Han Disyembre 31, 2019, gin-anunsyo han gobyerno han South Korea nga adton bag-o pa la nga ginpagawas ha prisohan nga 1,879 nga nagdumiri ha pagsundalo tungod han ira gintotoohan tatagan hin espesyal nga pardon. Bisan kon diri tatanggalon an ira rekord han pagkapriso, kakanselahon han gobyerno an bisan ano nga restriksyon ha ira. Ini nga espesyal nga pardon amo an pinakabag-o nga resulta han desisyon nga ginhimo ha 2018 han Constitutional Court ngan Korte Suprema. Ira ginkilala nga an pagdumiri ha pagsundalo tungod han gintotoohan, usa nga katungod ngan diri krimen.

Ha South Korea, iginpapatuman han gobyerno an lima ka tuig nga restriksyon katapos makompleto han mga priso an ira sentensya. Tungod kay an mga nagdumiri pagsundalo tungod han ira gintotoohan may rekord han pagkapriso, iginpadapat han gobyerno ini nga restriksyon ha aton kabugtoan. Salit, an aton kabugtoan diri nakakakuha hin eksam para magkaada lisensya nga ginkikilala han gobyerno ngan diri nakakaaplay hin trabaho.

Hi Bugto Hong Dae-il, nga nakaasayn ha Public Information Desk ha South Korea, nagsiring: “Nagpapasalamat gud kami ha gobyerno ha pagkansela hini nga mga restriksyon. Usa ini nga pitad para ha bug-os nga pagkilala nga adton napriso ha pagdumiri ha pagsundalo tungod han ira gintotoohan diri mga kriminal.”

Samtang naglalaom kita han iba pa nga positibo nga desisyon han gobyerno han South Korea, ginhihimaya ngan ginpapasidunggan naton hi Jehova, an gilalabawi nga Humaratag-hin-balaud.​—Pahayag 4:11.