Ha bulig ni Jehova, hira Sister Liudmyla Mozul ngan Kateryna Rozdorska nakakapailob bisan pa han kasakit ngan duro nga kasubo nga resulta han girra. An ira mga bana nga hira Petro Mozul ngan Dmytro Rozdorskyi usa han siyahan nga mga Saksi ni Jehova nga namatay tungod han girra ha Ukraine. Makasurubo, ha pagkayana, 34 nga kabugtoan na an namatay tungod han girra.

Hira Petro ngan Liudmyla nabawtismohan han 1994. Ini nga mag-asawa 43 ka tuig na nga kasal.

“Kada adlaw ako ginliliaw han akon mga igkasi-Saksi,” siring ni Liudmyla. “Padayon nira ako nga gintatawagan. Nakatangis liwat ako han surat tikang ha branch ha Ukraine nga nagpapahayag han ira kasubo tungod han kamatay han akon bana.”

Nagtikang an girra han Pebrero 24, 2022. Hi Petro, nga usa nga ministeryal nga surugoon ha sign-language congregation, namatay samtang napalagiw hiya ngan an iya pamilya tungod han duro nga pambomba ha Kharkiv han Marso 1, 2022.

Hito nga adlaw, katapos han pipira ka adlaw nga pambomba, may mga fighter jet nga nagkalupad ngan nagtikang pag-atake ha syudad. An pamilya nag-impake han ira kinahanglanon ngan binaya paglabay hin 30 minutos. Hira Petro ngan Liudmyla nakasakay ha usa nga awto. An ira anak nga hi Oleksii ngan an iya asawa nga hi Maryna, ha iba nga awto sumakay. “Han nagbibiyahe kami ha usa nga kalye, nagtikang paghulog hin mga bomba an mga fighter jet dida ha palibot namon,” siring ni Liudmyla. “Nabay-og gud an awto tungod han mga pagbuto.”

Tigda nga ginkabig ni Petro, nga 67 anyos, an manobela basi diri mabunggo an awto ni Oleksii, pero nagkaada hiya grabe nga mga samad. Gindara hiya ngan hi Liudmyla ha hospital pero ha urhi namatay hi Petro. Nasamaran an paa ngan tiyan ni Liudmyla tungod han nagtalsik nga mga metal tikang ha mga bomba. Waray maano hira Oleksii ngan Maryna. Nahibaroan la ni Liudmyla nga namatay hi Petro han nakagawas na hiya ha hospital paglabay hin tulo ka adlaw.

Hi Liudmyla nagsiring: “Kon mas ginhuhunahuna ko an pagkabuotan ni Jehova ngan an iya maopay nga katuyoan, mas nagkakaada ako kamurayawan ha hunahuna. Sigurado ako nga ha bag-o nga kalibotan makikita ko utro an akon bana, ngan eksayted na gud ako para hiton makalilipay nga panhitabo.”

Walo ka tuig na nga mag-asawa hira Dmytro ngan Kateryna. Han nakadto hi Dmytro ha iya trabaho ngan gintawagan hi Kateryna, an iya ultimo nga ginsiring, “Tipauli na ako.”

Paglabay hin pipira ka oras, han Marso 8, 2022, usa nga katrabaho ni Dmytro an nagtawag kan Kateryna ngan nagsiring nga hi Dmytro nakatamak hin bomba ngan gindara ha hospital. Namatay hiya paglabay hin lima ka oras katapos han iya operasyon.

Han nahibaroan ni Kateryna nga namatay hi Dmytro, hiya nagsiring: “Hito nga gab-i, diri la kay basta ginkaptan ni Jehova an akon kamot, ginkugos niya ako. Inabat ko nga duok gud hi Jehova ha akon.”

Hi Dmytro, nga 28 anyos, nabawtismohan han 2006 ngan nag-alagad sugad nga tigurang ha Donetsk Region han Ukraine.

Katapos gud la han lubong ni Dmytro, hi Kateryna nagbiyahe hin 12 ka oras ngadto ha mas talwas nga lugar han Ukraine. “Nakakarawat ako hin mga pagdasig tikang ha kabugtoan ha bug-os nga Ukraine ngan ha iba nga mga nasud. Iginpaabat nira ha akon an ira daku nga gugma, ngan nakaiban ini han akon kasakit.”

Nagsiring pa hiya: “Nakaliaw liwat ha akon an ministeryo. . . . Kon nasusubo gud ako, nagyayakan ako hin mga teksto ha Biblia sugad han Filipos 4:6, 7.”

Nasarig gud kita nga padayon nga paparig-unon ngan liliawon ni Jehova an aton hinigugma nga kabugtoan nga namatyan hin mga hinigugma tungod han girra ha Ukraine.—Salmo 61:1-3.