“Isarig kan Jehova an anoman nga imo ginbubuhat, ngan maglalampos an imo mga plano.”—Proberbios 16:3, Bag-o nga Kalibotan nga Hubad.

 “Itubyan ngadto han Ginóo an imo mga búhat, ngan an imo mga laráng in magmamalinampuson.”—Mga Darahunon [Proberbios] 16:3, An Baraan nga Biblia.

 Ini nga proberbio nagpapasarig ha mga nagsisingba ha tinuod nga Dios nga maglalampos an ira mga plano kon masarig hira ha iya pinaagi ha pagpamiling ngan pagsunod han iya giya.

 “Isarig kan Jehova an anoman nga imo ginbubuhat.” Antes maghimo hin mga desisyon, mapainubsanon nga nangangaro hin giya kan Jehova a an iya mga magsiringba. (Santiago 1:5) Kay ano? Usa nga rason kay diri kontrolado han mga tawo an mga panhitabo nga makakaapekto ha ira kinabuhi. (Eclesiastes 9:11; Santiago 4:13-15) Dugang pa, bangin diri liwat hira maaram kon ano an ira bubuhaton basi mahimo an ira mga plano. Tungod hini nga mga rason, iginsasarig han damu nga tawo an ira mga plano ha Dios. Ginbubuhat nira ito pinaagi ha pag-ampo para hin giya ngan paggios uyon ha iya kaburut-on sugad han ginsisiring han iya Pulong, an Biblia.—Proberbios 3:5, 6; 2 Timoteo 3:16, 17.

 An mga pulong nga “itubyan ngadto han Ginóo b an imo mga búhat” literal nga nangangahulogan nga “ipakaliding an imo mga buhat ha Ginoo.” Sumala ha usa nga reperensya, ini nga mga pulong nagpapasabot hin “usa nga lalaki nga nagbabalhin han iya pinas-an ngadto ha mas makusog ha iya.” An mga mapainubsanon nga nasarig ha Dios makakasiguro nga bubuligan hira niya.—Salmo 37:5; 55:22.

 An mga pulong nga “an imo mga búhat” diri nangangahulogan nga uuyonan o bibendisyonan han Dios an tagsa nga plano han mga tawo. Basi makarawat an bendisyon ni Jehova, dapat an ira mga plano uyon ha iya mga suruklan ngan kaburut-on. (Salmo 127:1; 1 Juan 5:14) Diri ginbibendisyonan han Dios an mga diri masinugtanon. Ngani, “iya ginpapakyas an mga plano han magraot.” (Salmo 146:9) Pero ginsusuportaran niya an mga nagpapasakop ha iya kon ira ginrirespeto an mga suruklan nga iya iginpasurat ha Biblia.—Salmo 37:23.

 “Ngan maglalampos an imo mga plano.” Ini nga mga pulong iginhubad han iba sugad nga “an imo mga plano maiestablisar.” Ha Hebreo nga Kasuratan, o an gintatawag han kadam-an nga Daan nga Tugon, an pulong nga iginhubad nga “maiestablisar” nagpapasabot han ideya han paglatag hin pundasyon, ngan agsob nga nagtutudlok ito ha pagin marig-on han mga ginhimo han Dios. (Proberbios 3:19; Jeremias 10:12) Ha pariho nga paagi, an Dios marig-on nga mag-iestablisar han mga plano hadton nagbubuhat han husto ha iya atubangan, ngan bubuligan hira nga magkaada malipayon ngan may seguridad nga kinabuhi.—Salmo 20:4; Proberbios 12:3.

 Ini nga proberbio ginsurat ni Hadi Solomon, nga nagsurat han kadak-an nga libro han Proberbios. Nakayakan hiya hin yinukot nga darahunon tungod han kinaadman nga hatag ha iya han Dios.—1 Hadi 4:29, 32; 10:23, 24.

 Ha kapitulo 16, gindayaw ni Solomon an kinaadman han Dios ngan ginpakita nga nangangalas Hiya ha mga mapahitas-on. (Proberbios 16:1-5) Ini nga kapitulo nabulig ha magbarasa nga masabtan an kamatuoran nga pauroutro nga mababasa ha libro han Proberbios: An mga tawo magigin makinaadmananon ngan malampuson la kon magigin mapainubsanon hira ngan susundon an mga sugo han Dios. (Proberbios 16:3, 6-8, 18-23) Ini nga nangunguna nga kamatuoran pauroutro nga mababasa ha Biblia.—Salmo 1:1-3; Isaias 26:3; Jeremias 17:7, 8; 1 Juan 3:22.

 Kitaa an halipot nga video basi makita an kabug-osan han libro han Proberbios.