Mga 3,000 nga balay han mga Saksi ni Jehova an naguba o nabungkag tungod han girra ha Ukraine nga nagtikang han Pebrero 2022. Han Agosto, ha pagdumara han Disaster Relief Department (DRD) ngan han Local Design/Construction Department, gintikangan han kabugtoan ha Ukraine an pag-ayad han naguba nga mga balay kon talwas an pagbuhat hito. Upod hini an pagliwan han naguba nga mga atop ngan mga bintana ngan iba pa nga gudtiay nga mga araydon. Ha pipira nga kahimtang, kon nabungkag an usa nga balay, an garahe o bodega puydi himoon nga usa nga simple nga balay. Ha pagkayana, 37 nga proyekto ha pagpanukod an natapos na, ngan 48 nga iba pa an padayon nga gintatrabaho.

Diri masayon an pag-ayad hini nga mga balay hinin masamok gud nga panahon. Pero waray ito makapugong ha kabugtoan tikang ha pagbulig ha relief work. Hi Sister Svitlana, nga 70 anyos, nga taga-Velyka Dymerka, Kyiv Region, nagsiring: “Waray ako kwarta nga pampaayad ha atop ngan prente nga bungbong han akon balay. Pero may ginbuhat hi Jehova nga diri ko gud ginlalaoman. Inabot an mga kabugtoan ngan gin-ayad an akon balay, ngan natapos nira ito hin tulo la ka adlaw.”

Hi Sister Nadiia nga taga-Horenka, Kyiv Region, nagsiring nga an relief work daku gud nga bulig ha ministeryo. Hiya nagsiring: “An ginhimo nga pag-ayad hin mga balay naghatag hin daku nga pamatuod ha ngatanan. Bisan adton mga diri ko kakilala nag-iistorya mahitungod han tinuod nga gugma nga iginpapakita han mga Saksi ni Jehova. Diri hira makatoo nga ginbuligan ako han akon mga igkasi-tumuroo.”

Bisan an mga kabugtoan nga nawad-an han ira balay binulig, sugad han ginbuhat han mag-asawa nga hira Yevhen ngan Tetiana. Nabungkag an ira balay han naigo ito hin bomba. Imbes nga magpokus ha kon ano an nawara ha ira, maduruto hira nga binulig ha mga kabugtoan. “Karuyag gud namon pirme bumulig ha iba,” siring ni Yevhen. “An pagserbi ha iba nabulig ha amon nga makaya an amon mga problema.”

Sugad man, katapos aydon han kabugtoan an balay han sister nga hi Lidiia nga taga-Hostomel, Kyiv Region, napagios hiya nga magboluntaryo ha relief work. “Ha sulod hin duha ka semana, inabot hin 16 nga kabugtoan an nag-ayad han akon balay,” siring niya. “Inabat ko nga baga hin aadto na ako ha bag-o nga kalibotan. Yana, karuyag ko liwat buligan an iba.”

Ha diri pa la maiha, usa nga membro han Ukraine Branch Committee an binisita ha mga lugar diin ginhihimo an relief work basi dasigon an mga kabugtoan nga nawad-an hin balay. Hiya nagsiring: “An kabugtoan ha Ukraine pirme nagpapakita hin daku gud nga gugma ha usa kag usa. Pero tungod hini nga girra, nagin mas duok pa kami ha kada tagsa. Makalilipay makita kon paonan-o an bulig nga nakarawat han aton hinigugma nga kabugtoan nagpagios ha ira nga magbuhat hin dugang pa ha ministeryo ngan ‘magin hura hin damu nga kapahayagan han pagpasalamat ha Dios,’ sugad han ginsiring ha 2 Corinto 9:12.”

Tubtob han Disyembre 20, 2022, ini an report tikang ha Ukraine. Ini nga ihap iginbase ha kompirmado nga mga report tikang ha lokal nga kabugtoan. Pero an aktuwal nga ihap bangin mas damu pa tungod kay makuri an komunikasyon ha ngatanan nga rehiyon han nasud.

• 47 nga magwarali an namatay

• 97 nga magwarali an nasamaran

• 11,477 nga mawarali an nag-ebakwit ha pagkayana

• 590 nga balay an nabungkag

• 645 nga balay an daku an ruba

• 1,722 nga balay an gutiay la an ruba

• 7 nga Kingdom Hall an nabungkag

• 19 nga Kingdom Hall an daku an ruba

• 68 nga Kingdom Hall an gutiay la an ruba

• 26 nga Disaster Relief Committee (DRC) an nanginginano ha kabugtoan ha Ukraine

• 54,212 nga indibiduwal an direkta nga ginbuligan han mga DRC basi makabiling hin mas talwas nga urukyan

• 26,892 nga magwarali an pinalagiw ha iba nga mga nasud ngan ginbubuligan han kabugtoan