An aton kabugtoan ha Ukraine waray umundang ha pagbulig ha usa kag usa. Padayon nga iginpapakita nira an gugma nga andam magsakripisyo.

Hi Sister Olena 81 anyos. Han Hunyo 6, may bomba nga binuto pipira la ka metros tikang ha iya balay. Tungod hito, nabungkag an balay han iya amyaw, ngan nagkaada buho nga pito ka metros an kahilarom. Makusog gud an pagbuto salit daku an ruba han balay ni Sister Olena.

Hiya nagsiring: “Nakaturog ako, ngan an bungbong han akon balay natumba hirani ha akon ulo. An palibot napuno hin maitom ngan madakmol nga tapotapo. An mga buong ngan mga bato nagpatsarang ha bisan diin. Nagpasalamat ako kan Jehova nga buhi pa ako.” An kabugtoan ha ira lugar kinadto kan Sister Olena pipira la ka minuto katapos han pagbuto, pati na an usa nga brother nga an balay daku liwat an ruba. Hi Sister Olena nagpadayon: “Pag-abot han kabugtoan, na-shock hira ngan diri maaram han isisiring. Naparig-on gud ako han ira pagbisita. Maopay na gud la kay kinanhi hira ha akon.”

Hi Serhii, nga usa nga tigurang nga pirme nabisita kan Sister Olena upod han mga batan-on ha ira kongregasyon, nagsiring: “Han nahibaroan ko nga may nagbuto nga bomba hirani ha balay ni Sister Olena, nahadlok gud ako ngan nabaraka. Naibanan la an akon kabaraka han nakita ko hiya nga waray grabe nga mga samad, may mga bun-og la. An nakakaimpres kay an siyahan nga ginbiling ni Sister Olena katapos maruba an iya balay amo an mga literatura nga basado ha Biblia nga iya nakarawat pipira ka adlaw antes han pagbuto.”

Makalilipay kay an iya mga paryente nakabiling hin bag-o niya nga urukyan. An kongregasyon padayon nga nagtatagana hin praktikal nga bulig kan Sister Olena, ngan gintatawagan hiya han mga tigurang kada adlaw. An kabugtoan naghatag ha iya hin hearing aid para makapahimulos hiya ha mga katirok han kongregasyon. Hiya nagsiring: “Usahay nanluluya ako, pero napapakusog ako han mga katirok. Agsob ako tawagan han kabugtoan, ngan mapasalamaton gud ako hito.”

Usa nga mag-asawa an nagsumat han ira eksperyensya samtang natago ha basement han usa nga Kingdom Hall kaupod an 200 nga kabugtoan. An asawa nagsurat: “Naimpres gud ako ha pag-ataman ha amon han mahigugmaon nga mga tigurang. Nahinumdoman ko ha ira hi David, nga inatubang hin kamatayon han nakiaway hiya ha leon ngan uso basi talwason an mga karnero. An mga tigurang ha basement inatubang hin kamatayon basi kumuha hin pagkaon ngan tubig, pati hin petrolyo basi may-ada kami suga. Tungod hini, nakagkatirok an kongregasyon ngan may-ada kami katirok para ha pagsangyaw. Bisan ha panahon nga duro an pambomba, ini nga mga tigurang regular nga nabisita ha kabugtoan nga nagpabilin ha ira mga balay, gindadad-an hira hin pagkaon ngan tubig ngan ginliliaw hira. Ginrirespeto ko gud ito nga mga tigurang. Antes hini nga mga panhitabo, kilala ko hira sugad nga mga magturutdo ngan parasangyaw, pero yana nakikita ko hira sugad nga masasarigan nga mga paraataman. Mapasalamaton gud ako ha ira ehemplo ha pagpakita hin kaisog, pag-ataman, ngan pagin masasarigan!”

An mga magwarali ha usa nga kongregasyon ha Ukraine nagsurat ha Ukraine branch parte ha mga nangunguna ha panhatag hin relief: “Kinasingkasing gud kami nga nagpapasalamat. Urusahon gud an paagi han pag-ataman ha amon ni Jehova pinaagi han aton mga igkasi-tumuroo. Naeksperyensyahan gud namon ini nga mga pulong ni Jesus: ‘Pinaagi hini an ngatanan mahibabaro nga mga disipulo ko kamo—kon nahigugma kamo ha usa kag usa.’”—Juan 13:35.

Tubtob han Hunyo 21, 2022, ini an report tikang ha Ukraine. Ini nga ihap iginbase ha kompirmado nga mga report tikang ha lokal nga kabugtoan. Pero an aktuwal nga ihap bangin mas damu pa tungod kay makuri an komunikasyon ha ngatanan nga rehiyon han nasud.

• 42 nga magwarali an namatay

• 83 nga magwarali an nasamaran

• 31,185 nga mawarali an nag-ebakwit ha pagkayana

• 495 nga balay an nabungkag

• 557 nga balay an daku an ruba

• 1,429 nga balay an gutiay la an ruba

• 5 nga Kingdom Hall an nabungkag

• 8 nga Kingdom Hall an daku an ruba

• 34 nga Kingdom Hall an gutiay la an ruba

• 27 nga Disaster Relief Committee (DRC) an nanginginano ha kabugtoan ha Ukraine

• 52,348 nga indibiduwal an direkta nga ginbuligan han mga DRC basi makabiling hin mas talwas nga urukyan

• 23,433 nga magwarali an pinalagiw ha iba nga mga nasud ngan ginbubuligan han kabugtoan