Kita ngatanan mahimo makaeksperyensya hin trahedya. “Diri pirme an maglaksi an nagdadaog ha rumba, diri pirme an magkusog an nagdadaog ha girra,” siring han Biblia. “An panahon ngan diri ginlalaoman nga mga hitabo naabot ha ira ngatanan.” (Eclesiastes 9:11) Upod hito an pipira nga batan-on nga nakaeksperyensya hin trahedya. Paonan-o nira ito gin-atubang? Tagda an duha nga ehemplo.

•  REBEKAH

•  CORDELL

 Nagdiborsyo an akon mga kag-anak han 14 anyos ako.

 Ginsidngan ko an akon kalugaringon nga waray magdiborsyo an akon mga kag-anak, kinahanglan la ni Papa hin gutiay nga panahon para ha iya kalugaringon. Hinigugma niya hi Mama​—kay ano nga babayaan niya hi Mama? Kay ano nga babayaan niya ako?

 Nakurian ako nga isumat ha iba an nahitabo. Diri ko na karuyag nga hunahunaon ito. Nasina ako, pero hito nga panahon, waray ko mapansin nga sugad ngay-an hito an akon gin-aabat. Nagtikang ako magkinabaraka, ngan nakurian ako pagkaturog.

 Han 19 anyos ako, namatay hi Mama ha kanser. Hiya an akon best friend.

 Masakit para ha akon han magdiborsyo an akon mga kag-anak, pero mas masakit gud han mamatay hi Mama. Diri ko pa gihapon ito nahingangalimtan. Mas nakurian ako pagkaturog, ngan nagkikinabaraka pa gihapon ako.

 Pero hito nga panahon, may pipira nga butang nga nakabulig ha akon. Pananglitan, an Proberbios 18:1 nagpapahamangno ha aton nga diri ibulag an aton kalugaringon, salit naningkamot ako nga sundon ito.

 Dugang pa, sugad nga Saksi ni Jehova, naningkamot ako nga basahon an aton makaparig-on nga mga publikasyon nga basado ha Biblia. Usa han nakabulig ha akon han nagdiborsyo an akon mga kag-anak amo an Ang mga Tanong ng mga Kabataan​—Mga Sagot na Lumulutas. Nahinunumdoman ko pa nga ginbasa ko an usa nga kapitulo han Tomo 2 nga may ulohan “Puwede Bang Maging Masaya Kahit Iisa Lang ang Magulang?”

 Usa han paborito ko nga teksto nga nabulig ha akon kon nababaraka ako amo an Mateo 6:25-34. Ha bersikulo 27, hi Jesus nagpakiana: “Hin-o ha iyo an makakadugang hin usa ka siko a ha iya kinabuhi tungod ha pagkinabaraka?”

 An maraot nga mga butang mahitatabo ha aton ngatanan, pero nahibaroan ko ha ehemplo ni Mama nga importante kon paonan-o naton aatubangon ito nga mga pagsari. Damu an iya gin-agian​—diborsyo ngan katapos grabe nga sakit—​pero bisan pa hito natipigan niya an positibo nga disposisyon, ngan an iya pagtoo ha Dios nagpabilin nga marig-on tubtob ha iya kamatay. Diri ko gud hingangalimtan an iya mga igintutdo ha akon mahitungod kan Jehova.

 Hunahunaa ini: Paonan-o makakabulig ha imo an pagbasa han Biblia ngan mga publikasyon nga basado ha Biblia nga maatubang an trahedya?​—Salmo 94:19.

 Han 17 anyos ako, nakita ko han nautdan hin gininhawa hi Papa. An iya kamatay amo an pinakamaraot nga nahitabo ha akon kinabuhi. Masakit gud ito hinduro.

 Para ha akon, diri pa patay hi Papa, ngan han gintatabonan na nira hin taklap an iya lawas, ginhunahuna ko nga diri ito hiya. Ginsidngan ko an akon kalugaringon, ‘Magmamata hiya buwas.’ Nasubo gud ako hinduro ngan diri ako maaram han akon bubuhaton.

 Saksi ni Jehova an amon pamilya, ngan ginbuligan gud kami han amon mga kakongregasyon han namatay hi Papa. Gintagan nira kami hin pagkaon, gin-updan nira kami, ngan pirme hira aada para ha amon​—diri la ha madaliay pero ha maiha nga panahon. Para ha akon, an ira suporta pamatuod nga an mga Saksi ni Jehova tinuod nga mga Kristiano.​—Juan 13:35.

 An usa nga teksto nga nakaparig-on gud ha akon amo an 2 Corinto 4:17, 18. Nasiring ito: “Bisan kon an kasakitan temporaryo la ngan magaan, naghahatag ito ha amon hin himaya nga nagigin mas labaw gud ngan waray kataposan; samtang an amon mga mata nakatutok, diri ha mga butang nga nakikita, kondi ha mga butang nga diri nakikita. Kay an mga butang nga nakikita temporaryo la, pero an mga butang nga diri nakikita waray kataposan.”

 Daku gud an epekto ha akon han ultimo nga bersikulo. Temporaryo la an pag-antos ni Papa, pero waray kataposan an mga saad han Dios para ha tiarabot. Tungod han kamatay ni Papa, napamurubuot ko kon paonan-o ko ginagamit an akon kinabuhi ngan ginbag-o ko an akon mga tumong.

 Hunahunaa ini: Paonan-o an pakaeksperyensya hin trahedya mahimo makabulig ha imo nga usisahon an imo mga tumong?​—1 Juan 2:17.