Naruruyag ka ha usa nga imo nakilala, ngan kamo nga duha nagdesisyon nga mag-date basi hibaroan kon magigin maopay ba kamo nga padis ha kada tagsa. Ano an imo dapat laoman samtang mas nakikilala niyo hin maopay an usa kag usa?

Hini nga artikulo

•  Laumi nga kinahanglan an pagin tangkod

•  Laumi an pagkaada magkaiba nga opinyon

•  Laumi nga nakakaistres an pakig-date

 Kon kamo nga mag-uyab maggagahin hin panahon nga magkaupod, damu an iyo mahibabaroan parte ha usa kag usa. May mga butang nga mahibabaroan mo pinaagi ha pag-obserbar ha panggawi han imo uyab.

 Pero may pipira nga butang nga kinahanglan niyo nga duha tangkod nga pag-istoryahan. Samtang ginbubuhat niyo ito, tipigi nga abrido an iyo hunahuna tubtob nga posible ngan atohi an tendensya nga makaapekto an iyo emosyon ha iyo desisyon.

 Mga topiko nga dapat niyo paghisgotan:

•   Pagkapot hin kwarta. May-ada ka ba mga utang? Nakukurian ka ba pagkontrol han imo paggasto? Kon mag-asawa na kamo, paonan-o kamo magdidesisyon parte ha iyo kità ngan mga kagarastohan?

•   Kahimsog. Maopay ba an imo kahimsog? Nagkaada ka ba bisan ano nga grabe nga sakit ha naglabay?

•   Mga tumong. Ano an karuyag mo makab-ot ha imo kinabuhi? An imo ba mga tumong pariho ha mga tumong han imo uyab? Katapos han iyo kasal, magigin malipayon ka la ba gihapon bisan kon diri niyo makab-ot an iyo mga tumong tungod han iyo kahimtang?

•   Pamilya. May-ada ka ba yana bisan ano nga obligasyon ha pamilya? Posible ba magkaada ka hito nga mga obligasyon ha tiarabot? Karuyag mo ba magkaanak? Kon oo, pira?

 Kon ginhihisgotan niyo ito nga mga topiko, magin tangkod gud. Ayaw itago o bag-oha an bisan ano nga impormasyon basi la magpaimpres.—Hebreo 13:18.

 Hunahunaa ini: Ano an imo kinahanglan hibaroan parte ha imo uyab? Ano an dapat niya hibaroan parte ha imo? Paonan-o an pagin tangkod mag-aandam ha iyo nga magkaada maopay nga komunikasyon ha urhi kon kamo nga duha magdesisyon na nga magpakasal?

 Prinsipyo ha Biblia: “Paggisumat-sumat kamo han kamatuoran.”—Efeso 4:25, An Baraan nga Biblia.

 “An babaye bangin maghunahuna, ‘Unom ka bulan na la, mamamalayi na ada hiya,’ pero an lalaki bangin maghunahuna nga usa ka tuig pa. Kon sugad hito, an babaye bangin masakitan ngan mawurok tungod kay naglalaom hiya nga magpapakasal dayon hira samtang an lalaki naghuhunahuna nga mauruiha pa. Importante nga kamo nga duha pariho an ginhuhunahuna.”—Ariana, usa ka tuig na nga inasaw-an.

 Waray duha nga tawo nga magkapariho gud. Salit ayaw laumi nga ikaw ngan an imo uyab pirme magkakauyon o pariho an inaabat ha ngatanan nga butang. Pananglitan, an kultura ngan an paagi han pagpadaku ha iyo makakaapekto han iyo opinyon.

 Hunahunaa ini: Kon magkaiba an iyo mga opinyon ha talagudti nga butang, andam ba kamo sumunod ha karuyag han kada tagsa basi magin murayaw basta waray la prinsipyo ha Biblia nga natatalapas?

 Prinsipyo ha Biblia: “Ipakita . . . an iyo pagkamakatadunganon.”—Filipos 4:5.

 “Bisan kon inaabat niyo nga ‘mag-angay gud’ kamo, may-ada kamo pagkakaiba. Bisan kon importante an pagkauyon, mas importante an mga kalidad nga ginpapakita han kada usa kon diri kamo nagkakauyon.”—Matthew, lima ka tuig na nga inasaw-an.

 An pakig-date nagkikinahanglan gud hin daku nga panahon ngan mahimo makapaistres. Ano an makakabulig?

 Paghimo hin makatadunganon nga mga limitasyon. Ayaw pagpokus hin sobra ha imo pakig-uyab nga tungod hito napapabay-an mo na an imo mga responsabilidad—o an iba pa nimo nga kasangkayan. Hi Alana nga lima ka tuig na nga inasaw-an, nagsiring: “Kinahanglan mo gihapon an imo kasangkayan bisan kon mag-asawa ka na, ngan kinahanglan ka gihapon nira. Ayaw hira igbalewaray tungod la kay may uyab ka na.”

 Hinumdumi nga kon mag-asawa ka na, kinahanglan mo balansehon an ngatanan nga bahin han imo kinabuhi. Maopay nga pangalimbasogan nga himoon ito samtang mag-uyab pa la kamo.

 Hunahunaa ini: Nag-aaro ka ba hin daku nga panahon ngan atensyon ha imo uyab? Inaabat mo ba nga daku nga panahon ngan atensyon an iya gin-aaro ha imo? Paonan-o kamo magigin balanse basi waray bisan usa ha iyo an umabat nga kinakapoy o nabubug-atan tungod han iyo relasyon?

 Prinsipyo ha Biblia: “May itinanda nga panahon para ha tagsa nga butang, may panahon para ha tagsa nga buruhaton.”—Eclesiastes 3:1.

 “Kon ha pagpahalibway la nagkakaupod an mag-uyab, bangin makurian hira kon mag-asawa na hira. Maopay para ha mag-uyab nga magkaupod nga himoon an mga buruhaton ha adlaw-adlaw sugad han pamalit, buruhaton ha balay, ngan pagsingba. Makakabulig gud ini ha ira basi makahimo hin marig-on nga pundasyon para ha ira pag-asawa.”—Daniel, duha ka tuig na nga inasaw-an.

 Hinumdumi nga an pakig-uyab temporaryo la nga panahon basi makahimo ka hin desisyon, kon magpapakasal o tatapuson an iyo relasyon. Hihisgotan ha Bahin 3 hini nga serye an mga butang nga kinahanglan mo hunahunaon kon maghihimo hito nga desisyon.