Samtang nagpapadayon an makuri nga kahimtang ha Ukraine, an Ukraine branch mas naniningkamot ha paghatag hin pagliaw ngan pagdasig ha kabugtoan hito nga nasud. Maduruto hira nga nagsi-shepherding ha yinukot nga kabugtoan nga pinalagiw ha iba-iba nga bahin han nasud. An mga kabugtoan nagpapahimulos hinin makapadasig nga mga pagbisita. Katapos bumisita an usa nga membro han Branch Committee ha mga pinalagiw nga kabugtoan ha western Ukraine, usa nga sister nga temporaryo nga naukoy kaupod an mga 30 nga iba pa ha usa nga Kingdom Hall ha syudad han Uzhgorod an nagsiring: “Inabat ko nga sugad hin ginkukugos ngan ginhahangkopan ako ni Jehova.”

An mga brother naniningkamot liwat ha paghatag hin pagliaw ngan pagdasig ha mga 100 nga maisugon nga mga membro han 27 nga Disaster Relief Committee (DRC). Hi Ihor, usa nga membro hin DRC, nagsiring: “Han gintokahan ako nga mag-alagad ha DRC, ako ngan an akon asawa nakapalagiw na ngan naukoy ha iba nga balay. Han kapoy na gud kami, usa nga membro han Branch Committee, nga busy liwat, an naghatag hin panahon basi bisitahon kami ngan mamati hin maopay ha amon. Inabat namon nga interesado gud hiya ha amon kaopayan.” Hi Ihor nagpadayon: “Kon aada kami ha usa nga sitwasyon nga pariho kami hin mga minasus-an, diin diri namon kontrolado an amon sitwasyon, ngan kon waray kami nakikita nga solusyon ngan an amon la mabubuhat amo an pag-ampo kan Jehova basi giyahan kami, agsob namon makita an iya kamot nga nagios para ha amon.”

May kalabotan ha kahimtang han mga Kingdom Hall nga duok ha mga lugar nga may girra, 4 an nabungkag, 8 an daku an ruba, ngan 33 an gutiay la an ruba.

Tubtob han Mayo 17, 2022, ini an report tikang ha Ukraine. Ini nga ihap iginbase ha kompirmado nga mga report tikang ha lokal nga kabugtoan. Pero an aktuwal nga ihap bangin mas damu pa tungod kay makuri an komunikasyon ha ngatanan nga rehiyon han nasud.

• 37 nga magwarali an namatay

• 74 nga magwarali an nasamaran

• 45,253 nga magwarali an pinalagiw tikang ha ira mga balay ngadto ha mas talwas nga mga lugar

• 418 nga balay an nabungkag

• 466 nga balay an daku an ruba

• 1,213 nga balay an gutiay la an ruba

• 4 nga Kingdom Hall an nabungkag

• 8 nga Kingdom Hall an daku an ruba

• 33 nga Kingdom Hall an gutiay la an ruba

• 27 nga DRC an nanginginano ha kabugtoan ha Ukraine

• 48,806 nga magwarali an direkta nga ginbuligan han mga DRC basi makabiling hin mas talwas nga urukyan

• 21,786 nga magwarali an pinalagiw ha iba nga mga nasud ngan ginbubuligan han kabugtoan