Padayon nga igin-uupod naton ha aton sinsero nga mga pag-ampo an aton kabugtoan ha Mariupol, diin nagpapadayon an araway ha kakalsadahan ngan pambomba. Makasurubo, unom nga aton kabugtoan an namatay tungod han pambomba. Ha kabug-osan, napulo na nga kabugtoan an namatay ha Ukraine. Gin-unabi liwat ha mga balita nga may usa nga teatro, diin may sobra 1,000 nga tawo nga natago, nga ginbombahan han naglabay nga semana. Waray kita kabugtoan nga namatay hini nga pag-atake, pero may pipira nga nasamaran.

Mga 750 nga aton kabugtoan an nakapalagiw tikang ha Mariupol, samtang ginbabanabana nga 1,600 an nagpabilin didto. Damu ha ira an aadto ha este nga bahin han syudad, nga kontrolado na yana han Russia.

Sugad han iginreport han naglabay, mga 200 nga kabugtoan an nagtago ha basement han usa nga complex nga may Kingdom Hall ngan Assembly Hall. Han nagin posible para hini nga kabugtoan nga makigkomunikar hin madaliay, ini an ira ginreport:

“Durante han pambomba, damu nga kabugtoan an nahadlok hinduro. An iba nagtangis. Han nabatian namon an mga pagbuto ha gawas, naghunahuna kami nga bangin mamatay kami diri ngani tungod han pagbuto o tungod han kalayo. Usa nga tigurang an nagsuhestyon nga magkanta an grupo hin mga Kingdom song. Durungan nga nagkanta kami hin 10 tubtob 15 nga kanta; sunod-sunod nga ginkanta namon ito. Kon mas daku an pagbuto ngan mas makusog an pagbay-og han bilding, mas gindadaku namon an pagkanta. Katapos, ginbasa namon an Salmo 27 ngan ginhisgotan ito. Kahuman, an ngatanan nagsumat han ira paborito nga mga teksto ngan nagsaysay kon paonan-o ito nagparig-on ha ira. . . . Naeksperyensyahan namon nga hi Jehova tinuod gud nga ‘an Amay han malumo nga kalooy ngan an Dios han ngatanan nga pagliaw,’ nga nagpapakalma ha aton ha pinakamakuri nga mga panahon.”—2 Corinto 1:3, 4.

An mga tigurang ngan an mga membro han lokal nga Disaster Relief Committee (DRC) nga andam magsakripisyo namiling han ira kabugtoan ngan gindad-an hira hin pagkaon ngan han ira ginkikinahanglan nga medisina, bisan kon mameligro an ira mismo kinabuhi. Usahay, kinahanglan kumamang ini nga kabugtoan basi diri hira maigo han purupsilay samtang ginbibiling nira an kabugtoan ha syudad. Proud kita ha aton kabugtoan nga ‘ginbubutang ha peligro an ira kinabuhi’ para ha ira mga igkasi-tumuroo.—Roma 16:4.

Tungod kay waray gas ngan koryente, an maisugon nga mga sister ha bug-os nga syudad nagluluto hin pagkaon ha gawas gamit an sungo. Katapos, an pagkaon igindideliber ha mga lagas ngan may depekto ha lawas nga mga magwarali. Damu nga kabugtoan an nawarayan balay, awto, ngan materyal nga mga panag-iya, pero mapasalamaton hira ha gugma ngan pag-ataman ha ira han ira mga igkasi-tumuroo.

An nagtatago nga kabugtoan nangangalimbasog nga ipadayon an ira espirituwal nga rutina pinaagi ha urosa nga pag-aram han Biblia ngan pagsumat ha iba han mensahe han Biblia kon posible.

Tubtob han Marso 22, 2022, ini an report tikang ha Ukraine. Ini nga ihap iginbase ha kompirmado nga mga report tikang ha lokal nga kabugtoan. Pero an aktuwal nga ihap bangin mas damu pa, tungod kay makuri an komunikasyon ha ngatanan nga rehiyon han nasud.

• 10 nga magwarali an namatay

• 27 nga magwarali an nasamaran

• 33,180 nga magwarali an pinalagiw tikang ha ira mga balay ngadto ha mas talwas nga mga lugar han nasud

• 78 nga balay an nabungkag

• 102 nga balay an daku an ruba

• 484 nga balay an gutiay la an ruba

• 1 nga Kingdom Hall an nabungkag

• 4 nga Kingdom Hall an daku an ruba

• 18 nga Kingdom Hall an gutiay la an ruba

• 27 nga DRC an nanginginano ha kabugtoan ha Ukraine

• 25,069 nga magwarali an direkta nga ginbuligan han mga DRC basi makabiling hin mas talwas nga urukyan

• 14,308 nga magwarali an pinalagiw ha iba nga mga nasud ngan ginbubuligan han kabugtoan