An aton kabugtoan ha mga syudad han Mariupol, Kharkiv, Hostomel, ngan ha iba pa nga lugar naatubang hin duro nga kakurian samtang nagpapadayon an pambomba ha Ukraine. An iba waray makagawas ha ira mga basement o ha ira gintatagoan hin mga usa ka semana. Gutiay na la an ira suplay han pagkaon, ngan tungod kay nagkakawara-wara an koryente, Internet, ngan signal makuri an pakigkomunikar ha kabugtoan.

Makasurubo, hi Brother Dmytro Rozdorskyi, 28 anyos nga tigurang ha Myrnohrad, namatay tungod han iya mga samad katapos makatamak hin nakalubong nga bomba. Igin-aampo naton an namatayan hin mga hinigugma ngan an aton kabugtoan ha mga lugar nga duro an pambomba.—2 Tesalonica 3:1.

Tubtob han Marso 7, 2022, ini an report tikang ha Ukraine:

• 2 nga magwarali an namatay

• 8 nga magwarali an nasamaran

• 20,617 nga magwarali an pinalagiw tikang ha ira mga balay ngadto ha mas talwas nga mga lugar han nasud

• 25 nga balay an nabungkag

• 29 nga balay an daku an ruba

• 173 nga balay an gutiay la an ruba

• 5 nga Kingdom Hall an naruba

• 27 nga Disaster Relief Committee (DRC) an nanginginano ha kabugtoan ha Ukraine

• 6,548 nga magwarali an direkta nga ginbuligan han mga DRC basi makabiling hin mas talwas nga urukyan

• 7,008 nga magwarali an pinalagiw ha iba nga mga nasud ngan ginbubuligan han kabugtoan

• 1 nga Assembly Hall ngan mga 30 nga Kingdom Hall ha weste han Ukraine, sugad han ha Chernevtsi, Ivano-Frankivsk, Lviv, ngan ha mga rehiyon han Transcarpathia, an igin-andam para ha mga refugee