Nasusubo kami pagsumat nga duha naton nga sister an namatay han ginbombahan an syudad han Mariupol. Ha pagkayana, may-ada pa sobra 2,000 nga aton kabugtoan an diri nakakapalagiw ha syudad tungod han duro nga araway. Han naglabay nga pipira ka adlaw, mga 150 nga Saksi an nakapalagiw ha syudad. May kabugtoan ha usa nga Disaster Relief Committee (DRC) nga nagsari pagdara hin mga relief ngadto ha Mariupol pero binalik hira kay ginpauranan hira hin bala pati na an iba pa nga mga sarakyan nga nagdadara hin mga ayuda. May bomba nga binuto ha usa nga complex nga may Kingdom Hall ngan Assembly Hall. Hito nga panahon, mga 200 nga aton kabugtoan an natago ha basement han Kingdom Hall. Waray maano an kabugtoan, pero nagkaruruba an ira mga awto, salit nagin mas makuri para ha ira nga makapalagiw ha syudad.

Usa nga tigurang (aada ha piktyur ha ubos) nga nakapalagiw ha Mariupol kaupod han iya pamilya an nagsumat: “Nawarayan kami apartment, trabaho, ngan diri na namon nakukontak an amon kasangkayan. An amon biyahe, nga dapat unta usa la ka adlaw, inabot hin unom ka adlaw. Samtang nagbibiyahe kami [tipagawas ha syudad], nakakita kami hin aso tikang ha waray pa bumuto nga mga bomba ha ligid han kalsada. Ha amon pagbiyahe, ginbuligan kami han kabugtoan nga makabiling hin makakaturogan ngan hin pagkaon. Inabat namon nga gin-aataman gud kami han aton Amay nga hi Jehova . . . Salit bug-os kami nga sinarig kan Jehova.”

An mga Saksi nga refugee tikang ha Ukraine nagbiyahe ngadto ha pipira nga nasud ha Europe para matalwas. Pananglitan, usa nga ministeryal nga surugoon, an iya asawa, ngan an ira tulo nga anak, nga nag-iedad hin 7, 11, ngan 16, nagbiyahe ngadto ha Portugal diin may mga paryente hira nga mga Saksi ni Jehova. Katapos han 11 ka oras nga paghinulat basi makatabok ha giutan, an pamilya nagbiyahe hin sobra 4,000 ka kilometro ha sulod hin upat ka adlaw basi makaabot ha balay han ira mga paryente. Inabot hira antes gud magtikang an katirok han kongregasyon. Bisan kon diri hira maaram magyakan hin Portuguese, ginpadayon hini nga pamilya an ira espirituwal nga rutina ngan natambong ha mga katirok. Naimpres an kongregasyon hini nga pamilya kay malipayon hira bisan kon makuri an ira kahimtang.

Usa pa nga sister nga pinalagiw ngadto ha Germany kaupod han iya pamilya an nagsaysay: “An pagbasa ha Biblia, paghunahuna han mag-opay nga butang nga may-ada kami, ngan pagpamalandong han aton makalilipay nga paglaom nagpapakusog gud ngan nagdadasig ha amon. . . . Inabat namon nga gin-gigiyahan ngan ginbubuligan kami ni Jehova pinaagi han aton kabugtoan. Gin-abiabi ngan ginbuligan gud kami nira ha Ukraine, ha Hungary, ngan yana dinhi ha Germany!”

Klaro nga ginbubuligan ni Jehova an ngatanan naton nga hinigugma nga kabugtoan ha Ukraine.—Salmo 145:14.

Tubtob han Marso 16, 2022, ini an report tikang ha Ukraine. Ini nga ihap iginbase ha kompirmado nga mga report tikang ha lokal nga kabugtoan. Pero an aktuwal nga ihap bangin mas damu pa, tungod kay makuri an komunikasyon ha ngatanan nga rehiyon han nasud:

• 4 nga magwarali an namatay

• 19 nga magwarali an nasamaran

• 29,789 nga magwarali an pinalagiw tikang ha ira mga balay ngadto ha mas talwas nga mga lugar han nasud

• 45 nga balay an nabungkag

• 84 nga balay an daku an ruba

• 366 nga balay an gutiay la an ruba

• 16 nga Kingdom Hall an naruba

• 27 nga DRC an nanginginano ha kabugtoan ha Ukraine

• 20,981 nga magwarali an direkta nga ginbuligan han mga DRC basi makabiling hin mas talwas nga urukyan

• 11,973 nga magwarali an pinalagiw ha iba nga mga nasud ngan ginbubuligan han kabugtoan