Haros 47,000 nga Saksi ni Jehova an nag-ebakwit tungod han nagpapadayon nga girra ha Ukraine. Damu an pinalagiw ha mas talwas nga lugar ha nasud, diin an kabugtoan naghatag ha ira hin bado, pagkaon, urukyan ngan iba pa nga mga panginahanglan. Bisan kon ini nga nagpaukoy nga kabugtoan nagkukuri liwat, malipayon nga ginbuligan nira an ira kabugtoan nga nanginginahanglan.

Hi Olha ha Uman, Ukraine, ngan an iya diri Saksi nga bana, nagpaukoy hin 300 nga kabugtoan ha siyahan nga duha ka bulan han girra. Damu hini nga nag-ebakwit nga kabugtoan an nag-ukoy ha ira hin usa la kagab-i ngan nagpapadayon na ha ira pagbiyahe. Kasagaran na nga hi Olha ginsusumatan nga may-ada hiya maabot nga mga bisita ha katutnga han gab-i, nga diri na gud maiha antes han ira pag-abot. Makausa, durungan nga ginpaukoy ni Olha an 22 nga kabugtoan. Ini nga eksperyensya naghatag liwat hin higayon ha 18 anyos nga anak ni Olha nga hi Stanislav, nga magpakita hin pagkamahinatagon. Kasagaran na nga ha salog hiya nakaturog kay an nag-ebakwit nga kabugtoan an iya ginpapakaturog ha iya kwarto.

“Nalilipay gud ako kay hinin makuri hinduro nga mga panahon, nakakabulig ako ha katawohan ni Jehova,” siring ni Olha. “Tungod hito, nalilipay ako hinduro.”

Hi Andriy ngan an iya asawa nga hi Liudmyla, nagpaukoy hin 200 nga kabugtoan ha sulod hin lima ka semana. Makausa, 18 ka tawo an kinaturog ha ira hin usa ka gab-i. “Ginsunod namon an instruksyon han branch office, salit may-ada kami mga suplay hin pagkaon. Gin-gamit namon ito para ha nag-ebakwit nga kabugtoan ha sulod hin usa ngan tunga ka semana,” siring ni Andriy. “An kabugtoan nagbibilin hin mga kard nga may kwarta, ngan gin-gagamit namon ito pagpalit hin bisan ano nga pagkaon nga amon nabibilngan para ha masunod nga mga bisita. An Disaster Relief Committee nagtagana liwat hin pagkaon, salit waray gud kami magkulang hin bisan ano.”

Han Marso, hi Vita nga naukoy ha Ivano-Frankivsk, lumakat ha iya apartment ngan nakiukoy ha iya bugto basi an iya apartment maukyan han kabugtoan nga nag-ebakwit. “Para ha akon diri ito sakripisyo, lugod kapahayagan han gugma,” siring ni Vita. “An akon ginbuhat para ha nag-ebakwit nga kabugtoan nakapalipay ha akon. Kita ngatanan usa nga pamilya.”

Hi Natalia naukoy kaupod an iya bana ngan an iya anak nga hi Habriela, ha Ternopil. Hira ngatanan nawarayan trabaho han nagtikang an girra ngan gin-gasto nira an kadam-an han ira natirok nga kwarta para ha ira mga panginahanglan. Bisan pa hito, andam hira magpaukoy ha usa nga nag-ebakwit nga sister ngan ha iya baldado nga anak.

“Nahinumdoman ko an eksperyensya han usa nga sister ha Africa nga nagkukuri ha materyal pero nagpaukoy hin 14 nga kabugtoan ha panahon han kombensyon, ngan waray hira makulangi hin bisan ano,” siring ni Natalia. Nagsiring hiya nga ini nga eksperyensya nakabulig ha iya nga unahon an kaopayan han iba.

Bisan kon an aton kabugtoan ha Ukraine naatubang hin magkuri nga mga kahimtang, maaramon nga nasarig hira kan Jehova samtang ‘nagigin maabiabihon pirme.’—Roma 12:13.