Ha mga lugar nga naapektohan han duro nga araway sugad han Mariupol, waray koryente o heating, ngan waray liwat telepono ngan Internet. Naruba an mga bintana han damu nga mga balay. Gutiay hinduro an suplay han pagkaon ngan tubig. Sobra 2,500 nga kabugtoan an diri nakakagawas ha Mariupol. Ha pipira nga syudad, sugad han Bucha, Chernihiv, Hostomel, Irpin, Kyiv, ngan Sumy, nagkaada higayon an pipira nga makapalagiw. Tungod hini, damu han aton kabugtoan an nakapalagiw ngadto ha mas talwas nga mga lugar.

Usa nga 36 anyos nga tigurang ngan payunir, nga naukoy ha Hostomel, an pinalagiw kaupod han iya asawa ngan mga kag-anak. Iginsumat niya an iya naeksperyensyahan han nagtikang an araway ha ira syudad:

“May mga helikopter nga naglulupad-lupad hirani ha amon balay. Pirme may mga sarakyan hin sundalo ha mga kalsada. May nagkasulod nga mga sundalo ha amon balay samtang nakadto kami ha basement. Usa ha ira an nagpabuto hin pipira ka beses ngadto ha basement. Naigo han mga bala an go bag ni Nanay, pero waray kami maano. Ha sulod hin mga tulo o upat ka oras, waray kami kiwa-kiwa o waray uroaringasa samtang nababatian namon an pagbuto han mga bomba ngan pagpuropsilay ha gawas. . . . Pagkabuwas, han napalagiw kami, nagpurupsilay hirani ha amon. May mga tangke-de-girra ha mga kalsada . . . Delikado hinduro, pero mas delikado kon didto la kami.

“Nabag-o gud an amon kinabuhi tungod hini nga mga panhitabo. Nahibaro kami kon paonan-o iaaplikar an damu nga mga prinsipyo ha Biblia. Pananglitan, nahibaro kami kon paonan-o diri magkinabaraka han mahitatabo ha sunod nga adlaw, magin kontento ha nangunguna nga mga panginahanglan, ngan sumarig kan Jehova ha pinakamakuri nga mga kahimtang.”

Maaram kita nga an aton Dios nga hi Jehova maaram gud han ngatanan nga naieksperyensyahan nga kakurian han aton kabugtoan ha Ukraine. Sigurado nga bubuligan gud niya hira.—2 Pedro 2:9.

Tubtob han Marso 10, 2022, ini an report tikang ha Ukraine:

• 2 nga magwarali an namatay

• 8 nga magwarali an nasamaran

• 25,407 nga magwarali an pinalagiw tikang ha ira mga balay ngadto ha mas talwas nga mga lugar han nasud

• 25 nga balay an nabungkag

• 59 nga balay an daku an ruba

• 222 nga balay an gutiay la an ruba

• 7 nga Kingdom Hall an naruba

• 27 nga Disaster Relief Committee (DRC) an nanginginano ha kabugtoan ha Ukraine

• 10,566 nga magwarali an direkta nga ginbuligan han mga DRC basi makabiling hin mas talwas nga urukyan

• 9,635 nga magwarali an pinalagiw ha iba nga mga nasud ngan ginbubuligan han kabugtoan