Kahuman bayuhon han Category 5 nga bagyo nga Dorian an mga isla han Bahamas, sunod nga tumama ito ha este nga baybayon han Estados Unidos. Ha kakusgon nga Category 1 nga bagyo, gin-igo hito an Cape Hatteras, North Carolina, han Biernes han aga, Septyembre 6, 2019. Nagresulta ito hin pagbaha nga nakaapekto ha kabablayan ngan mga negosyo. Tungod han bagyo, nagkaada magkusog nga hangin han Septyembre 7, 2019, ha Nova Scotia, Canada.

An sanga nga opisina ha Estados Unidos nagreport nga ha 1,742 nga magwarali ha Bahamas usa la nga sister an nakaeksperyensya hin gutiay nga kadaot ha pisikal. Hini nga report, may-ada na 48 nga balay han mga Saksi an naruba ngan 8 nga balay an nabungkag.

Damu nga magwarali nga naukoy ha Great Abaco Island an gin-ebakwit ha Nassau, an kapital han Bahamas. Mapaso nga gintapo hira ha airport han mga kabugtoan didto.

An Disaster Relief Committee ngan an paramangno han sirkito didto nag-oorganisar hin bulig ngan nabisita ha mga magwarali nga naapektohan. An mga kabugtoan nga tikang ha sanga nga opisina ha Estados Unidos kinadto gihap para bumulig ngan magparig-on ha mga kongregasyon.

Ha Estados Unidos, an napuruhan gud han bagyo amo an North ngan South Carolina. Waray kabugtoan an nadaot ha pisikal, pero 737 nga mga bugto an kinahanglan bumaya ha ira balay, kadam-an ha ira an temporaryo nga gin-ebakwit tubtob nga puydi na hira makabalik ha ira mga balay. Labot hini, 50 nga balay ngan 12 nga Kingdom Hall an naruba.

Ha Canada, waray bugto nga nadaot ha pisikal. Pero tungod han bagyo, nagkaada gudtiay nga ruba an pipira nga balay han kabugtoan ngan nawarayan liwat hin koryente. An mga kabugtoan didto binulig ha mga naapektohan.

Mapasalamaton kita nga hi Jehova namamati ha “mga pakimalooy para hin bulig” han mga kabugtoan nga nasarig ha iya durante hinin makuri nga mga panahon.—Salmo 28:6.