Ha bug-os nga Ukraine, malipayon an kabugtoan kay nakagsangyaw na liwat hira ha publiko ngan nagkaada ito mag-opay nga resulta. An mga paramangno han sirkito ngan lokal nga mga tigurang nagreport nga damu nga tawo an nalipay nga makita utro an aton mga cart ngan nagsiring pa ngani nga ginmingaw hira ha mga Saksi ni Jehova ha ira lugar.

Hi Tatiana nga tikang ha Serhiivka Congregation ha Odesa Region nagdesisyon nga bisitahon an iya mga nakaistorya antes han pandemya. Hiya nagsaysay, “Tikang pa ha tinikangan, nakita ko an bendisyon ni Jehova ha amon mga paningkamot nga makigbahin utro ha ministeryo.” Makausa, ginbisita niya an usa nga babaye nga nadiri pagpa-Bible study antes han pandemya. Pero yana, an babaye naruyag na nga makiistorya hin mga topiko parte ha Biblia ngan sumige dayon nga magpa-Bible study. Hi Tatiana nagsiring, “Kinahanglan bisitahon ko an ngatanan nga ginbabalik-bisita ko hadto ngan tanyagan hira hin pag-aram ha Biblia!”

Hira Yevheniy ngan Lilia mga kabugtoan nga taga-Mariupol, pero nag-ebakwit ha iba nga lugar. Ginbayaan nira an ira balay ngan yana naukoy hira ha mas talwas nga lugar ha Ukraine. Pariho hira regular nga nakikigbahin ha pagsangyaw. Nagsiring hira nga an ministeryo nakabulig ha ira nga diri magpokus ha ira mga problema. Nagsiring liwat hira: “Maaram kami nga an amon kinabuhi diri na pariho hadto. Makuri hinduro an pagtikang hin bag-o nga kinabuhi, pero ginhihinumdom namon nga an kamot ni Jehova diri halipot. Gintatagan kami niya han iya espiritu, ngan an kabugtoan andam bumulig ha amon basi makagtikang kami hin bag-o nga kinabuhi ha bag-o nga lugar.”

Ha iba nga mga lugar han nasud, an aton kabugtoan nakakagsangyaw liwat pinaagi han ira mag-opay nga buhat. Pananglitan, usa nga grupo hin kabugtoan ha syudad han Mykolaiv an binulig ha usa nga internasyonal nga organisasyon nga nanhahatag hin relief basi aydon ngan ayuson an usa nga bodega nga ginbubutangan han mga relief. Binulig an kabugtoan ha pag-ayad basi magkaada maopay nga suplay han tubig, naghimo hin mga estante, ngan ginklase-klase an pipira ka tonilada nga suplay. Han gin-inspeksyon han usa nga representante han organisasyon an trabaho, nakatangis hiya. Hiya nagsiring, “Waray ako maglaom nga sugad hini kaopay an magigin resulta.”

Bisan kon an aton kabugtoan ha Ukraine aada ha makuri nga mga kahimtang, nalilipay hira tungod ha pagpabilin nga aktibo ha ministeryo ngan ha “pagbuhat han maopay.”—Galacia 6:9.

Tubtob han Hulyo 13, 2022, ini an report tikang ha Ukraine. Ini nga ihap iginbase ha kompirmado nga mga report tikang ha lokal nga kabugtoan. Pero an aktuwal nga ihap bangin mas damu pa tungod kay makuri an komunikasyon ha ngatanan nga rehiyon han nasud.

• 42 nga magwarali an namatay

• 97 nga magwarali an nasamaran

• 28,683 nga mawarali an nag-ebakwit ha pagkayana

• 524 nga balay an nabungkag

• 588 nga balay an daku an ruba

• 1,554 nga balay an gutiay la an ruba

• 5 nga Kingdom Hall an nabungkag

• 10 nga Kingdom Hall an daku an ruba

• 36 nga Kingdom Hall an gutiay la an ruba

• 27 nga Disaster Relief Committee (DRC) an nanginginano ha kabugtoan ha Ukraine

• 52,947 nga indibiduwal an direkta nga ginbuligan han mga DRC basi makabiling hin mas talwas nga urukyan

• 23,863 nga magwarali an pinalagiw ha iba nga mga nasud ngan ginbubuligan han kabugtoan