An Democratic Republic of the Congo, ha central Africa, naatubang hin peligroso nga mga sitwasyon tungod han mga bagyo ngan maiha nga pagbaha. Iginreport han sanga nga opisina han mga Saksi ni Jehova ha Congo (Kinshasa) nga damu nga saksi an naapektohan han pagbaha. Makasurubo, ha Kinshasa, an kapital nga syudad, usa han aton bugto an namatay tungod han pagbaha.

Iginreport han sanga nga opisina ha Congo (Kinshasa) an masunod:

• Ha sur-weste nga probinsya han Kasai, naguba an mga balay han unom nga Saksi nga pamilya tungod han makusog nga hangin ngan duro nga pag-uran.

• Usa nga Kingdom Hall ha norte-weste nga probinsya han Sud-Ubangi an naunlod han baha. Ini nga pasilidad ginagamit han tulo nga kongregasyon nga may 69 nga magwarali. Naapektohan gihap han pagbaha an 22 nga pamilya hito nga lugar. Nagtoka an sanga nga opisina hin espesyal payunir ngan usa pa nga tigurang para mag-organisar han materyal nga bulig ngan magparig-on ha mga apektado nga naukoy hinin makuri makadtoan nga lugar.

• Ha probinsya han Tshopo, an kabugtoan nga naukoy ha ligid han Congo River ginpaebakwit. Sugad man, usa nga Kingdom Hall hito nga lugar an ginbaha.

• Ha Kinshasa, an kapital nga syudad, iginreport han mga kongregasyon nga may-ada diri maminos 80 ka pamilya an naapektohan han pagbaha.

An mahugaw nga palibot nga resulta han pagbaha posible gud magdara hin epidemya. Salit an sanga nga opisina nagtagana ha mga magwarali hin impormasyon kon paonan-o mapuproteksyonan an ira kahimsog.

Bisan pa hinin makuri nga mga sitwasyon, nagbuburubligay an kabugtoan ha ira materyal nga mga panginahanglan, sugad hin pagkaon ngan bado. Ilarom han paggiya han sanga nga opisina, an mga Disaster Relief Committee nagtatagana liwat hin bulig.

Maaram kita nga an aton mga pag-ampo, sugad man an materyal ngan espirituwal nga bulig nga igintatagana han organisasyon ni Jehova, ‘magliliaw ha ngatanan nga nabibido’ durante hinin peligroso nga mga panahon.​—Isaias 61:1, 2.