Han Pebrero 24, 2022, gin-atake han Russia an Ukraine. Sobra 129,000 nga mga Saksi ni Jehova, upod an ira mga anak, an naukoy ha Ukraine. An sanga nga opisina didto nag-organisar hin 27 nga Disaster Relief Committee (DRC) basi maghatag hin bulig ha aton kabugtoan. Dugang pa, iginpakita han aton kabugtoan an Kristiano nga gugma pinaagi ha paghatag hin praktikal ngan emosyonal nga bulig ha kada tagsa ngan ha ira igkasi-tawo hini nga panahon han krisis.

Kadam-an han kabugtoan an nagpabilin ha nasud, pero an iba nagdesisyon nga pumalagiw. Adton mga pinalagiw na-stranded ha higlaba nga pila, nga an iba hito 30 ka kilometro an kahilaba, ngan nag-iha hin tulo tubtob upat ka adlaw antes hira makaabot ha customs. May mga Saksi hito nga lugar nga namiling ha ira ha pila basi maghatag hin pagkaon ngan maiinom ngan iba pa nga praktikal nga bulig. Han nakatabok na an kabugtoan ha mga border pakadto ha kahigrani nga mga nasud, may mga naghuhulat didto nga iba pa nga Saksi nga may mga dara nga mga karatola han jw.org, basi maghatag hin pagliaw ngan praktikal nga bulig.

• Makasurubo, han Marso 1, 2022, 1 nga brother nga ngula nga taga-Kharkiv an namatay ngan an iya asawa nasamaran hin grabe tungod ha mga pagbomba.

• 3 pa nga sister an nasamaran

• Sobra 5,000 nga magwarali an pinalagiw tikang ha ira mga balay

• 2 nga balay an nabungkag

• 3 nga balay an daku an ruba

• 35 nga balay an gutiay la an ruba

• 2 nga Kingdom Hall an naruba

• Damu nga magwarali an nawad-an hin koryente, heating, signal han telepono, ngan tubig

• 27 nga DRC an igintoka ha Ukraine

• 867 nga magwarali an ginbuligan han mga DRC basi makabiling hin mas talwas nga urukyan

• An mga DRC nangangalimbasog nga makagtagana han ginkikinahanglan nga mga suplay, sugad han pagkaon ngan tubig

Ini nga mga numero siyahan pala nga mga report.

Igin-aampo naton nga an aton kabugtoan padayon nga magkaada kinaadman ngan pagsabot basi mailob an nagbuburobag-o ngan nakakaistres nga mga sitwasyon samtang ginpapakita nira an minagburugto nga gugma.—Proberbios 9:10; 1 Tesalonica 4:9.