Han Pebrero 24, 2022 nagtikang an girra ha Ukraine. Yinukot nga mga Saksi ni Jehova an aadto pa ha mga lugar han nasud diin duro an araway. Sugad nga pagpakita hin tinuod nga minagburugto nga gugma, usa nga grupo hin 21 nga kabugtoan tikang ha mga syudad han Ukraine nga Kremenchuk ngan Poltava an kinaburut-on nga kinadto ha mga lugar nga may girra basi talwason an ira mga igkasi-magsiringba ngan manhatag hin relief.

An mga kabugtoan nagbiyahe hin mga 80 ka beses ha sulod hin unom ka semana, salit mga 50,000 ka kilometro na an ira ginbiyahe ngadto ha mga lugar nga duro an araway sugad han Kharkiv, ngan haros 400 nga kabugtoan an ira gintalwas.

Ha pagkayana, nakagdeliber na hira hin 23 ka tonilada nga pagkaon, pati hin medisina, gasolina, ngan iba pa nga suplay. Antes magbiyahe, ginpapanginano hin maopay han kabugtoan an ruta nga ira aagian basi magin talwas hira ngan malikyan an mga lugar nga may nag-aaraway. An usa ka pagbiyahe mahimo umabot hin 19 ka oras kay an kabugtoan kinahanglan umundang ha mga checkpoint diin gin-uusisa an ira mga sarakyan.

Samtang nagbibiyahe hira, may mga eruplano nga pan-girra nga naglulupad-lupad. Nakikita han mga kabugtoan an mga bilding nga ginbombahan ngan an mga tangke de girra ngan mga awto nga nagkaguguba. Usahay, naaabat han kabugtoan an pagbay-og han tuna kon may mga bomba nga nabuto hirani ha ira.

Han Abril 2, 2022, hi Roman nag-aandam pagdeliber han mga suplay ha mga kabugtoan ha Kharkiv han nagtikang pagkahudlog an damu nga missile ha mga kalsada. Tinago hiya ha hirani nga bilding. Paglabay hin 30 minutos, nakita niya nga ginbombahan an kalsada nga iya unta aagian.

Hi Volodymyr, usa han boluntaryo nga mga drayber, nagsiring mahitungod ha peligroso nga mga kahimtang: “Damu ka beses nga nag-aampo kami kan Jehova para hin kinaadman basi makahimo hin maaramon nga mga desisyon.”

Hi Oleksandr ngan an iya asawa, hi Valentyna, naukoy ha Kharkiv upod an iya edaran na nga mga kag-anak. Samtang nagpapadayon an girra, nakikita nira an mga pagbuto nga 100 ka metros la an kahirani tikang ha bintana han ira balay. Waray hira awto, salit diri hira nakakapalagiw.

Katapos, inabot an kabugtoan basi talwason hira. “Nag-ampo kami kan Jehova basi magpasalamat ha iya tungod han kabugtoan nga binulig ha amon,” siring ni Oleksandr.

Hi Vasyl, an iya asawa nga hi Natalia, ngan an ira tulo nga anak nagtago hin pipira ka adlaw ha basement han ira balay. Han Pebrero 29, 2022, may bomba nga binuto hirani ha balay diin hira natago. Tungod han pagbuto nabungkag an ira balay. Nahinunumdoman ni Vasyl nga nakabati hiya hin daku hinduro nga pagbuto, ngan nakita niya nga naparong an ngatanan nga suga ha basement.

Makausa, han medyo nagkalma an araway, an pamilya binalhin ha lain nga basement ha kahirani nga bilding. Han Marso 3, 2022, naagian han kabugtoan ini nga pamilya ngan gindara hira ngadto ha mas talwas nga lugar han nasud.

Iginsaysay ni Vasyl an iya inabat han an iya pamilya ginbuligan nga makatalwas ngan nakaabot hira ha mas talwas nga lugar: “Mapasalamaton gud kami kan Jehova. Ha siyahan nga higayon katapos hin usa ka semana, pero ha pag-abat namon damu ka semana, nangiklop kami nga murayaw ngan diri nababaraka mahitungod ha katalwasan han amon mga anak.”

Hi Oleksandr, nga usa han mga drayber, nagsaysay nga an pagtalwas nga ginhimo ha mga kabugtoan pamatuod nga nagkakaurosa an katawohan ni Jehova. “Nakabulig ini ha akon nga masantop nga hinigugma gud ni Jehova an iya katawohan,” siring niya. “Han nakita ko nga mapasalamaton an mga kabugtoan, nalipay ako hinduro.”

Mapasalamaton kita ha aton maisugon nga kabugtoan, ngan gin-aampo naton nga bendisyonan hira ni Jehova tungod han ira pagin andam magsakripisyo.—Roma 12:10.