Padayon nga gin-aataman han Ukraine branch, ha bulig han 27 nga Disaster Relief Committee (DRC), an kabugtoan nga nag-ebakwit ha Ukraine. Tikang han pagtikang han girra, sobra 250 ka tonilada nga relief an ginpadara tikang ha Poland, upod na an mga pagkaon, bado, ngan mga gamit ha kalimpyo. Labot pa hito, sobra 80 ka tonilada nga pagkaon an igintagana han kabugtoan nga naukoy ha mas talwas nga mga lugar ha Ukraine.

Mahitungod han bulig nga iya nakarawat tikang ha kabugtoan ha DRC, an sister nga hi Valentyna nga taga-Kyiv nagsurat: “Han nagtikang an araway, delikado na hinduro an pagpabilin ha syudad. Salit nag-ebakwit ako ngadto ha usa nga gutiay nga bungto ha rehiyon han Cherkasy. Sobra na ako duha ka bulan dinhi. Gin-ataman gud ako han kabugtoan ha lokal nga kongregasyon. Gindad-an ako nira hin pipira ka kahon nga pagkaon ngan mga gamit ha kalimpyo. Han nakita ko ini ngatanan nga bulig, nabantad gud an akon kasingkasing. Ha usa han mga kahon, may-ada liwat drowing han kwatro anyos nga hi Blanca ngan usa nga postcard . . . Titipigan ko ini nga mga drowing basi diri ko ini hingalimtan. Karuyag ko sinsero nga magpasalamat ha ngatanan nga kabugtoan ngan labi na gud kan Jehova.”

An 83 anyos nga sister nga may depekto ha lawas nga taga-Sieverodonetsk, nga Valentyna gihapon an ngaran, nagsurat: “Han nagtikang an girra, nag-uusahan na la ako ha balay. Usa la an akon anak, ngan namatay hiya antes han girra. Makaharadlok hinduro kay bug-os nga adlaw nga ginbubombahan an syudad. Waray tubig, koryente, gas, ngan maluya an Internet. Mapasalamaton gud ako ha kabugtoan nga ginbutang an ira kinabuhi ha peligro basi buligan ako.”

Nagsiring pa hiya: “Ha urhi, ako ngan an duha pa nga sister nga may depekto ha lawas gindara han kabugtoan ngadto ha Dnipro, usa nga mas talwas nga syudad. Ha Dnipro, ginbuligan ako han kabugtoan nga makabiling hin mauukyan. Yana, naukoy ako ha usa nga Saksi nga pamilya, ngan gin-aataman nira ako. Gintatratar ako nira sugad nga ira kapamilya. Ira pa ngani ako ginbuligan nga magkaada celfon basi makatambong ngan makapartisipar ha mga katirok. Diri ko gud hingangalimtan an pagkabuotan nga iginpakita ha akon han kabugtoan.”

Malipayon ngan mapasalamaton gud kita ha aton mahigugmaon nga Amay, hi Jehova, nga padayon nga nag-aataman ha aton hinigugma nga kabugtoan ha Ukraine basi ‘diri [hira] makulangan hin bisan ano nga maopay.’—Salmo 34:10.

Tubtob han Hunyo 7, 2022, ini an report tikang ha Ukraine. Ini nga ihap iginbase ha kompirmado nga mga report tikang ha lokal nga kabugtoan. Pero an aktuwal nga ihap bangin mas damu pa tungod kay makuri an komunikasyon ha ngatanan nga rehiyon han nasud.

• 42 nga magwarali an namatay

• 82 nga magwarali an nasamaran

• 46,145 nga mawarali an nag-ebakwit ha pagkayana

• 469 nga balay an nabungkag

• 540 nga balay an daku an ruba

• 1,405 nga balay an gutiay la an ruba

• 5 nga Kingdom Hall an nabungkag

• 8 nga Kingdom Hall an daku an ruba

• 33 nga Kingdom Hall an gutiay la an ruba

• 27 nga DRC an nanginginano ha kabugtoan ha Ukraine

• 50,663 nga magwarali an direkta nga ginbuligan han mga DRC basi makabiling hin mas talwas nga urukyan

• 22,995 nga magwarali an pinalagiw ha iba nga mga nasud ngan ginbubuligan han kabugtoan