kita ha mga epidemya ngan maghimo hin praktikal nga mga pitad basi maproteksyonan an aton kalugaringon, diri kita sadang magpanik tungod han kahadlok.—Proberbios 14:15; Isaias 30:15.

• Sunda an mga Ginrirekomendar Ngan Ginsisiring han Gobyerno. Agsob nga naghahatag an lokal nga mga awtoridad hin mga pahinumdom o restriksyon basi maproteksyonan an publiko. Maopay nga magin updated hini ngan sumunod ha ginsisiring han gobyerno.—Roma 13:1.

• Magin Limpyo Pirme. Importante nga maghunaw ka pirme gamit hin sabon o gumamit hin alcohol-based hand sanitizer. Sadang liwat naton limpyohan pirme an mga parte han aton balay ngan Kingdom Hall nga agsob makaptan. Dugang pa, diri gin-aaghat han mga doktor an paglamano ha sugad nga mga sitwasyon, kay makakatapon ini hin sakit. May kalabotan ha coronavirus, an World Health Organization naghatag hin dugang nga pahinumdom ha publiko.

• Magpakita hin Gugma ha iba. Maaram kita ngatanan nga importante an pagtambong ha mga katirok ngan pakigbahin ha pagsangyaw, pero kon may sakit ka, mas maopay kon magpabilin ka na la ha balay basi diri ka makatapon ha iba. Pagpakita ito hin gugma ha kabugtoan ngan napuproteksyonan hira hito pati an iba nga diri Saksi.—Mateo 22:39.

• Sunda an Temporaryo nga mga Pagbag-o han mga Kahikayan ha Kongregasyon. Ha mga lugar diin kalyap an sakit, bangin kinahanglan temporaryo nga kanselahon han sanga nga opisina an mga katirok ha kongregasyon, asembleya, ngan iba pa nga espesyal nga mga katirok. Ini an ginhimo ha mga lugar nga duro nga naapektohan han COVID-19 virus, sugad han pipira nga rehiyon ha Italy, Japan, ngan South Korea. Uyon ha lokal nga mga kahimtang, mahimo tagan han mga tigurang hin access an mga magwarali han nakarekord nga mga katirok basi ha balay na la nira ito kitaon. Mahimo makigbahin ha pagsangyaw an mga magwarali pinaagi ha pagtawag, pagteks, pag-e-mail, o pagsurat.

Makikita ha ubos an mga reperensya nga nagsusulod hin mapulsanon nga mga prinsipyo para maproteksyonan kita kontra ha sakit.

• “Panalipdi an Imo Kalugaringon nga Diri Magkasakit” Pagpamata! Num. 6 2016, pahina 4-6

• “Paraan Para Maging Mas Malusog” Gumising! Hunyo 2015, pahina 2-7

• “Puwede Kang Maging Mas Malusog: Tip #4—Ingatan ang Iyong Kalusugan” Gumising! Marso 2011, pahina 7