COLOMBO, Sri Lanka​—Ha sentro nga mga bungtod han Aranayaka, Sri Lanka, nga mga 100 ka kilometro tikang ha Colombo, nga kapital han nasud, inagos an mga lapok ngadto ha mga baryo, ngan sobra 100 ka tawo an namatay ngan mga 350,000 an naapektohan. Tungod ito ha makusog nga pag-inuran ha rehiyon tikang han Mayo 15. May panahon nga 373 ka milimetro nga uran an binuhos ha sulod hin 24 ka oras ha bungto han Kilinochchi. Gintatawag ini han mga awtoridad nga an pinakagrabe nga kalamidad nga nahitabo ha Sri Lanka tikang han nagka-tsunami han 2004.

Sumala ha sanga nga opisina han mga Saksi ni Jehova ha Sri Lanka, waray Saksi nga namatay ha kalamidad, pero haros 200 an gin-ebakwit. Ha usa nga Kingdom Hall, o balay han pagsingba, ha Kaduwela, nga nahimumutang mga 15 ka kilometro tikang ha Colombo, duha ka metro an kahitaas han baha.

An mga Saksi nag-organisar dayon hin disaster relief committee basi maihatag an mga panginahanglan ha pisikal han mga biktima pati na an ira espirituwal nga panginahanglan. Usa nga Kingdom Hall ha Kotahena an gin-gamit basi butangan han mga suplay, sugad han maiinom nga tubig, bado, ngan mga suplay ha medikal. Ginatos nga lokal nga mga Saksi an nagboluntaryo ha panhatag han mga ginkikinahanglan han ira mga igkasi-Saksi ngan ha iba pa ha komunidad.

Hi Nidhu David, usa nga spokesman han mga Saksi ni Jehova ha Sri Lanka, nagsiring: “Padayon namon nga igin-aampo an damu nga pamilya nga naapektohan hinin bag-o la nga kalamidad. Nabulig liwat kami ha paglimpyo ha mga balay nga ginbaha, ha panhatag hin pagkaon, ngan ha pagdonar hin mga bado ha mga nanginginahanglan. An pagin mahinatagon han amon mga igkasi-membro usa gud nga malamrag nga suga hinin masirom nga panahon.”

Media Contacts:

International: David A. Semonian, Office of Public Information, 1-718-560-5000

Sri Lanka: Nidhu David, 94-11-2930-444