Tikang han Disyembre 26, 2022, an mga regular ngan espesyal payunir ha Ukraine nakaatender ha Pioneer Service School ha mga lugar kon diin talwas an pagbuhat hito. Depende ha kahimtang ha ira lugar, an mga payunir inatender ha in-person o pinaagi han Zoom. Bisan pa han mga problema sugad han pambomba, kawad-i hin koryente, kakurian ha pinansyal, ngan pagkawara-wara han Internet, ginprayoridad han aton kabugtoan nga makakarawat hinin espesyal nga instruksyon. Sugad nga resulta, naghilarom an ira gugma kan Jehova ngan mas nagrig-on an ira pagtoo ha iya.

Hi Natalia nga taga-Kryvyi Rih nagsiring: “An eskwelahan nagin sugad hin salbabida ha akon. Nakabulig ito nga diri ako malumos ha akon mga kabaraka ngan kahadlok.” Ini naman an siring ni Anastasia nga taga-Chernivtsi: “Nabuligan ako han eskwelahan nga makombinse nga hinigugma gud ako ni Jehova. Hinin naglabay nga tuig, damu an makaharadlok nga panhitabo, salit ginkinahanglan ko gud ini nga eskwelahan. Hihimoon ko an tanan ko nga makakaya basi padayon nga makarawat an mga bendisyon ni Jehova.”

Hi Svitlana, usa nga payunir nga taga-Kitsman, ha siyahan nabaraka han nakakarawat hiya hin imbitasyon ha pag-atender hini nga eskwelahan. Hiya nagsiring: “Ginsumatan ko hi Jehova han akon mga kabaraka, pati na an makuri nga panginabuhi. Sinarig ako ha iya ngan waray ako magbasol. Inabat ko an gugma ngan pag-ataman ha akon ni Jehova.” Tungod han pangalimbasog ni Svitlana, nadasig an iya bana nga diri Saksi ni Jehova, salit nagtikang hiya umupod pag-atender ha mga katirok ha kongregasyon.

Ha duha nga higayon, an mga estudyante ha Zhytomyr kinahanglan bumalhin ha usa nga tagoan ha underground tungod han mga pahamangno ha pambomba. Gumamit hira hin de-sungo nga lutoan basi magpaso an kwarto, ngan iginpadayon nira an ira klase. Bisan pa hini nga mga problema, hi Valentyna, nga bag-o la nga bumalhin ha Zhytomyr, nagsiring: “Diri ko gud mangangalimtan ini nga pag-eskwela. Inabat ko nga aada ako ha ilarom han gamhanan nga mga pako ni Jehova.”

Pariho ha damu nga nasud, nalipay gud an mga payunir ha Ukraine han nahibaroan nira nga gin-ibanan an kakab-uton nga oras. Katapos mabatian an pahibaro, hi Yulia nagsiring: “An akon kasingkasing napuno hin gugma para kan Jehova. Kanina han aga, nag-ampo ako kan Jehova ngan nanginyupo nga tugotan niya ako nga makapabilin ha pagpayunir. Diri ako maaram kon paonan-o hiya mabaton, pero maaram ako nga mabaton hiya. Han nahibaroan ko nga gin-ibanan an kakab-uton nga oras, daku gud an akon pagpasalamat kan Jehova han iya ginbuhat ha akon. Inin bag-o nga balita sugad hin marasa nga dessert katapos han amon pag-eskwela.”

Tubtob han Enero 24, 2023, ini an report tikang ha Ukraine. Ini nga ihap iginbase ha kompirmado nga mga report tikang ha lokal nga kabugtoan. Pero an aktuwal nga ihap bangin mas damu pa tungod kay makuri an komunikasyon ha ngatanan nga rehiyon han nasud.

• 47 nga magwarali an namatay

• 97 nga magwarali an nasamaran

• 8,953 nga mawarali an nag-ebakwit ha pagkayana

• 590 nga balay an nabungkag

• 645 nga balay an daku an ruba

• 1,722 nga balay an gutiay la an ruba

• 8 nga Kingdom Hall an nabungkag

• 17 nga Kingdom Hall an daku an ruba

• 76 nga Kingdom Hall an gutiay la an ruba

• 26 nga Disaster Relief Committee (DRC) an nanginginano ha kabugtoan ha Ukraine

• 46 nga balay an gin-ayad

• 5 nga Kingdom Hall an gin-ayad

• 54,445 nga indibiduwal an direkta nga ginbuligan han mga DRC basi makabiling hin mas talwas nga urukyan

• 27,655 nga magwarali an pinalagiw ha iba nga mga nasud ngan ginbubuligan han kabugtoan