Ginbayo han Bagyo Dorian an Bahamas tikang han Septyembre 1 tubtob Septyembre 3, 2019. Bisan antes pa umigo an bagyo, an Sanga nga Opisina ha Estados Unidos nag-organisar na hin bulig tikang ha Florida, U.S.A. Han dida nga talwas na an pagbiyahe, ginios dayon an kabugtoan nga may mga sakayan o eruplano, salit kaupod hira han siyahan nga bumulig ha mga naukoy ha isla.

Trese nga kabugtoan, kalalakin-an ngan kababayin-an, an nagpalupad hin eruplano hin 300 ka beses para magdara hin 15 ka tonilada nga suplay ngan sobra 700 nga boluntaryo pakadto ha apektado nga mga lugar. Labot pa hito, 13 nga sakayan han kabugtoan an gin-gamit ha pagdara hin haros 90 ka tonilada nga suplay. Naabot hin 12 ka oras an biyahe gamit hin sakayan pakadto ha Bahamas ngan pabalik ha Florida.

Katapos gud la han bagyo, an mga eruplano [han mga Saksi] linupad dayon dara an damu nga suplay para bumulig,” siring ni Jose Cabrera, station manager han Palm Beach International Airport ha Florida. “Ehemplo hira han tininuod nga pagbulig.”

“Para ha damu ha amon, ini an siyahan nga higayon nga nagamit namon an amon abilidad ha pagbulig ha kabugtoan,” siring ni Bugto Glenn Sanders,” usa han piloto nga mga boluntaryo. “Kamakalilipay hunahunaon nga usa kami nga gutiay nga parte, gutiay nga parte han lawas, nga nagdadara hin bulig ha iba nga parte han lawas nga nag-aantos.”​—1 Corinto 12:26.

Ginbabanabana han Sanga nga Opisina ha Estados Unidos nga maabot hin $1,750,000 (U.S.) an kabug-osan nga magagasto ha bulig nga ihahatag ngan matatapos ini ha Mayo 1, 2020.