Han nagtitikaduro an araway ha Donetsk Region ha Ukraine, hi Brother Mykola Bozhedomov pipira ka beses nga nagbabalik-balik pagbiyahe ngadto ha Kramatorsk basi buligan an damu tubtob nga posible nga makapalagiw ha mga lugar nga may girra.

Pero han Abril 8, 2022, namatay hi Mykola han ginbombahan an estasyon han tren ha Kramatorsk, Donetsk Region.

Labot la ha 58 anyos nga hi Mykola, usa pa nga sister an kaupod ha sobra 50 nga namatay. Usa liwat nga brother an kaupod ha sobra 100 ka tawo nga nagkasasamaran. An iba nga mga Saksi nga nakatalwas ha pag-atake nagsumat nga nakabati hira hin duha nga makusog nga pagbuto ngan katapos hito may nagtalsik nga mga metal tikang ha mga bomba.

Hi Nina, nga asawa ni Mykola hin 32 ka tuig, nagsiring: “Pirme gin-uuna han akon bana an kaopayan han iba. Karuyag gud niya buligan an mga edaran ngan may sakit nga mga magwarali. Pero ha kada panahon nga nabalik hiya ha Kramatorsk, nagigin mas delikado ito. Ito na unta an iya ultimo nga biyahe.”

Hira nga mag-asawa dungan nga nabawtismohan han 1997. Hi Mykola matinumanon nga tigurang hin damu ka tuig. Iginpakita han kabugtoan an ira daku nga gugma ngan suporta kan Nina. Hiya nagsiring, “An ira mga pagliaw nakakabulig ha akon hini nga makuri nga panahon.”

Nagsiring liwat hi Nina nga naliliaw hiya han mga teksto ha Kasuratan, labi na an Isaias 40:28-31. “Ginbubuligan ako ni Jehova nga magkaada utro hin kusog,” siring ni Nina. “Inaabat ko nga hinigugma gud ako ni Jehova. Hadto, nababasa ko la an sugad hito nga gugma ha aton mga publikasyon, pero yana, ako mismo an nakakaeksperyensya hito.”

Igin-aampo naton hi Nina ngan an ngatanan nga namatyan hin mga hinigugma tungod han girra. Maaram kita nga padayon hira nga bubuligan ni Jehova.—Salmo 20:2.