Han Agosto 2022, iginpahibaro nga ibabalik na an pagsangyaw ha balay-balay ha mga lugar ha Ukraine diin talwas an pagbuhat hito. An aton kabugtoan eksayted gud nga makigbahin. Nakita nira nga damu nga tawo an karuyag mamati ha mensahe han Biblia. Usa nga tawo nga kinarawat hin pag-aram ha Biblia an nagsiring: “Katapos makita an makaharadlok nga mga panhitabo ngan pag-antos tungod han nagpapadayon nga girra, klaro nga an Dios gud la an makakasulbad han mga problema han katawohan.” Ini an pipira nga eksperyensya ha ministeryo.

Hi Ruslan nga taga-Lanivtsi Congregation ginkukulba pagsangyaw utro ha balay-balay. Hiya ngan an iya asawa nag-ampo kan Jehova nga tagan hira hin kaisog ngan buligan hira nga mabilngan an mga tawo nga interesado magkaada hin mas maopay nga kabubuwason. Nahipausa ini nga mag-asawa kay ha sulod han siyahan nga duha ka oras han ira pagsangyaw, walo ka tawo an ira nakaistorya, ngan hira ngatanan sumige nga magpa-Bible study.

Samtang nagsasangyaw hi Olha nga taga-Kremenets Congregation, usa nga lalaki an dinaop ha iya ngan ha iya partner ngan nagpakiana kon nakikiistorya hira ha mga tawo mahitungod ha Pulong han Dios. An lalaki nagsiring: “Nasigarilyo ako ngan problema ko an pag-ininom. Maaram ako nga maabot an panahon nga huhukman ako han Dios. Hito nga panahon, diri ko karuyag nga sugad hini an akon pagkatawo.” Ginhikay nga may brother ha ira lugar nga mag-Bible study ha iya.

Samtang nagsasangyaw ha usa nga lugar kaupod an iya grupo han pagsangyaw, natigamnan ni Vasyl nga taga-Lviv-Riasne-Skhidnyi Congregation an balay han usa nga babaye nga iya nakaistorya pipira ka tuig na an naglabay. Nahinumdoman niya nga an babaye nasisina ngan nadiri pakiistorya ha mga Saksi ni Jehova. Nagdesisyon hiya nga magtuktok ha purtahan ngan magtanyag hin Bible study. Nahipausa hiya kay an amo gihapon nga babaye an nag-abri han purtahan ngan nagsiring nga karuyag niya masabtan an Baraan nga Kasuratan. Naruyag an babaye nga magpa-Bible study, ngan ginhikay han brother nga may kumadto ha iya basi mag-aram hira.

Hi Serhii, nga taga-Illintsi Congregation, nabawtismohan han 2021 ngan waray pa gud makagsangyaw ha balay-balay. Ginkukulba hiya salit naggahin hiya hin panahon para mangandam. Hi Serhii nagsiring: “Damu ka beses nga ginkita ko an mga video han sampol nga pakiistorya. Katapos hito, kinahanglan ko magkaada hin kaisog.” Marisyo kay nagsumat hiya nga an iya kakulba naliwanan hin duro nga kalipay kay nagkaada hiya higayon nga isangyaw ha iba an maopay nga sumat.

Hi Nikol liwat nga taga-Rozdil Congregation nagin diri bawtismado nga magwarali han Agosto 2022. Hiya nagsiring: “Ginkukulba ako hinduro ngan nahadlok pa ngani ha pagsangyaw ha balay-balay. Pero han nahimo ko na ito, inabat ko nga makalilipay gud nga personal nga ipakiistorya ha iba an mahitungod kan Jehova!”

Tubtob han Nobyembre 11, 2022, ini an report tikang ha Ukraine. Ini nga ihap iginbase ha kompirmado nga mga report tikang ha lokal nga kabugtoan. Pero an aktuwal nga ihap bangin mas damu pa tungod kay makuri an komunikasyon ha ngatanan nga rehiyon han nasud.

• 46 nga magwarali an namatay

• 97 nga magwarali an nasamaran

• 12,569 nga mawarali an nag-ebakwit ha pagkayana

• 590 nga balay an nabungkag

• 645 nga balay an daku an ruba

• 1,722 nga balay an gutiay la an ruba

• 6 nga Kingdom Hall an nabungkag

• 19 nga Kingdom Hall an daku an ruba

• 63 nga Kingdom Hall an gutiay la an ruba

• 27 nga Disaster Relief Committee (DRC) an nanginginano ha kabugtoan ha Ukraine

• 53,948 nga indibiduwal an direkta nga ginbuligan han mga DRC basi makabiling hin mas talwas nga urukyan

• 25,983 nga magwarali an pinalagiw ha iba nga mga nasud ngan ginbubuligan han kabugtoan