Tikang han Hulyo 23 tubtob 31, may mga magwarali ha bug-os nga Ukraine ngan ha iba nga mga nasud diin hira pinalagiw nga nabawtismohan ha 2022 Pamilnga an Kamurayawan! nga Kombensyon. Tubtob han Agosto 2, may 1,113 na nga nabawtismohan tikang ha Ukraine. Usa nga brother ha Ukraine an nagsiring: “Bisan an girra diri nakakapaundang ha panhimo hin disipulo nga buruhaton, sugad han iginsaad ni Jesus: ‘Kaupod niyo ako ha ngatanan nga adlaw.’”—Mateo 28:20.

Nalilipay kami pagsumat han masunod nga mga eksperyensya.

Hi Natalia nga taga-Kreminna, Luhansk Region, 63 anyos. Hiya ngan an iya duha nga anak nga babaye nagtikang pag-aram kaupod han mga Saksi ni Jehova han mga 1990. An iya mga anak nag-uswag ha espirituwal ngan nabawtismohan, pero hiya waray. Pagtikang han girra, igin-upod hi Natalia han usa nga pamilya nga Saksi ni Jehova han pinalagiw hira ngadto ha mas talwas nga lugar. Ginpaukoy hiya ha usa nga Kingdom Hall ha Ivano-Frankivsk.

Hi Natalia nagsiring: “Katapos han makaharadlok nga pambomba, baga hin nahingalimot na ako kon gin-aano paghiyom. An kabugtoan nagpakita ha akon hin tinuod nga gugma. Waray ko laumi nga tatagan nira ako han akon mga panginahanglan. Hito nga panahon, napukaw an akon gugma kan Jehova. Pirme ako nagbabasa han Biblia, ngan usa nga sister an nagtanyag ha akon hin pag-aram ha Biblia gamit an Mabuhi hin Malipayon ha Waray Kataposan! nga libro. Regalo hiya ni Jehova ha akon.” Hi Natalia nagsiring liwat: “Yana, malipayon gud ako nga nabawtismohan sugad nga usa han mga Saksi ni Jehova. Karuyag ko sundon an pinakaimportante nga sugo: higugmaon hi Jehova nga akon Dios ha ‘bug-os ko nga kasingkasing ngan ha bug-os ko nga kalag ngan ha bug-os ko nga hunahuna.’”—Mateo 22:37.

Hi Olia nga taga-Cherkasy usa nga diri-bawtismado nga magwarali han nagtikang an girra. Han Marso 6, pinalagiw hiya ngadto ha Poland kaupod an iya anak ngan apo. Hiya nagsiring: “Pag-abot namon didto, mga go bag la an amon dara, pero kami nga tulo gin-ataman han kabugtoan. Ini ngatanan nakakombinse ha akon nga an organisasyon ni Jehova nagkakaurosa ngan gin-gigiyahan han iya espiritu. Katapos ko maeksperyensyahan ito ngatanan, mas nagin determinado ako nga idedikar an akon kinabuhi kan Jehova. Ginbuligan niya ako ha pinakamakuri nga mga panahon ha akon kinabuhi, ngan yana karuyag ko mag-alagad ha iya ngan ipakita ha iya an akon pagpasalamat.”

Hi Yulia, nga taga-Donetsk Region, 18 anyos. Nagdaku hiya ha Saksi nga pamilya pero waray gud hiya mag-uswag ngadto ha pagpabawtismo. Iginsumat niya an usa nga eksperyensya nga nahitabo waray pag-iha katapos magtikang an girra. Hiya nagsiring: “Nahigda ako ha salog ngan nasantop ko nga puydi ako mamatay bisan san-o. An bug-os nga kalsada diin naukoy an akon pamilya nabungkag, pero nakatalwas kami. Katapos ko maeksperyensyahan ini ngan nag-ampo ako ngan ginpamalandong an mga kalidad ni Jehova, mas nagin duok ako ha iya ngan waray na ako magruhaduha kon angay ko ba idedikar an akon kinabuhi kan Jehova. Iginpakita ni Jehova nga duok gud hiya ha akon pinaagi ha pagbaton han akon mga pag-ampo. Hadto, may kahibaro la ako mahitungod ha Dios, pero yana hinigugma ko hiya.” Hi Yulia nabawtismohan han Hulyo 23.

Pagtikang han girra, an 11 anyos nga hi David pinalagiw ngadto ha Germany kaupod han iya pamilya. Nagin diri-bawtismado nga magwarali hiya tikang han noybe anyos hiya. Yana, naniningkamot hiya nga kab-uton an iya espirituwal nga mga tumong. Hiya nagsiring: “Nagdesisyon ako nga magpabawtismo kay hinigugma ko hi Jehova ngan karuyag ko magin iya sangkay. Han ginbabawtismohan ako, nagtangis ako tungod han kalipay kay bahin na ako han kan Jehova malipayon nga pamilya. Karuyag ko isumat ha mga tawo an mahitungod kan Jehova ngan ha iya katuyoan para ha katawohan, salit an akon sunod nga tumong amo an pagpayunir. Karuyag ko liwat nga magserbi ha kabugtoan ha kongregasyon ngan naglalaom ako nga pag-abot han panahon magin ministeryal nga surugoon ako. An akon pinakadaku nga tumong amo an pag-alagad ha Bethel. Nagin hingyap ko gud ini tikang han binisita ako ha branch office ha Lviv han 2018.”

Hi Olena nga taga-Kyiv nagin diri-bawtismado nga magwarali han 2011. Diri hiya aktibo ha sulod hin napulo ka tuig. Han 2020, ginkontak hiya han mga tigurang ha kongregasyon ngan gintagan hiya han brosyur nga Balik kan Jehova. Hiya nagsiring: “Nagpa-Bible study na liwat ako ngan tinambong ha mga katirok. Pero paglabay hin pipira ka panahon, inundang na liwat ako. Han girra, ginbaton ni Jehova an akon mga pag-ampo, ngan nasantop ko nga ginproteksyonan ako ni Jehova, ginpakita niya nga hinigugma niya ako, ngan gintagan ako niya hin kamurayawan ha hunahuna. Pinalagiw ako ngadto ha Romania ngan may nakilala ako nga mga Saksi. Tungod han gugma ngan pag-ataman ha akon han kabugtoan, inabat ko nga sugad hin gintaklapan ako ni Jehova basi diri hagkuton.” Hi Olena nabawtismohan han Hulyo 24. Hiya nagsiring: “Nagpapasalamat ako kan Jehova kay pasensyoso gud hiya ha akon. Yana, maaram ako nga ‘ha ngatanan nga butang may kusog ako pinaagi ha iya nga naghahatag ha akon hin gahum.’”—Filipos 4:13.

Tubtob han Agosto 2, 2022, ini an report tikang ha Ukraine. Ini nga ihap iginbase ha kompirmado nga mga report tikang ha lokal nga kabugtoan. Pero an aktuwal nga ihap bangin mas damu pa tungod kay makuri an komunikasyon ha ngatanan nga rehiyon han nasud.

• 43 nga magwarali an namatay

• 97 nga magwarali an nasamaran

• 22,568 nga mawarali an nag-ebakwit ha pagkayana

• 586 nga balay an nabungkag

• 613 nga balay an daku an ruba

• 1,632 nga balay an gutiay la an ruba

• 5 nga Kingdom Hall an nabungkag

• 10 nga Kingdom Hall an daku an ruba

• 37 nga Kingdom Hall an gutiay la an ruba

• 27 nga Disaster Relief Committee (DRC) an nanginginano ha kabugtoan ha Ukraine

• 53,836 nga indibiduwal an direkta nga ginbuligan han mga DRC basi makabiling hin mas talwas nga urukyan

• 24,867 nga magwarali an pinalagiw ha iba nga mga nasud ngan ginbubuligan han kabugtoan