Ha Enero 22, 2020, ginlalaoman nga may ipapalusad na nga desisyon ha kaso nira Roman Markin ngan Viktor Trofimov. An prosekusyon naghangyo ha korte nga sentensyahan hira hin unom ngan tunga ka tuig nga kapriso.

An pagtimaraot kontra hini nga kabugtoan nagtikang hadton Abril 18, 2018, han ginsulod han armado ngan nakamaskara nga mga pulis an ira mga balay ha Polyarny nga syudad han Russia. Inabot an mga pulis ha katutnga han gab-i ha balay ni Bugto Markin ngan ira gin-guba an purtahan. Gamit an de kalibre nga mga armas, ira gintarhog hi Bugto Markin ngan ginpahapa ha salog samtang gin-uusisa an iya balay. An iya 16 anyos nga anak nga babaye, nga presente han ginhimo an raid, ginpahapa gihap ha salog samtang an iya duha nga kamot nakatabon ha iya ulo.

May upat pa nga balay han mga Saksi nga gin-raid hito nga gab-i. Sobra usa ka dosena han kabugtoan an gin-aresto han mga pulis, upod na hira Bugto Markin and Trofimov. Gindara hira ha estasyon han pulis para ha interogasyon. Katapos hito, an Polyarny District Court han Murmansk nagdesisyon nga prisuhon la anay hira Bugto Markin ngan Trofimov samtang ginhuhulat an pagbista han ira kaso. Haros unom ka bulan nga ginpriso ini nga mga bugto, nga ginsundan pa hin upat ka bulan nga house arrest. Han Pebrero 7, 2019, narelis hira tikang ha ira pagka-house arrest. Bisan kon waray na hira ha sugad nga kahimtang, ginlimitahan an ira pagbiyahe ngan pakigkomunikar samtang ginhuhulat an desisyon han ira kaso.

Haros 300 nga Saksi an naatubang hin mga kaso kriminal ha Russia. Igin-aampo naton nga hira ngatanan magpadayon ha pagin maisugon ngan marig-on, ngan kombinsido kita nga waray makakabulag ha ira ha gugma ni Jehova.​—Roma 8:38, 39.